SƆ̄ O buū kpa a kɔ nu a gaa sira, o ɛp tɛlɛvisɔn, ale o gbaɛ̄tɔ̄ ekpo yɔɔ, o muɛ̄ sa dā kɛ̄ bag dogo, nɔ̄ le yere bɔɔ gaa sira gbɛnɛ doo. Naa daba, taɛ olo le bu taāŋa nyɔɔbee loo a dumɛ ale nyɔɔbee nɛɛ o wereloo u.

Bip oloo:

• Lege nu Bari gbī kɔ a sira mɛ loo le na butɔ na ama ni?

• Mɛ kɛ̄ na m dap ɛrɛ yerebah loo pya na taāŋa aā a?

• Ekɔ kaāna efɛɛloo elege ni?

Baibol nɛ kaāna ture loo pya ebip ama.

• Loo pya nɛɛ naale edumɛ na, ba naale e’ana na, e ba naale e’u na.​—Mumuuna 21:4

• “Nɛɛ kɔgah e pɛɛ doodoo loo.”​—Aisaia 35:6

• “Dɛɛ̄ pya zima dɛɛ̄ eyeea.”​—Aisaia 35:5

•  Elu edoo kɔ pya e’ua a sikɛ̄ tɔɔ̄dum.​—Jɔn 5:​28, 29

• Loo lɔgɔ nɛɛ naale edumɛ na.​—Aisaia 33:24

• Dɛ̄dɛɛ̄ nɛɛ a le a kɛnɛkɛ̄ e ɛrɛ gbɛnɛ-edo nuede.​—Le-yɔɔ 72:16

Waɛ ekɛɛrɛ kɔ pya nu o buū pio naɛsī akii dumɛ a, naale edoo a. Mɛ, Bari e yira yii lo e nyaana pya kɛ̄tɔɔ̄ ama sɔ̄ sɔ̄ naa biniā. E Baibol baatɛ̄ kɛ̄ edoo doo.

Baibol kɔ emanyɔɔ wo. A kɔ i nɛ nu a i bɛɛ̄ esuā lokwa i ɛrɛ kaāna ɛɛbu le ekpeloo dum a taɛ nyaawo. Naa kɛɛrɛ kina, pya nu a gaa a nɛ taāŋa. Dap lu naɛbah ale taāŋa butɔ, dumɛloo, ale sɔ̄ nɛɛ o wereloo u. Baibol dap a yerebah nɛ lo e tama pya taāŋa ama. A dap nage a gbɔ̄nyiɛ̄ tɛ̄maloo a agara pya ebip ama:

• Ena anua i tɔga ani?

• Mɛ sīdee na i dap tama pya i taāŋa ani?

• Ekɔ i butɔ dapge le bu ɛɛbu ni?

• Ena a i sira loo sɔ̄ i u ani?

• I sigekɛ̄ muɛ̄ pya i wereloo ba e’ua ni?

• Ena anua i suā mmɛɛ̄ kɔ Bari edoo dɛ̄dɛɛ̄ nu a bee yira yii loo ani?

 O buū kpa ama anyaawo tɔgɛ kɔ o gbī esuā nu Baibol tɔgɛ. Kpa ama e yerebah a nɛ. Ɛrɛ pya ebip a le nɛ pya ye barakpaɛ̄, lo e yerebah a nɛ kɔ o dābeeloo Baibol leere. Gbɛnɛ-edo miliɔn pya nɛɛ e’ɛrɛ ɛɛbu aāloo nyɔɔnɛ Pya Ekeebee Jɛhova kɔnia ue a aabu Baibol. I kɛɛrɛ kɔ e nua nage ɛɛbu loo olo. Doolo Bari a nɛ leelee kuma sɔ̄ o gaa gbītɛ̄ nu Baibol dap a tɔgɛ!