NI OMW kin wadek doaropwehn rohng kan, kilang TV de rong redio, ke kin kilang oh rong rohng tohto duwen kauwehla kosonned kan, mahwen, oh wiewiahn loallap akan. Mwein ele ke kin lokolok pwehki soumwahu de pahtou pwehki mehlahn emen me ke poakohng.

Pein idek rehmw:

• Ia duwe, ih met me Koht kupwurki ong ie oh pil ong ei peneinei?

• Ia wasa I kak diar sawaspen ei kahpwal akan?

• Uhdahn pahn mie popohl mehlel?

Paipel kin kihda pasapeng likilik kan ong peidek pwukat.

• Aramas akan sohla pahn medek, mahla, de mehla.​—Kaudiahl 21:4

• “Me nehtuk kan pahn mwusikekda oh kahkahlek.”​—Aiseia 35:6

• “Me maskun kan pahn pehdpeseng.”​—Aiseia 35:5

•  Me melahr kan pahn pwurehng mourda.​—Sohn 5:28, 29

• Sohte me pahn soumwahuda.​—Aiseia 33:24

• E pahn mie mwenge tohto ong koaros me kousoan nin sampah.​—Melkahka 72:16

E pahn mengei en medewe me dahme ke ahpwtehn wadek wiahte ouraman kei. Ahpw Koht ketin inoukidahr en wiahda wekidekla pwukat nin sampah ni ahnsou keren, oh Paipel kin kawehwehda ia mwomwen eh pahn ketin wia met.

Paipel pil kin padahngki soahng teikan. E kin padahkihong kitail dahme kitail anahne ese pwe kitail en kak uhdahn nsenamwahu oh perenki mour ni ahnsou wet. Nna medewe mahs duwen soahng kan me kin kapwunodeiuk. Ele e kin pidada kahpwal en mwohni de peneinei, kahpwal en roson, de mehlahn emen me ke kin poakohng. Paipel kak seweseiuk en powehdi kahpwal pwukat, oh e kak kansenamwahwihukala ni eh pahn sapengala soangen peidek pwukat:

• Dahme kahrehda kitail kin lelohng lokolok kan?

• Ia duwen atail kak powehdi atail kahpwal akan?

• Ia duwe, atail peneinei kak nsenamwahu?

• Dahme pahn wiawihong kitail ni ahnsou me kitail pahn mehla?

• Ia duwe, kitail pahn kak pwurehng tuhwong kompoakepatail me melahr akan?

• Dahme kahrehda kitail kak likih me Koht pahn ketin kapwaiada soahng koaros me e ketin inoukidahr?

 E sansal me ke men ese dahme Paipel kin padahngki pwehki omw wadewadek pwuhk wet. Pwuhk wet pahn seweseiuk. Mie peidek kan ong parakrap kan, me pahn seweseiuk en wehwehki mwahu Paipel. Aramas rar kei kin perenki koasoiapene Paipel rehn Sounkadehdehn Siohwa kan. Se koapworopworki me ke pil pahn perenki. Koht en ketin kapaiaiukada ni omw diarada dahme Paipel kak padahkihong uhk!