KINE wasoma mu ma kazeti aleembeluemo mpunda ya kyalo, kumona televizyo, ao kutuilizia radio, uli kumona ni kutuilizia mpunda ingi ya kutionua kwa mizilo, vita ao bului, bukipopoosi, ni bungipaani. Paange ni weewe ukyuziiziwe na maluele ao na kufuilua na muntu kampanda u utonene.

Iipuzie eevi:

• Eba, Leeza atonene buikazi bwane ni bwa lupua lwane bube eevi?

• Kunti napata pi bukwasi eevi kuluisia maavia aane?

• Eba, ku kyalo kwakaaluka ni mutende wa kiine?

Bibilia ili yaleeta byasuko bya kisinka ku biipuzio beebio.

• Bantu tebakonvua misa kabili, te bakakota ao kufua.​—Nfyulo 21:4

• “Kilema wakatontoka nga kasia.”​—Isaya 35:6

• “Menso akue mpofu akeezulua.”​—Isaya 35:5

• Bantu bafuile bakatuntumunua.​—Yoane 5:28, 29

• Tekuli muntu wakaluala.​—Isaya 33:24

• Kubalua umo pa kyalo wakaba ni bilio bingi.​—Malumbo 72:16

Kunti kyaba kyalengele kutontonkania nangue beelia biwakisoma ku lubali lwa 4 ni lwa 5 ni kilooto sie. Inzi, Leeza alaile kuiza kuwaamia bintu beebio pa kyalo leenusie, kabili Bibilia ili yalondolola Leeza vyali wakeeza kukita evio.

Bibilia ili yasambilizia ni binge bingi bikilile pakaako. IIi yatubuila beelia bitupalile kumana eevi tube ni nsaansa ni kusekelela buikazi buweeme leenu. Tontonkania palua bintu bili byakuemia mu maano. Paange ni nfalanga ao bintu bya mu lupua, bukose bubiipile, ao kufua kwa muntu kampanda u utonene. Bibilia kunti ya kukwasia ulwisie maavia aazo, kabili kunti yakukoselezia kupitila kwasuka biipuzio beebi:

• Juu ya ki tuli mukukyula?

• Kunti twaluisia siani maavia eetu?

• Eba, lupua lwetu kunti lwaaluka ni nsaansa?

• Ni kiki kili kyakitika musita muntu lwali wafua?

• Eba, twakabamona kabili batonua betu baafuile?

• Juu ya ki kunti twaaluka ni kisinka nangue Leeza wakakita kubalua kintu kyalaile?

 Kusoma keeki kitabu, kwalangilila nangue utonene kumana beelia bili byasambilizia Bibilia. Keeki kitabu kyakaba kukukwasia. Kunsina kuli ni biipuzio bya kila lifungu, bili kukukwasia kunvua buino Bibilia. Mamilioni a bantu, bali mukusekelela kusambilila Bibilia pamo ni Bakasininkizia Bakue Yehova. Twaswapila nangue ni weewe wakaba kukita evio. Leeza akupaale luuli mukwikwinda kumana beelia bili byasambilizia Bibilia!