Hi Wini Nkongometo Wa Xikwembu Nkulukumba Ha Hine?
LOKO u dondzra jornali, u hlalela TV, kumbe u yingisetela madzrungula ka radiyu, u vona u tlhela u twa madzrungula manyingi lama khanelaka hi wugevengu, tiyimpi ni lava baleselaka vhanu na va nge na nandzru. Swi nga yentxeka na wene u li ku kazratekeni hi kola ka mavabyi kumbe u feliwe hi lwe u mu zrandzraka.
Tivutise:
-
Xana hi swoleswi Xikwembu Nkulukumba a ni navelelaka swone, mine ni ndangu wanga?
-
Ni nga wu kuma kwini mpfunu wa ku langusana ni swikazratu swanga ke?
-
Xana siku dzrimbeni ku ta va ni ku zrula ka ntiyiso?
A Bibele dzri hlamula swivutiso leswi hi ndlela leyi tiyisaka nhlana.
A BIBELE DZRI DONDZRISA LESWAKU XIKWEMBU NKULUKUMBA A TA YENTXA SWIHLAMALISO LANI MISAVENI.
-
A vhanu a va nga ha ti va ni swivavu, nambi ku duhwala kumbe ku fa.—Apfuletelo 21:4
-
‘Lwe wa ku khuta a ta tlula swanga nhlangu.’—Ezaya 35:6
-
‘Mahlu ya lava ku fa mahlu ma ta pfuleka.’—Ezaya 35:5
- A vafi va ta pfuxiwa.—
-
A ku nga ha ti va ni mavabyi.—Ezaya 33:24
-
A swakuda swi ta va swinyingi.—Amapsalma 72:16
PFUNEKA HI LESWI BIBELE DZRI SWI DONDZRISAKA
Swi nabyalile ku pimisa leswaku leswi u hetaka ku swi dondzra lani henhla i milozro. Kambe Xikwembu Nkulukumba a dumbise ku hetisisa swidumbiso leswo lani misaveni, nakone a ku salanga kule. A Bibele dzri tlhamuxela leswi a taka swi yentxisa xiswone.
A Bibele dzri hi byela swimbeni. Dzri hi byela leswi hi fanelaka ku swi tiva akuva hi nyonxa hakunene hi tlhela hi tikholisa hi wutomi swoswi. Yimanyana, u pimisa hi leswi swi ku kazrataka. Ku nga ha va mali, timhaka ta ndangu, mavabyi, kumbe ku feliwa hi lweyi u mu zrandzraka. A Bibele dzri nga ku pfuna ku langusana ni swikazratu leswo, dzri tlhela dzri ku txhavelela hi tinhlamulo ta swivutiso swa ku fana ni leswi:
-
Xana siku dzrimbeni hi ta tlhela hi va vona vazrandzriwa vezru lava fiki?
-
I yini xi nga hi kholwisaka leswaku Xikwembu Nkulukumba a ta swi hetisisa swidumbiso swakwe hinkwaswu?
Leswi u dondzraka buku ledzri swi kombisa leswaku u navela ku tiva leswi a Bibele dzri swi dondzrisaka. Nakunene a buku ledzri dzri ta ku pfuna. Loko u dondzra u ta kuma leswaku a mayava ma ni swivutiso leswi taka ku pfuna ku twisisa Bibele ku yampswa. Vhanu vanyingi va swi nyonxela ku dondzra Bibele ni Timboni ta Yehovha. Ha dumba leswaku na wene u ta swi zrandzra. Ingi Yehovha a nga ku tovokisa loko u ya u gungula leswi Bibele dzri nga ku dondzrisaka swone!