ÁICAP noticiasta leenqui, televisiunta ckaanqui o radiupi uyarinqui, huañuchinacusckancunata, guerrasmanta y terroristasmanta uyarinqui. O ckam suj ónckoy usus tiayta atinqui o suj persona ancha munascka huañusckanraycu.

Tapunácuy:

• Tata Yaya, ¿cayta nockápaj y familiáypaj munan?

• Problemasníypaj, ¿maypi yanapata tariyta atini?

• ¿Aicapllápaj paspi causayta atíysh?

Cay tapunasta Biblia allít contestan.

• Ni pipas nanayta ápej ’rin, ni viejóyaj ’rin, ni huáñoj ’rin (Revelación 21:4).

• Picunas mana marchayta atincu, marchayta átej ’rincu y huairacachayta átej ’rincu (Isaías 35:6).

• Picunas mana ckaancu, ckaayta átej ’rincu (Isaías 35:5).

•  Huañojcuna cáusaj ’rincu (Juan 5:28, 29).

• Ni pipas ónckoj ’rin (Isaías 33:24).

• Túcuy Ashpapi causajcuna ancha ashca micuyta ápej ’rincu (Salmo 72:16).

Fácil canman pensayta librupi nisckanta ni aicappas sucédej ’rin. Pero Tata Yaya niáysh ima dejuro chayta ’rúaj ’rin, Biblia nin imaina ’rúaj ’rin.

Biblia astaan nisun. Niáysh precisasckayshta yachayta cusisckas canáyshpaj y cunan causaymanta disfrutanáyshpaj. Pénsay imát preocupasun. Cayta atin ckoshcke, familia, ónckoy, o suj persona ancha munascka huañusckanraycu. Problemasta apiptiyqui Biblia yanapasuyta y consolasuyta atin, cá tapunas contestas:

• ¿Imajchus usúysh?

• ¿Imaina problemasniyshta allichayta atíysh?

• ¿Familiáysh cusiscka cayta atin?

• Huañuptíysh, ¿imát sucedeáysh?

• Personas ancha munasckayshta na huañorancu, ¿causajchu ’rincu?

• ¿Imajchus convensesckas tiayta atíysh Tata Yaya túcuy nisckanta ’rúaj ’rin?

 Leeshcaptiyqui cá libruta ckaachinqui Biblia yachachisckanta yachanaanqui. Cáy libru yanapásoj ’rin. Sapa parrafopi tapunas tían yanapasoncka Bibliát allít unanchanayquípaj. Ancha ashca personas na aprendeshcancu Bibliamanta Jehóvap testigusninuan. Suyaycu ckampas chayta ’ruanayquita. ¡Tata Yaya bendecísoj ’rin Biblia yachachisckanta estudias seguiptiyqui!