GAAZEEXA nabbawatto wote, televizhiine laꞌꞌatto wote, woy raadoone macciishshatto wote jaddo, olanna hedeweelcho bala tuganno mannire laꞌꞌakkinna macciishshakki digattanno. Woy atinni xiwante qarrante noottoha woy shiiꞌroottoha ikkara dandaanno.

Togo yite hedattoha ikkara dandaanno:

• Maganu anerano miniꞌya mannirano hedinori konneeti?

• Qarraꞌya dandee heeꞌrate kaaꞌlo afiꞌreemmohu hiikkiinniiti?

• Keeru heeꞌranno yanna dagga ikka?

Qullaawu Maxaafi giddo tenne xaꞌmuwara gari dawaro afiꞌratto.

• Albillitte mannu didhiwamanno, digeedhanno, woy direyanno. —Yohaannisi Ajuuja 21:4

• “Naafichu bullichi gede kubbanno.”—Isayaasi 35:6

• “Ballootu ille laꞌanno.” —Isayaasi 35:5

•  Reyino manni kaꞌꞌanno. —Yohaannisi 5:28, 29

• Mittu manchino didhiwamanno. —Isayaasi 33:24

• Uullate aana heeꞌranno manni woꞌmunku sagale duuwanno. —Faarso 72:16

Konni maxaafira hanafote nabbawittore, ‘mulla haaqete halchooti’ yite hedoottoha ikkara dandaanno. Ikkollana Maganu muli yanna giddo tenne hexxo uullate aana wonshannota coyiꞌrino; Qullaawu Maxaafi isi tenne assanno gara kulanno.

Qullaawu Maxaafi wolereno kulannonke. Xa nafa hagiirru noo heeshsho heeꞌrate assa hasiissannonkere kulannonke. Hanni atera qarra ikkinohe coye hedi. Iillinohe qarri angate anje woy maatete qarra, dhibba woy shiiꞌro ikkitara dandiitanno. Qullaawu Maxaafi togoo qarra dandiite saꞌꞌatto gede kaaꞌlannohe; qoleno aante noo xaꞌmuwara dawaro qole sheshifatatto gede assannohe:

• Qarrammeemmohu mayiraati?

• Qarranke dandiine saꞌneemmohu hiittoonniiti?

• Maatenke hagiirru noota ikka dandiitanno?

• Reyineemmo wote hiikkineemmo?

• Shiiꞌnoommo manni ledo galagalle xaandeemmo yanna dagga ikka?

• Maganu uyino hexxo baalanta wonshanno yine addaxxineemmohu mayiraati?

 Konne maxaafa nabbawakki, Qullaawu Maxaafi roso afa hasiꞌrattota leellishshanno. Kuni maxaafi tennera kaaꞌlannohe. Qullaawu Maxaafi yaannore roore huwata dandaatto gede, guffate xaꞌmo qixxeessinoonni. Lowo miliyoone ikkanno manni Yihowa Farciꞌraasine ledo Qullaawu Maxaafire hasaawa baxanno. Atino baxatto yine hendeemmo. Qullaawu Maxaafinni maa rosattoro afate woꞌnaalatto wote Maganu maassiꞌrohe!