SU TEMPONG i kau mẹ̌basa koran, mẹ̌biala televisi, arau dumaringihẹ̌ radio, i kau nakasilo dingangu nakaringihẹ̌ běke soal u karal᷊akisẹ̌, pẹ̌sasekẹ, dingangu terorisme. Aramanung i kau nasigěsạ ual᷊ingu sakị arau taumata ikẹ̌kěndagu nate.

Pẹ̌kiwal᷊ọe su watangengu:

• Apa ini kapulung Mawu gunang iạ dingangu keluargaku?

• Su apa iạ makaěbạ tul᷊umang gunang tumatěngo sigěsạ ini?

• Apa sarung piạ pẹ̌darame tutune?

Alkitapẹ̌ botonge makasimbahẹ̌ manga kakiwal᷊o ini.

• Taumata seng tawe masakị, maghurang, arau mate.​—Pělal᷊ahẹ 21:4

• ”Tau peosẹ̌ e sarung měpẹ̌paral᷊insọ kere rusa.”​—Yesaya 35:6

• ”Tau wuta e sarung makasilo.”​—Yesaya 35:5

•  Taumata nate sarung saụ ipěbiahẹ̌. —Yohanes 5:28, 29

• Tawẹ apa sarang sěngkatau masakị. —Yesaya 33:24

• Seng tawẹ apa taumata kal᷊unusang.​—Mazmurẹ̌ 72:16

Gampang mẹ̌tiněna diandi su halaman kanini tawe mariadi. Katewe Mawu nẹ̌diandi seng mal᷊ighạ mapakasěhụ kěbị diandi-Ne, kụ Alkitapẹ̌ nělahẹ kerea i Sie sarung měkoạ ene.

Katewe bal᷊inẹ kětạeng ene. Alkitapẹ̌ naul᷊ị kerea tadeạu pěbawiahi kitẹ mal᷊uasẹ̌. Kěnang pẹ̌tiněna apa makạgěnggang si kau. Ene ěndịu hal᷊ẹ̌ u roitẹ̌ arau keluarga, sakị, arau taumata ikẹ̌kěndagu nate. Alkitapẹ̌ makatul᷊ung si kau tumatěngo hal᷊ẹ̌ tamai ene dingangu makahiborẹ̌ si kau bọu sasimbahu kakiwal᷊o kere:

• Kawe nụe i kitẹ nasigěsạ?

• Kerea i kitẹ botonge tumatěngo kasasigěsạ?

• Apa iạ dingangu keluargaku botonge maral᷊uasẹ̌?

• Apa sarung mariadi su tempong i kitẹ mate?

• Apa i kitẹ botonge saụ mẹ̌sombang dingangi sire apang seng nate?

• Kawe nụe i kitẹ botonge mangimang kěbị dianding Mawu sarung mariadi?

 Su tempong nẹ̌basa bukẹ̌ ini, ene něnodẹ i kau mapulu masingkạ těntirong Alkitapẹ̌. Bukẹ̌ ini makatul᷊ung si kau. Kakiwal᷊o su paragraf, makatul᷊ung si kau makaěna mapaelẹ̌ těntirong Alkitapẹ̌. Jutane taumata mal᷊uasẹ̌ mẹ̌bawěke soal u Alkitapẹ̌ dingangu Sahiding Yehuwa. I kami lai mapulu i kau kerene. Karimạko Mawu měngal᷊amatẹ̌ ual᷊ingu i kau mapulu masingkạ Alkitapẹ̌ něněntiro apa si kau!