PERIODICOGUNARA leasha, televisionda ricusha, radiora uyasha ashca manali rashcaunamanda, guerragunamanda, runaunara huañuchijcunamandas uyanchi. O canllara shu ungüimanda o shu llaquishca aillu huañushcamandas turmindariungui.

Tapuringui:

• ¿Ñuca, ñuca familia causanuchu casnami Yaya Dios munan?

• Turmindusgunara ahuantangaj ¿maibi yanapaira tupana ushani?

• ¿Ima huras Allpai ali gustu causaira charishun?

Bibliaga cai tapuigunaras cutipanmi.

• Runauna nanaigunas mana sintingachu, mana rucuyangachu, mana huañungachu (Ricuchina 21:4).

• “Anga chaqui venado cuinta sicangami” (Isaías 35:6).

• “Ñausauna ñahuira pascarishca anungami” (Isaías 35:5).

•  Huañushcauna causarinungami (Juan 5:​28, 29).

• Mana pis ungushca tiangachu (Isaías 33:24).

• Tucuigunahuas micuna tiangami (Salmo 72:16).

Cai libroi punda tiaj quillcaunais leashcara shu muscui an nisha iyarina ushangui. Shinajpi Yaya Diosga cai tucui rimashcara cai Allpai pactachingami, astaumbas Bibliaga yachachin imasnara ruranga.

Bibliaga nin ñucanchi imara rurana anchi cunan shu gustu causaira charingaj. Shu ratulla camba preocuparishcaunai iyari, huaquimbi camba aillu ucui problemagunara charina, cullquimanda preocuparina o ungüigunaras charina ushangui. O camba aillu huañushcamanda ashcara llaquiringui. Bibliaga cai problemagunara ahuantangaj canda yanapana ushanmi. Astaumbas canda cushiyachina ushan, cai tapuigunaras cutipashcamanda:

• ¿Imarasha turmindarinchi?

• ¿Imasna rashara problemagunara ahuantana ushanchi?

• Familia ucui cushi causangahua ¿imara rurana anchi?

• Huañushca huasha ¿imara tucunchi?

• ¿Ñucanchi aillu huañushcara cutillara ricungaraunchi?

• Yaya Dios paihua rimashcara pactachingami ¿imarasha quirina ushanchi?

 Cai librora leashaga, Biblia imara yachachishcara yachangahua munashcara ricuchingui. Cai librohua mas yachanguimi. Cai libroi punto nishcauna charin, puntogunaj tapuiguna uranii tianmi. Cai tapuigunas Bibliara mas intindingahua yanapanga. Huaranga huaranga runauna gustu rimanara Jehovahuaj testigogunahua charinuca. Bibliara mas yachashcamanda Yaya Dios canda bendiciachu chapaunchi.