KANA ginaves jekh nyevipo, dikhes o TV-vo, vaj shunes o radiovo, pe but nasulipe, pe bare maripe, thaj po terrorizmushi si vorba. Shajke, vi tut si varisosko pharipe, phenas baro nasvalo san, de vi kodo shaj, ke mulas tut varikon, kas kames.

Gindin pe kadala:

• O Del kodo kamlas, ke kado te perel manca, thaj mura familijasa?

• So shaj zhutil, ande mure problemura?

• Avla chachi pacha?

Andar e Biblia shaj zhanas kadala.

• Le manushenge chi avla majbut nasul, chi phurona thaj chi merena (Sikadyimaski 21:4)

• „Atunchi maj xuttyela o bango, sar o cherbo” (Izaiash 35:6)

• „Atunchi le korrenge jakha. . . puterdyona” (Izaiash 35:5)

•  Le mule opre ushtyona (Janosh 5:28, 29)

• Chi avla nasvalipo (Izaiash 33:24)

• Sakones avla but te xan (Asharimata 72:16)

Kodo shaj avel tyo angluno gindo, ke so anglal ginadan, feri paramichaj. De o Del kodo shinavel, ke na butara boldela kadala butya pe phuv, thaj e Biblia phenel, sar kerela.

Andar e Biblia vi kodo shaj zhanes, so trubul te keras, te shaj avas baxtale, thaj aba akanak te losshas le trajoske. Gindin pe kodo, sostar daras: lovenge thaj familijake gindura, nasvalipe, vaj kana merel varikon, kas kamas. E Biblia zhutil, te zhanas avri te avas andar kadala pharimata, thaj lashe vorbi del palpale pe kadal pushajimata:

• Sostar si nasulimo?

• Sar shaj avas avri andar pharimata?

• Sar shaj avel baxtali amari familija?

• So kerdyol amenca kana meras?

• Pale shaj dikhas kodolen, kon mule?

• Sostar patyas ande kodo, ke o Del sako andre pherdyarel, so shinadas?

 Te ginaves kadi, kodo sikavel, ke kames te zhanes, so sityarel e Biblia. Kadi ginadyi zhutil tuke ande kado. Pasha kotora vi pushajipe si, sosa majfeder hatyares e Biblia. But milliova manusha si, kon kamen te vorbisaren le Jehovaske Chache Manushenca andar e Biblia. Shajke vi pe tute chachoj. O Del te zhutil tut, kana pinzhares sosko but sityarel e Biblia!