TONGANA mo diko mbeti-sango, mo bâ télé wala mo mä radio, mo yeke bâ na mo yeke mä asango mingi na ndö ti sarango sioni, bira nga na tënë ti aterroriste. Peut-être mo wani mo bâ pasi ndali ti mbeni kobela wala ndali ti kuâ ti mbeni zo so mo ye lo mingi.

Hunda terê ti mo:

• A yeke ye so Nzapa aye ndali ti mbi na sewa ti mbi la?

• Na ndo wa la mbi lingbi ti wara mungo maboko ti hon ndö ti akpale ti mbi?

• Tâ siriri ayeke duti ande dä mbeni lâ?

Na ndö ti ahundango tënë so, Bible amû akiringo tënë so zo alingbi ti zia bê ti lo dä.

• Azo ayeke bâ pasi mbeni pëpe, ala yeke ga mbakoro pëpe nga ala yeke kui pëpe.​—Apocalypse 21:4

• “Azo so gere ti ala abuba ayeke huru tongana lekpa.”​—Ésaïe 35:6

• “Lê ti awaziba ayeke zi.”​—Ésaïe 35:5

•  A yeke kiri ande na azo so akui na fini.​—Jean 5:28, 29

• Zo oko ayeke tï kobela pëpe.​—Ésaïe 33:24

• Azo kue na ndö ti sese ayeke wara gbâ ti kobe ti tengo ni.​—Psaume 72:16

A yeke ngangu pëpe ti tene mo pensé so aye so mo diko na yâ ti akozo lembeti ti mbeti so ayeke gï atënë ti bango li. Me Nzapa amû zendo ti sara achangement so na ndö ti sese fafadeso, nga Bible afa na e tongana nyen la lo yeke sara ande ni.

Bible afa na e aye mingi ahon aye so. A fa na e nga aye so e yeke na bezoin ti hinga si e duti biani na ngia nga si gigi anzere na e laso. Gbu li ti mo kete na ndö ti aye so asara si mo gi bê ti mo. A lingbi ti duti tënë ti nginza, ti sewa, kpale ti seni wala kuâ ti mbeni zo so mo ye lo mingi. Bible alingbi ti mû maboko na mo ti hon ndö ti akpale so. Nga Bible alingbi ti dë bê ti mo na lege so a kiri tënë na ahundango ndo tongana:

• E yeke bâ pasi ngbanga ti nyen?

• E lingbi ti hon ndö ti akpale ti e tongana nyen?

• Sewa ti e alingbi ti duti na ngia?

• Nyen la ayeke si na e na ngoi so e kui?

• E yeke kiri ti bâ azo ti e so e ye ala so akui?

• Nyen la asara si e hinga biani so Nzapa ayeke sara ande ye kue so lo mû zendo ni?

 So mo yeke diko mbeti so afa so mo ye ti hinga ye so Bible afa. Mbeti so ayeke mû maboko na mo. Mo yeke wara ahundango ndo ti aparagraphe so ayeke mû maboko na mo ti kiri ti mä yâ ti Bible nzoni. A nzere na azo kutu mingi ti sara lisoro na ndö ti Bible na aTémoin ti Jéhovah. E ye ti tene a nzere na mo nga kue. Zia Nzapa asara tufa na ndö ti mo na ngoi so mo yeke gi ti hinga ye so Bible alingbi ti fa na mo.