KUBOMABONAKUDZE, emsakatweni ngisho nasemaphephandzabeni tinyenti tindzaba letimbi lesitivako tekubulalana kwebantfu, tebuphekula ngisho netimphi. Nawe futsi kungenteka kukhona lokukuvisa buhlungu, mhlawumbe uyagula noma ushonelwe ngumuntfu lomtsandzako.

Tibute:

• Nguloku yini Nkulunkulu lafuna kwenteke kimi nasemndenini wami?

• Ngingalutfolaphi lusito lwekulwisana netinkinga tami?

• Kuyoke kube khona yini kuthula sibili?

LiBhayibheli lisiniketa timphendvulo letenetisako talemibuto.

• Bantfu ngeke basabuva buhlungu, ngeke baguge futsi ngeke bafe.​—Sembulo 21:4

• “Labachutako bayawusuka emagonso njengenyamatane.”​—Isaya 35:6

• ‘Emehlo etimphumphutse ayawuvuleka.’​—Isaya 35:5

•  Labafile batawuvuswa.​—Johane 5:28, 29

• Ngeke sisagula.​—Isaya 33:24

• Bonkhe bantfu batawuba nenala yekudla.​—Tihlabelelo 72:16

Kulula kucabanga kutsi ngeke tenteke letintfo locedza kutifundza. Kodvwa Nkulunkulu wetsembise kutsi masinyane utawutishintja tintfo emhlabeni, futsi liBhayibheli liyachaza kutsi utawukwenta njani loko.

LiBhayibheli aligcini ngaloko, liphindze lisitjele lesingakwenta nasifuna kujabula futsi siphile kahle nyalo. Asocabange ngetintfo letikuvisa buhlungu, kungaba tinkinga temndeni, tinkinga tetimali, kugula noma kufelwa ngumuntfu lomtsandzako. LiBhayibheli lingakusita kutsi ulwisane naletinkinga, futsi lingakudvudvuta ngekukunika timphendvulo temibuto lefana nanayi lelandzelako:

• Kungani sihlupheka?

• Yini lengasisita silwisane netinkinga?

• Kuyoke kwenteke yini kutsi umndeni wami ujabule?

• Kwentekani kitsi nasifa?

• Sitawuphindze sibabone yini bantfu lesibatsandzako labafile?

• Singetsemba njani kutsi vele Nkulunkulu utawutenta tonkhe letintfo lasetsembise tona??

 Ngekufundza lencwadzi ukhombisa kutsi uyafuna kwati kutsi yini lefundziswa liBhayibheli. Lencwadzi itakusita. Inetigaba letihambisana nemibuto letakusita ukuvisise kahle lokushiwo liBhayibheli. Bantfu labanyenti kuyabajabulisa kucoca ngalokushiwo liBhayibheli naBoFakazi BaJehova. Setsemba kutsi nawe kutakujabulisa. Shengatsi Nkulunkulu angakubusisa usafundza loko liBhayibheli lelingakufundzisa kona!