ETENA kadiayɛ jurnalɛ, kendayɛ televiziɔ kana kahokamɛyɛ aradiyo, wɛ mɛnaka ndo mbokaka ɛkɔndɔ efula wendana l’awui wa diakatanelo, w’ata ndo wa terɔrismɛ. Mbeyaka monga ko wɛ ekɔ lo diɛnɛ la hemɔ kɛmɔtshi kana akavusha lakiyɛ ɔmɔtshi lokayɛ ngandji.

Yambola wate:

• Onde kɛnɛ mbalanga Nzambi lo dikambo diami ndo dia nkumbo kami?

• Lende akokami ntana ekimanyielo dia ndɔshana l’ekakatanu ami?

• Onde wɔladi wa mɛtɛ wokoyala lushi lɔmɔtshi?

Bible mbishaka ekadimwelo w’eshika lo ambola asɔ.

• Anto hawotodiɛnɛ nto la kandji, ntshunda osombe kana mvɔ.—Ɛnyɛlɔ 21:4

• “Kanga etshumbe ayolembɔlembɔ oko mpele.”—Isaya 35:6

• “Washo w’akanga wa totshungu wayɔsɛna.”—Isaya 35:5

• Wanɛ wakavu wayolɔ.—Joani 5:28, 29

• Ndooko onto layotata hemɔ.—Isaya 33:24

• Onto tshɛ lele la nkɛtɛ ayonga la diangɔ dia ndɛ tshavutshavu.—Osambo 72:16

Totake esadi eto wate awui wadishayɛ lo ndjɛkɛ y’etatelo ya dibuku nɛ wekɔ tsho oko dɔ. Koko Nzambi mbakalake dia nsala etshikitanu ɛsɔ la nkɛtɛ kem’edja ndo Bible nembetshiyaka woho wayondosala dikambo sɔ.

Bible hakomɛ laasɔ ato. Tɔ totɛka kɛnɛ kahombaso mbeya dia sho monga mɛtɛ l’ɔngɛnɔngɛnɔ ndo monga la lɔsɛnɔ l’ɔlɔ oma ko kakianɛ. Ohokanyiya yema dikambo di’awui wakokiyanya. Mbeyaka monga ekondjelo ka falanga, akambo wendana la nkumbo, hemɔ kana nyɔi k’onto ɔmɔtshi lokayɛ ngandji. Bible koka kokimanyiya dia ndɔshana l’akambo asɔ ndo tɔ koka kosamba lo nkadimola lo ambola wele oko:

• Lande na kasowaso?

• Ngande wakokaso ndɔshana l’ekakatanu aso?

• Onde nkumbo kaso koka monga l’ɔngɛnɔngɛnɔ?

• Ngande wayalaso etena kavɔso?

• Onde tokɛna wakiso wa ngandji wakavu nto?

• Lande na kakokaso monga l’eshikikelo dia Nzambi ayosala kɛnɛ tshɛ kakandalake?

 Kɛnɛ kele mɛtɛ ele woho weyɛ lo mbadia dibuku nɛ mɛnyaka dia wɛ nangaka mbeya kɛnɛ ketsha Bible. Dibuku nɛ diayokokimanyiya. Edingɔ wa lɔkɔ wekɔ la ambola wayokokimanyiya dia wɛ ndeka nshihodia Bible dimɛna. Miliyɔ y’anto ngɛnangɛnaka nkɛtshanya awui wa lo Bible l’Ɛmɛnyi wa Jehowa. Sho nongamɛka dia ndo wɛ lawɔ ayɔngɛnangɛna. Nzambi akɔtshɔkɔlɛ etena kasholayɛ kɛnɛ kakoka Bible ketsha!