MUKAMBALEWENGA nyunzipepa, kunyangʹanira TV panango kubvesera wailesi, nkhani zomwe zichabveka nthawe zizinji zichafotokoza vophwanya malamulo, nkhondo na ugananga. Vingachitike kuti imwepo munkubonera ndawa ya matenda panango ndawa yakuti munzanu panango m’bale wanu adafa.

Dzibvunzeni kuti:

• Ko Mulungu angada kuti moyo wangu na wa azibale wangu ukhale tene?

• Ko ni mbani anganithandize kuti nikwanise kugwebana na mabvuto yangu?

• Ko nthawe inango vidzakwanisike kuti wanthu padziko akhale pantendere?

Baibolo inamidawiro yobveka pa mibvunzo mwaya.

• Wanthu adzabvelini soti kuwawa, adzakalambelini soti ndipo adzafelini.​—Chivumbulutso 21:4

• ‘Munthu wopunduka adzakwere phiri ninge mwanchitira bawala.’​—Yesaya 35:6

• ‘Maso ya wanthu alombe yadzafunguliwe.’​—Yesaya 35:5

•  Wanthu womwe adafa adzakhale soti na moyo.​—Yohane 5:28, 29

• Wanthu adzadwalelini soti.​—Yesaya 33:24

• Aliyese adzakhale na chakudya chizinji.​—Salimo 72:16

Panango munkuganiza kuti vamwalewenga m’tsamba yakumbuyo vingakwanisikelini. Koma Mulungu adapolomisa kuti achite vimwevi manje-manje ndipo Baibolo ichafotokoza momwe vidzachitikire.

Kuyingizira pamwapa, Baibolo ichafotokoza soti vinthu vomwe vingatithandize kukhala wakukondwa manjewuno. Ko imwepo munamabvuto yaponi? Vingakwanisike kuti munabvuto yakusowa mali, ya m’banja, matenda ndipo m’bale wanu panango shamwali wanu adafa. Baibolo ingakuthandizeni kupirira mabvuto mwaya na kukulimbikisani ndawa ichadawira mibvunzo ninge aya:

• Ko ndawa chani tichabonera?

• Ko tingapirire tani mabvuto yatinayo?

• Ko vingakwanisike kukhala na banja yakukondwa?

• Ko nchani chichachitika munthu akafa?

• Ko vingakwanisike kudzawawona soti anzathu na azibale wathu womwe adafa?

• Ko nchani chingatithandize kutsimikiza kuti vomwe Mulungu adatipolomisa vidzachitikedi?

 Kulewenga bukhu mweyi kwamunkuchita, vinkuwonesa kuti muchada kudziwa vomwe Baibolo ichapfunzisa. Bukhu mweyino ikuthandizeni maninge. Ndime iliyose ina mbvunzo wake ndipo mibvunzo mwaya yangakuthandizeni kuyibvesesa Baibolo. Wanthu azinji achakondwa akambapfunzira Baibolo na Mboni za Yahova ndipo tinkukhulupirira kuti imwepo mukomedwembo. Mulungu adzakudaliseni mukambayesesa kufaga-faga vomwe Baibolo ichapfunzisa.