KEDA čitinea novina, dikhea televizija ili šunea radio, dikhea hem šunea but lošna bukja sar soj kriminal, vojne hem terorizam. Šaj tute da mučinela tu nesavo nasvalipe ili mulo tutar nekoj so mangea le.

Puč tut:

• Dali o Devel mangela mlo hem mle familijakoro životo te ovel agjaar?

• Kote te arakhav pomoš te šaj te ikljovav ko krajo me problemencar?

• Dali nekogaš ka ovel čačutno mir?

I Biblija dela amen odgovor bašo akala pučiba.

• E manušen nane poviše te ovel len dukha, nane te phujroven ili te meren (Otkrovenie 21:4)

• „O sakati ka ripinel sar eleni“ (Isaija 35:6)

• „O jakhja e korolengere ka phravgjon“ (Isaija 35:5)

•  O mule palem ka oven irame ko životo (Jovan 5:28, 29)

• Nijekh nane te ovel nasvalo (Isaija 33:24)

• Sarinen ki Phuv ka ovel len but hajbaske (Psalm 72:16)

Šaj ka misline kaj o bukja so čitingjan len ko prva strane taro akava lil tane samo suno. Ama, o Devel vetingja kaj ka kerel akala promene ki Phuv but sigate hem i Biblija vakerela amenge sar ka kerel adava.

Ama i Biblija na vakerela samo adava. Oj vakerela so valjani te džane te šaj te ove čače bahtalo hem te uživine ko tlo životo panda akana. Razmislin bašo bukja so mučinena tut. Šaj isi tut finansiska problemija, familijarna ili e sastipaja, ili palem mulo tutar nekoj so mangea le. I Biblija šaj te pomožinel tuke te ikljove ko kraj e problemencar, hem šaj te utešinel tut adalea so ka del tu odgovorija bašo pučiba sar soj akala:

• Soske cidaja muke?

• Sar te ikljova ko krajo e problemencar?

• Sar šaj te ovel amen bahtali familija?

• So ovela amencar keda meraja?

• Ka dikha li palem amare manglen so mule?

• Soske šaj te ova sigurna kaj o Devel ka kerel sa so vetingja?

 Adalea so čitinea akava lil, sikavea kaj mangea te sikljove tari Biblija. Akava lil ka pomožinel tu ko adava. Ko sekova pasus isi pučiba, kola so ka pomožinen tuke te haljove pošukar i Biblija. But manuša uživinena keda kerena lafi baši Biblija e Jehovaskere svedokoncar. Nadinaja amen kaj ka uživine tu da. O Devel neka del tut bereketija džikote čitinea so šaj te sikavel tut i Biblija!