TAIM yu ritim niuspepa, lukim televisen, o harim redio, yu bai lukim na harim planti stori bilong pasin raskol, woa, na pasin teroris. Ating yu yet i sik o wanpela yu laikim tru em i dai na dispela i givim bikpela bel hevi long yu.

Askim yu yet:

• God i laik bai mi na famili bilong mi i stap olsem?

• Mi inap kisim helpim we bilong karim ol hevi bilong mi?

• Wanpela taim bai i kamap na i gat bel isi?

Baibel i kamapim ol gutpela bekim long ol dispela askim.

• Ol manmeri bai i no inap pilim pen gen, kamap lapun, o dai.—Revelesen 21:4

• “Ol lek nogut bai kalap olsem dia.”—Aisaia 35:6

• “Ai bilong ol aipas bai lukluk.” —Aisaia 35:5

•  Ol man i dai pinis ol bai kirap bek. —Jon 5:28, 29

• I no gat wanpela bai sik. —Aisaia 33:24

• Olgeta manmeri long graun bai i gat planti kaikai. —Song 72:16

Em i isi long yu bai kisim tingting olsem ol tok i stap long ol pes paslain long dispela ol i driman nating tasol. Tasol God i bin tok promis long kamapim ol dispela senis long graun klostu nau, na Baibel i stori long olsem wanem em bai mekim olsem.

Tasol Baibel i kamapim narapela samting tu. Em i tokim yumi long ol samting yumi mas save long en na bai yumi stap amamas tru long nau. Orait nau, inap liklik taim tingting long ol samting i save mekim yu wari. Ating yu gat hevi bilong mani, hevi insait long famili, bikpela sik, o wanpela yu laikim tru em i dai pinis. Baibel inap helpim yu long karim ol dispela hevi, na em inap helpim yu long stap bel isi long rot bilong bekim ol kain askim olsem:

• Bilong wanem yumi karim pen na hevi?

• Olsem wanem yumi ken karim ol hevi bilong yumi?

• Olsem wanem famili bilong yumi i ken i stap amamas?

• Wanem samting i painim yumi taim yumi dai?

• Bai yumi lukim gen ol famili bilong yumi i dai pinis?

• Bilong wanem yumi ken bilip tru olsem God bai truim ol tok promis bilong em?

 Nau yu ritim dispela buk na dispela i soim olsem yu laik save Baibel i tok wanem. Dispela buk bai helpim yu. I gat ol askim bilong wan wan paragraf bai helpim yu long kliagut long Baibel. Planti milion manmeri i amamas long toktok long Baibel wantaim ol Witnes Bilong Jehova. Mipela i laik bai yu tu i amamas long mekim olsem. Mipela i laik bai God i blesim yu taim yu kisim save long tok Baibel i skulim yu long en!