АНДО вестникя, ки телевизия, ко радиос или ко интернети дикхес тай шунес, кай ачшон бут кханиле букя, сарто престъпления, войни тай терористична атакес. Или ащи те овел пхарипе лично туке, соскето синян насвало или соскето декхой, колес дехес, муло.

Пуч тут:

• Давкха ли мангел о Дел манге тай ме семействоске?

• Со ащи те помагинел манге те справинав ман ме проблемиенца?

• Ка овел ли декхана истинско мири?

И Библия дел амен шукар отговоря далкхе въпросиенге.

• Е манушен вече нанай те овен дукха, нанай те пхурьовен, нито те мерен (Откровение 21:4)

• „О банго ка хърпинел сар о елени“ (Исаия 35:6)

• „Е коренгере якха ка путергьон“ (Исаия 35:5)

•  О муле ка овен ириме ко животос (Йоан 5:28, 29)

• Никхой нанай те насвальовел (Исаия 33:24)

• Ка овел бут хабе саворенге ки пхув (Псалм 72:16)

Ащи те мислинес, кай о букя, колато четингян ко първа страницес калке лилесте, си сар парамиси. Ама о Дел обещингяс, кай сиго ка керел далкха букя ки пхув, тай и Библия пхенел аменге сар ов ка керел давкха.

Ама и Библия пхенел аменге авер–да букя. Латар ахальовас сар те овас щастлива тай сар те лошанас е животоске панда авдиес. Помислин хари саве букиенге хас холи. Ащи те на ресен туке о парес, те овен тут проблемя андо семейство, те овес насвало или те овел тут бари дукх ашал далкхеске, кай декхой, колес дехес, муло. И Библия ащи те помагинел туке те справинес тут далкхе проблемиенца тай те дел тут утеха, като дел тут о отговоря е въпросиенге сарто:

• Соске страдинас?

• Сар те справинас амен амаре проблемиенца?

• Ащи ли амаро семейство те овел щастливо?

• Со ачшол аменца, кана мерас?

• Дали декхана ка дикхас отново амаре енданиен тай амален, колато муле?

• Соске ащи те овас сигурна, кай о Дел ка керел саворе букя, колато обещингяс?

 Далкхестар, кай четинес кавка лил, дикхьол, кай мангес те ахальовес со сикавел и Библия. Давкха лил ка помагинел туке. Кариг о тексти иси въпрося, колато ка помагинен туке те ахальовес по–лачшес и Библия. Бут мануша лошанен те хоратинен е Библияке е Йеховаскере Свидетеленца. Дано туса–да те овел чука. Нека о Дел те благословинел тут, бискай сикльовес со ащи те сикавел тут и Библия!