LINGA mukubelenga inyuzipepala, muketelela tv, pamo mukupilikisya ilediyo, mukuketa nukupilika isya bandu aba bikubomba imbibi, ubwite, kangi nubugabenga. Lumo numwe mukutamiwa panongwa ya bubine pamo unkamu winu unganiwa yumo afwile.

Mwilalusye:

• Ngimba indamyo isi ngwaghana nasyo bwighane bwa Kyala?

• Ngimba mbaghile ukubwagha kughu ubutuli ukuti malane nindamyo isi ngwaghana nasyo?

• Ngimba akabalilo kamo kwisakuya ulutengano?

IBaibolo likwamula amalalusyo agha.

• Abandu batisa kupilikagha ukubaba, ukukangala, pamo nukufwa.—Ubusetuli 21:4

• “Abalemale bisakunyelagha itolo ukwenda nukukina.”—Yesaya 35:6

• “Abafwamaso bisakuketagha.”—Yesaya 35:5

•  Abafwe bikwisa kusyuka.—Yohani 5:28, 29

• Nayumo ikwisa kuyoba ukuti ndi mbine.—Yesaya 33:24

• Aliwesa ikwisa kuya nifyakulya.—Salimo 72:16

Lumo isi mubelengile pamapeji ghabwandilo agha, mukwinong’ona ukuti sikabaghila ukubombiwa. Loli Kyala afingile ukuti ikwisa kuchenja ifindu pa kisu, kangi iBaibolo likuyoba muno ikwisa kubombela isi.

IBaibolo likuyoba ifindu fingi. Likutubula isi tukulondiwa ukumanya ukuti tuhobokeghe nubumi bwitu. Inong’onelapo indamyo isi mukwaghana nasyo. Lumo muli balondo, pamo mukwaghana nindamyo mbweghi bwinu, ububine pamo yumo wa bakamu binu afwile. IBaibolo libaghile ukubatula ukumalana nindamyo isi, kangi iBaibolo libaghile ukubatula ukwamula amalalusyo agha:

• Nongwa yafiki tukutamiwa?

• Ngimba tungamalana bulebule nindamyo isi tukwaghana nasyo?

• Ngimba mungapanga bulebule ukuti muye nulusekelo m’mbumba yinu?

• Findu fiki fikubombiwa linga umundu afwile?

• Ngimba abakamu bitu aba bafwile tukwisa kubabona kangi?

• Nongwa yafiki tukuya nulusubilo ukuti Kyala ikwisa pakubomba fyosa ifi afingile?

 Ukubelenga kwinu ibuku ili kukunangisya ukuti mukulonda ukumanya isi iBaibolo likumanyisya. Ibuku ili likuya pakubatula. Mukuya pakughagha amalalusyo agha ghakuya pakubatula ukupilikisya kanunu iBaibolo. Abandu bingi bikuhoboka ukumanyila iBaibolo na Baketi ba Yehova, tukusubila numwe mukuya pakuhoboka. Kyala abasaye apa mukwiyula ukumanyila iBaibolo!