PERIODICOTA liishpa, teleta ricushpa, radiota uyashpaca pitapash huañuchishcata, guerra tiashcata, guerrillacuna llaquichishcatami uyangui. Quiquinbash imapash ungüihuan o quiquinba familiamanda pipash huañushca cajpica llaquillachari cangui.

Cai tapuicunapi pensaripai:

• Ñucapash, ñuca familiapash ¿llaquilla causachunllu Diosca munarca?

• Problemacunata mishangapaca ¿maipita ayudata mascai ushani?

• ¿Ima horapash ali causai tiangacha?

Bibliapimi cai tapuicunataca yachachin.

• Gentecunaca nanaicunata na charingachu. Na rucuyangachu, ni huañuita ñana huañungachu (Apocalipsis 21:4).

• “Suchucunapash tarugashnami fahuanajunga” (Isaías 35:6).

• “Ñausacunapaj ñavipash pascaringami” (Isaías 35:5).

•  Huañushpa pambai tucushcacunapash causaringami (Juan 5:28, 29).

• Nipi ñana ungüihuan cangachu (Isaías 33:24).

• Cai Alpapi causaj gentecunaca ñana yarjai pasangachu (Salmo 72:16).

Cai libropa primero paginacunapi dibujocunata ricushpaca caicunaca na pactaringachu yanguipashchari. Shinapash Taita Diosca nishcami, chaicunata ñallami cai Alpapi pactachisha nishpa. Bibliapimi imashina pactachinataca yachachin.

Ashtahuanbash Bibliapica cunanbillata cushilla causangapaj imata rurana cashcatapashmi yachachin. Cunanga quiquinba llaquicunapi pensaripai. Culqui illaimanda, familiapi imapash pasashcamanda, imapash ungüihuan caimanda, pipash familiapuramanda huañushca cajpi llaquillachari cangui. Shina llaquicunahuan causajushpapash ñaupaman catichunmi Bibliaca ayudan. Cai tapuicunatapashmi ali intindichin:

• ¿Imamandata sufrinchi?

• ¿Imashinata problemacunata charishpapash ñaupaman catita ushanchi?

• Familia ucupi ¿cushilla causaita usharinllu?

• Huañushca jipaca ¿imata tucunchi?

• Huañushca familiacunata, rijsicunataca ¿ima punllapash cutin ricushunlla?

• Taita Dios tucuita pactachinataca ¿imashpata crina canchi?

 Cai librota liijushpaca, Bibliamanda yachajungapaj munashcatami ricuchingui. Cai libropica párrafo nishcacunami tian. Parrafocunapa tapuicunaca página urapimi can. Chai tapuicunami Bibliata ashtahuan ali intindichun ayudanga. Ashtaca millón gentecunaca Bibliamanda testigo de Jehovacunahuan parlashpaca cushillami sintirishca. Quiquinbash shinallata cushijushpa, Bibliamanda yachajuchunmi munanchi. Biblia imata yachachijushcata quiquin yachajushpa catijpica, Jehová Diosca ninandami bendicianga.