CHIINDI nubala pepatwaambo, naa kweebela TV, naa kuswiilila murediyo, ubona naa kumvwa twaambo twiingi loko tuli atala amilandu, nkondo, alimwi akujayana! Amwi anduwe uliikukataazikana akaambo kakuchiswa naa akaambo kakufwidwa muntu nguyanda.

Libuzye kuti:

• Eezi nzizyo na Leza nzyayanda kulindime abamumpuli yangu kuti kazindichitikila?

• Nga ndilalujana kuli lugwasyo lwakuzunda mapenzi aangu?

• Kuli nikuyooba luumuno lwachoonzyo na?

IBbayibbele lipa nsandulo zikkazika moyo kumibuzyo iili boobo.

• Bantu taakwe nibachiyoomvwa machise, kuchembaala, naa kufwa.—Ciyubunuzyo 21:4

• “Cilema unooya busotauka mbuli insya.”—Isaya 35:6

• “Lino meso aaboofu ayoobononona.”—Isaya 35:5

•  Bakafwa bayooboozegwa kubuumi.—Johane 5:28, 29

• Kuchiswa takuchikabiwo pe.—Isaya 33:24

• Bantu boonse banooli munyika banooli aazilyo zyiingi.—Intembauzyo 72:16

Nchuuba kuyeeya kuti nzutabale mumapeji aali kumatalikilo abbuku eeli nziloto biyo. Pesi Leza wakasyomezya kuzoochita mabambe aayo aano aanyika lino-lino, alimwi iBbayibbele lilapandulula mbayoozichita.

IBbayibbele lyaamba ziindaawo. Litubuzya atala anzitweelede kuziba kutegwa katubotelwa alimwi katunoneezegwa mubuumi mazuba aano. Yeeya atala azintu zikupa kulibilika. Zintu eezi zilakonzya kaziswaanizya mali naa zyamumpuli, malwazi, naa kufwidwa muntu nguyanda. IBbayibbele lilakonzya kukugwasya kuti ulwane amapenzi aali boobu, alimwi lilakonzya kukuumbulizya kwiinda mukusandula mibuzyo iili mbuli yeeyi:

• Nkaamboonzi nitufwaba?

• Kujana twaazunda biyeni mapenzi eesu?

• Zilakonzeka na kuti mpuli zyesu kazibotelwa?

• Niinzi chichitika kuli ndiswe kuti twafwa?

• Kuli nituyoobabona lubo na bayandwa besu bakafwa?

• Nkaamboonzi nituli aachoonzyo chakuti Leza uyoozichita zyoonse nzyaakasyomezya?

 Kubala nkuliikuchita bbuku eeli kutondeezya kuti uyanda kuziba eezyo Bbayibbele nziliyiisya. Ibbuku eeli liyookugwasya loko. Mubbbuku eeli kuli mibuzyo yaminchali, mibuzyo eeyi iyookugwasya kuti ukalimvwisisisye kabotu iBbayibbele. Mamiliyoni aabantu bakabotelwa kwaambuzyania aBakamboni baJehova. Tusyoma kuti anduwe uyoochita oobo. Lino Leza akulongezye mbwaanga uliikuyanduula Bbayibbele nzilinga lilakuyiisya!