ጋዜጣ ምስ እተንብብ፡ ተለቪዥን ምስ እትርኢ፡ ወይ ረድዮ ምስ እትሰምዕ፡ ብዛዕባ ዓመጻን ውግእን ግብረ ሽበራን ዚገልጽ ዜና መሊኡ እዩ። ምናልባት ንስኻ እውን ብሕማም ወይ ብሞት እተፍቅሮ ሰብ ኣመና ተጨኒቕካ ትኸውን።

ንርእስኻ ነዚ ዚስዕብ ሕቶታት ሕተታ፦

• ኣምላኽ ንዓይ ኰነ ንስድራ ቤተይ ከምዚ ኼጋጥመና ድዩ ዚደሊ፧

• ንጸገማተይ ምእንቲ ኽዋጽኣሉ ኻበይ ሓገዝ ክረክብ እኽእል፧

• ናይ ሓቂ ሰላም ይህሉ ደዀን ይኸውን፧

መጽሓፍ ቅዱስ ብዛዕባ እዚ ሕቶታት እዚ ዜዕግብ መልሲ ይህበና እዩ።

• ሰባት ኣይኪሳቐዩን፡ ኣይኪኣርጉን፡ ወይ ኣይኪሞቱን እዮም።—ራእይ 21:4

• “ሓንካስ ከም እራብ ኪሰራሰር . . . እዩ።”—ኢሳይያስ 35:6

• “ኣዒንቲ ዕዉራት ኪኽፈታ . . . እየን።”—ኢሳይያስ 35:5

• ምዉታት ኪትንስኡ እዮም።—ዮሃንስ 5:28, 29

• ዚሓምም ኣይኪህሉን እዩ።—ኢሳይያስ 33:24

• ኣብ ምድሪ ዘሎ ዅሉ ሰብ ብዙሕ ምግቢ ኺረክብ እዩ።—መዝሙር 72:16

ነቲ ኣቐዲሙ ኣብ ዚርከብ ገጻት እዛ መጽሓፍ እዚኣ ዘንበብካዮ ሓሳባት ከም ሕልሚ ጥራይ ጌርካ ኣይትርኣዮ። የግዳስ፡ ኣምላኽ ኣብ ቀረባ እዋን ነዚ ለውጥታት እዚ ኣብ ምድሪ ኸም ዚፍጽሞ ተስፋ ሂቡና እዩ፣ መጽሓፍ ቅዱስ ከኣ ኣምላኽ ከመይ ገይሩ ነዚ ኸም ዚገብሮ ይገልጸልና እዩ።

ካብ መጽሓፍ ቅዱስ እትረኽቦ ጥቕሚ ግና እዚ ጥራይ ኣይኰነን። ኣብዚ እዋን እዚ እውን ኣብ ህይወትና ናይ ሓቂ ሓጐስን ዕግበትን ብኸመይ ክንረክብ ከም እንኽእል ይነግረና እዩ። ብዛዕባ እቲ ዜሻቕለካ ነገራት እሞ ሓንሳእ ሕሰብ። ገለ ኻብኡ ገንዘብ ወይ ኵነታት ስድራ ቤትካ፡ ጥዕና ምስኣን፡ ሞት እተፍቅሮ ሰብካ ኪኸውን ይኽእል እዩ። መጽሓፍ ቅዱስ ነዚ ጸገማት እዚ ኽትዋጽኣሉ ኺሕግዘካ ይኽእል እዩ፣ ነዚ ዚስዕብ ሕቶታት ብምምላስ ከኣ ኬጸናንዓካ ይኽእል እዩ፦

• ንምንታይ እዩ መከራ ዚወርደና፧

• ንጸገማትና ብኸመይ ክንዋጽኣሉ ንኽእል፧

• ስድራ ቤትና ሕጕስቲ ኽትከውን ትኽእል ድያ፧

• ምስ ሞትና እንታይ ኢና እንኸውን፧

• ነቶም ሞይቶም ዘለዉ እነፍቅሮም ሰባት እንረኽበሉ እዋን ኪመጽእ ድዩ፧

• ኣምላኽ ንዅሉ እቲ ዘተስፈወና ተስፋታት ከም ዚፍጽሞ ኽንተኣማመን እንኽእል ስለምንታይ ኢና፧

 ነዛ መጽሓፍ እዚኣ ተንብባ ምህላውካ፡ መጽሓፍ ቅዱስ እንታይ ከም ዚምህር ክትፈልጥ ከም ዝደለኻ ዜርኢ እዩ። እዛ መጽሓፍ እዚኣ ድማ ክትሕግዘካ እያ። ነቲ ሕጡብ ጽሑፋት ዚኸውን ሕቶታት፡ ንመጽሓፍ ቅዱስ ዝያዳ ኽትርድኦ ኺሕግዘካ እዩ። ብሚልዮናት ዚቝጸሩ ሰባት ምስ ናይ የሆዋ መሰኻኽር ብዛዕባ መጽሓፍ ቅዱስ ምምይያጥ ደስ ይብሎም እዩ። ንስኻ እውን ደስ ከም ዚብለካ ተስፋ ንገብር። መጽሓፍ ቅዱስ እንታይ ከም ዚምህር ብምፍላጥ በረኸት ኣምላኽ ክትረክብ ንምነየልካ።