HA O bala koranta, o shebella TV kapa o mamela ditaba radiong, o utlwa ho buuwa ka dintho tse mpe tse kang bonokwane, dintwa le bokgukguni. Mohlomong le wena o na le mathata a kang ho kula kapa ho shwelwa ke motho eo o mo ratang.

O ka nna wa ipotsa:

• Na ke seo Modimo a se batlelang nna le ba lelapa la ka?

• Keng e ka nthusang ho rarolla mathata a ka?

• Na ka le leng ho tla ba le kgotso lefatsheng?

Bibele e araba dipotso tseo ka tsela e kgotsofatsang.

• Batho ha ba sa tla hlola ba utlwa bohloko, ba tsofala le ho shwa.—Tšenolo 21:4

• ‘Ya holofetseng o tla tlola jwaloka kgama.’—Esaia 35:6

• “Mahlo a difofu a tla tutuboloha.” —Esaia 35:5

•  Bafu ba tla tsoswa. —Johanne 5:28, 29

• Ha ho na motho ya tla kula. —Esaia 33:24

• Motho e mong le e mong o tla ba le dijo tse ngata. —Pesaleme ya 72:16

O ka nna wa nahana hore dintho tsena tseo o sa tswa di bala maqepheng a qalang a buka ena ke ditoro. Empa Modimo o tshepisitse hore haufinyane o tla etsa diphetoho mona lefatsheng, ebile Bibele e ya hlalosa hore na o tla di etsa jwang.

Bibele e re bolella seo re lokelang ho se tseba e le hore re thabele bophelo hona jwale. A ko nahane ka dintho tse o tshwenyang. Mohlomong o tshwenyehile ka tjhelete, mathata a lelapa, ho kula kapa ho shwelwa ke motho eo o mo ratang. Bibele e ka o thusa ho sebetsana le mathata ana ebile e ka o thusa ho utlwisisa dikarabo tsa dipotso tse latelang:

• Ke hobaneng ha re hlahelwa ke mathata?

• Re ka sebetsana jwang le mathata a rona?

• Na ho ka ba le thabo lelapeng la hao?

• Ho etsahalang ka rona ha re shwa?

• Na ka le leng re tla boela re bone batho bao re ba ratang ba seng ba hlokahetse?

• Ke hobaneng ha re kgodisehile hore Modimo o tla phethahatsa ditshepiso tsa hae?

 Taba ya hore o bala buka ena e bontsha hore o batla ho tseba hore na keng seo Bibele e se rutang. Buka ena e tla o thusa. Dirapa tsa buka ena di na le dipotso tse ka o thusang hore o utlwisise Bibele haholwanyane. Batho ba bangata ba ile ba thabela ho ithuta Bibele le Dipaki Tsa Jehova. Re tshepa hore le wena o tla thabela ho etsa jwalo. E se e ka Modimo a ka o hlohonolofatsa ha o ntse o etsa boiteko ba ho tseba hore na Bibele e re rutang!