RADIOPI, televisionpi, periodicopi, internetpipas astawanqa uyarinchis wañuchinakuymanta, guerrakunamanta terrorismomanta noticiakunatan. Yaqapaschá qanpas sufrishanki familiayki wañupusqanwan otaq onqosqaykirayku.

Tapukurankipaschá:

• ¿Khaynapi kausananchistachu Dios munaran?

• ¿Maypin yanapayta tariyman problemaykunata atipanaypaq?

• ¿Kanqachu jayk’aqllapas thaj kausay?

Bibliaqa kutichinmi chay tapuykunaman.

• Manañan nanaypas, machuyaypas, wañuypas kanqachu (Apocalipsis 21:4)

• ‘Wist’ukunan taruka jinaraq p’itanqa’ (Isaías 35:6)

• ‘Ñausakunan qhawaripunqa’ (Isaías 35:5)

•  Wañusqakunan kausarinqaku (Juan 5:28, 29)

• Manañan pipas onqonqachu (Isaías 33:24)

• Llapa runapaqmi askha mijuy kanqa (Salmos 72:16)

Kay libroq qallariy paginankunapi leesqaykitaqa manapaschá creenkichu. Diosmi ichaqa prometewanchis pisi tiempomanta chayta ruwananpaq, Bibliapitaq willan imayna ruwananta.

Bibliapiqa kallantaqmi allin consejokuna kusisqa kausananchispaq. Yaqapaschá llakikushanki, qolqemanta, saludniykimanta otaq wañupuq familiaykimanta. Bibliaqa yanapasunkin chay llakikuyniykikunata atipanaykipaq, jinaspapas kay tapuykunamanmi kutichin:

• ¿Imaraykun sufrinchis?

• ¿Imaynatan problemanchiskunata atipasunman?

• ¿Imatan ruwasunman familianchiswan kusisqa kausanapaq?

• ¿Iman pasawanchis wañupuqtinchis?

• ¿Jayk’aqllapas tupasunchu wañupuq familianchiskunawan?

• ¿Imaraykun seguro kashanchis Diospa promesankuna junt’akunanmanta?

 Kay librota leespan rikuchishanki Bibliaq yachachisqanta entiendey munasqaykita. Kay libroqa Bibliaq nisqanta yachanaykipaqmi yanapasunki. Sapanka parrafopaqmi tapuykuna kashan, chaymi yanapasunki Bibliata allinta entiendenaykipaq. Askha runakunan kusikunku Jehová Diospa testigonkunawan Bibliata estudiaspa. Munaykun qanpas chayta ruwaspa kusikunaykita. ¡Diosmi yanapasunki Bibliaq yachachisqanta entiendenaykipaq!