TE YU e leisi koranti, te yu e luku telefisi, noso te yu e arki radio, dan yu e si èn yere furu nyunsu fu ogridu, feti, nanga ogri-ati sani di sma e du fu gens tirimakti. Kande yusrefi e pina fu di yu siki noso fu di wan lobiwan fu yu dede.

Aksi yusrefi:

• Na disi Gado wani gi mi nanga mi osofamiri?

• Pe mi kan feni yepi fu lusu den problema fu mi?

• Oiti freide o de na grontapu?

Bijbel e gi krin piki tapu den aksi disi.

• Sma no o abi pen moro, den no o kon owru moro èn den no o dede moro.—Openbaring 21:4

• „Lan sma o kren leki dia.”—Yesaya 35:6

• „Den ai fu den breniwan o si.”—Yesaya 35:5

•  Den dedewan o libi baka.—Yohanes 5:28, 29

• Nowan sma o siki.—Yesaya 33:24

• Ala sma na grontapu o abi nofo nyanyan.—Psalm 72:16

A ben o makriki fu denki taki den sani di yu leisi na tapu den bladzijde na fesi, na sani di no o pasa noiti. Ma Gado pramisi taki heri esi a o tyari den kenki disi kon na grontapu, èn Bijbel e fruteri wi fa a o du dati.

Ma Bijbel e leri wi moro sani. A e leri wi san wi abi fanowdu fu de koloku trutru nownow kaba. Prakseri den broko-ede di yu abi now. Kande yu abi moni problema, kande yu abi problema na ini yu famiri, kande yu e siki, noso wan sma di yu lobi dede. Bijbel kan yepi yu nanga den problema disi èn a kan trowstu yu fu di yu e kisi piki tapu aksi soleki:

• Fu san ede wi e pina?

• San kan yepi wi nanga den problema fu wi?

• Wi kan abi wan koloku osofamiri?

• San e pasa nanga wi te wi dede?

• Wi o si den lobiwan fu wi di dede baka?

• Fu san ede wi kan de seiker taki Gado o du ala sani di a pramisi?

 A leisi di yu e leisi a buku disi, e sori taki yu wani kon sabi san Bijbel e leri. A buku disi o yepi yu. Den paragraaf abi aksi di o yepi yu fu frustan Bijbel moro bun. Milyunmilyun sma e prisiri fu studeri Bijbel nanga Yehovah Kotoigi. Wi e howpu taki yusrefi o firi so tu. Meki Gado blesi yu te yu e kon sabi san Bijbel e leri yu!