ASANI muŵerenga nyuzipepala, muwonere TV pamwenga muvwisiya wayilesi, mutuvwa nkhani zinandi zakukwasana ndi kuleka kuvwiya marangu, nkhondu ndipuso kubayana. Panyaki namwi musuzika chifukwa cha matenda pamwenga munthu yo mwamuyanjanga wakufwa.

Jifumbeni kuti:

• Kumbi Chiuta wakhumba kuti ini ndi banja langu tikumanengi ndi masuzu ngaviyo?

• Ndi nunkhu ko ndingasaniya chovyu kuti ndizizipizi masuzu ngo ndikumana nangu?

• Kumbi pacharu chapasi pazamuja nadi chimangu?

Bayibolu limuka umampha ukongwa mafumbu ngenanga.

• Ŵanthu azamuvwanga kuŵaŵa cha, azamukota cha pamwenga kufwa.—Chivumbuzi 21:4

• “Akupunduka azamutchimbiya nge mphoyu.”—Yesaya 35:6

• “Masu nga ŵanthu achibulumutiya ngazamujulika.”—Yesaya 35:5

•  Ŵanthu wo akufwa azamuyusika.—Yohane 5:28, 29

• Palivi yo wazamutama.—Yesaya 33:24

• Weyosi pacharu chapasi wazamuja ndi vakurya vinandi.—Sumu 72:16

Panyaki mungaŵanaŵana kuti vo mwaŵerenga pamapeji ngakwamba ndi nthanu ŵaka. Chiuta walayiza kuti wasinthengi vinthu venivi pambula kuswera ndipu Bayibolu likonkhosa mo Chiuta wazamuchitiya venivi.

Bayibolu likamba vinandi. Lititikambiya so vo tikhumbika kuchita kuti tikondwengi kweniso tije ndi umoyu wamampha pasonu panu. Aŵanaŵaniyani vinthu vo vitikufipisani mtima. Kungaŵa kusoŵa ndalama, masuzu nga mubanja, matenda kweniso panyaki munthu yo mwamuyanjanga wakufwa. Bayibolu lingakuwovyani kuti muzizipizi masuzu ngenanga ndipu lingakupembuzani mwakumuka mafumbu nge yanga:

• Ntchifukwa wuli tisuzika?

• Kumbi tingachita wuli kuti tizizipizengi masuzu ngo tikumana nangu?

• Kumbi banja lidu lingaja lalikondwa?

• Ntchinthu wuli chichitika asani munthu wafwa?

• Kumbi abali ŵidu wo akufwa tazakuŵawona so?

• Ntchifukwa wuli tikhumbika kugomeza kuti Chiuta wazamufiska vosi vo wakulayiza?

 Chifukwa chakuti muŵerenga buku ili, mulongo kuti mukhumba kuziŵa vo Bayibolu lisambiza. Buku lenili likuwovyeningi. Ndimi yeyosi ye ndi fumbu ndipu mafumbu ngenanga, ngakuwovyeningi kuti mulivwisi umampha Bayibolu. Ŵanthu mamiliyoni nganandi akondwa chifukwa asambira Bayibolu ndi Akaboni aku Yehova. Tigomeza kuti namwiso mukondwengi asani musambirengi Bayibolu. Chiuta wakutumbikeni po musambira Bayibolu!