TELEVISIONPI, Internetpi, periodicocunapica llaqui noticiacunatami ricunchij. Quiquinpish tal vez ungushcachari cangui, o cambaj familia huañushcamantachari llaquilla cangui.

Caipi yuyai:

• ¿Diosca chashna cꞌuyaillata causachunchu munan?

• ¿Llaquicunata ahuantangapajca pitaj ayudai tucun?

• ¿Cashna llaquicunahuanchu siempre causashun?

Cai tapuicunataca Bibliapimi yachai tucungui.

• Ña mana yuyajyashunchu, mana huañushunchu, nanaicunatapish ña mana charishunchu (Apocalipsis 21:4).

• “Cojocunapish taruga shinami saltacungacuna” (Isaías 35:6).

• ‘Mana ricujcunapaj ñahuicunapish pascashcami canga’ (Isaías 35:5).

•  Huañushcacunapish causaringacunami (Juan 5:25).

• Ungushcami cani nishpaca ni pi mana ningacunachu (Isaías 33:24).

• Micunapish tucuicunapajmi tiyanga (Salmo 72:16).

Página 4 y 5-pi ricurij dibujocunaca cambajca shuj muscui shinachari ricurin. Pero Yaya Diosmi cai Allpamanca cashna bendicioncunataca ñalla apamunga. Bibliapimi ima shina caita ruranata huillan.

Bibliapica cushilla causangapaj imata ruranatami yachachin. Familiacunahuanchari problemacunata charingui, cullqui valichari causangui, ungushca cashcamantachari achcata sustarishpa causangui. O maipicarin cambaj familia huañushcamantachari llaquilla cangui. Cashna llaquicunahuan cashpapish Bibliata yachashpami achca animota japingui, cai tapuicunamantapishmi yachangui:

• ¿Imamantashi llaquilla causanchij?

• ¿Llaquicunataca ima shinataj ahuantai tucunchij?

• ¿Familiahuan cushilla causangapajca imatataj rurana canchij?

• ¿Huañushpaca imataj tucunchij?

• ¿Huañushca familiacunata cutin ricushunchu?

• ¿Dios pai nishcacunata pajtachina cashcataca imamantataj crinchij?

 Bibliataca cai librohuanmi ashtahuan intindi tucungui. Cada hojapaj ura chaquipimi cai libropica huaquin tapuicuna tiyan. Chai tapuicunata cutichishpami Bibliataca ashtahuan intindingui. Achca gentecunami muyundij Allpapi testigo de Jehovacunahuan Bibliata cushilla yachacuncuna. ¿Canpish chashna yachanata munanguichu? Bibliata yachacushcamantaca Yayitu Dios bendiciachun ninchijmi.