ỌKE we se ọbe iyẹnrẹn, we ni ekpetughe, yanghene wa kerhọ ekpetagbero, wa mẹrẹn jeghwai rhon ikun buebun ri sekpahen ozighi, uvweri, ọrhẹ okpetu. Ọkezẹko wa rioja fọkiẹ emiamo yanghene ohworho wu vwo ẹguọlọ kpahen ro hwuru.

Nọ oma ọnọ:

• Ọnana yẹ oborẹ Osolobrugwẹ ọ guọlọ mẹ ọrhẹ ekrun mẹ?

• Bọgo mi na mẹrẹn userhumu e nyerẹn ghele ebẹnbẹn mẹ?

• Ana ghini sabu mẹrẹn obọdẹn ufuoma?

Baibol na o tiobọnu obọdẹn ẹkpahenrhọ rẹn enọ erana.

• Ihworho i rha dẹrughwaroghwẹ emiamiamo, ọho, yanghene uhwu ghwomara-an.—Revelation 21:4

• “Ukpolo nẹ ono pho jerẹ ẹrhuọghwa.”—Isaiah 35:6

• “Ihworho ri tuẹro ni na mẹrẹn ude.”—Isaiah 35:5

•  Ihworho ri hwuru ina rharhumu nyerẹn.—John 5:​28, 29

• Orho vwo ohworho ro no kpomu-u.—Isaiah 33:⁠24

• Emaren ono bunrhọ harẹn kohworho kohworho rọ ha uvuẹn akpọ na.—Psalm 72:⁠16

Wu na sabu roro taghene oborẹ wu seri uvuẹn aruọbe ọrukaro uvuẹn ọbe ọnana, emru emena. Osolobrugwẹ o veri taghene ọnọ ha ewene erana rhiẹ akpọ na phẹrẹkpẹ, Baibol na o dje oborẹ ọye ono ruie lele.

Baibol na o ji dje kpahen erọrọ. Ọ ta rẹn ọwan oborẹ ene ru, na sabu mẹrẹn obọdẹn omamerhomẹ jeghwai riakpọ ọke ọnana. Gba ha ẹhẹn roro kpahen ekwakwa ra suẹ ọfiamu wẹn. Enana ina sabu rhiẹ ebẹnbẹn igho yanghene ebẹnbẹn ekrun, emiamo, yanghene uhwu o kpe ohworho wu vwo ẹguọlọ kpahen. Baibol na ọnọ yọ userhumu nyerẹn ghele ebẹnbẹn enana, ọnọ ji yọ urhebro wu rha mẹrẹn ẹkpahenrhọ harẹn enọ enana:

• Mesoriẹ ọwan a rioja?

• Marhẹ ene ru sabu nyerẹn ghele ebẹnbẹn ọwan?

• Ekrun ọwan ina sabu vwo omamerhomẹ?

• Me yọ phia rẹn ọwan erhe hwu?

• Ana ghini sabu rharhumu mẹrẹn ihworho re vwo ẹguọlọ kpahen ri hwuru?

• Mesoriẹ ono mwu ọwan ẹro taghene Osolobrugwẹ ono ru kemru kemru ro veri?

 Ra mẹriẹn taghene we se ọbe ọnana, o djerie phia taghene wu guọlọ rhe oborẹ i Baibol na ọ tare. Ọbe ọnana ọnọ yọ userhumu. Udjoghwẹ owuowu uvuẹn ọbe ọnana o vwo enọ, ọnana ọnọ yọ userhumu vwẹruọ i Baibol na fiotọre. Iduduru ihworho a mẹrẹn omamerhomẹ ọke rẹ aye e yono i Baibol na rhẹ Iseri Jehova. O mwu rẹ ame ẹro taghene wu na ji mẹrẹn omamerhomẹ. Jenẹ Osolobrugwẹ ọ yọ ebrurhọ ra mẹriẹn taghene we yono kpahen oborẹ i Baibol na ọ tare!