LOKU u lera phepha-hungu, u wona mahungu lomu ka televizawu kutani ku ma ingisela ka radu, u wona ni kuzwa zilo zo tala zi wulawulako hi wugevenga, ­tiyimpi ni terrorismo. Kuzilava wena futsi wa xaniseka hi mababyi yo kari kutani hi ku felwa hi munhu u mu ranzako.

Ti wutise lezi:

• Hi zalezi Nungungulu a ­lavako ku zi humelela mina ni maxaka ya mina ke?

• Nzi nga xi kuma kwihi xivuno xa ku lwisana ni zikarato za mina?

• Kona hi ta tshuka hiva ni kurula laha misaveni ke?

A Biblia gi hlamula ziwutiso lezi hi ndlela ya yi nene ni yo tsakisa.

• A vanhu va nga ta ha xaniseka, va nga ta ha khosahala ne kufa. — Kuvululelwa 21:⁠4

• A zilema zi ta tlula khwatsi i hlangu.” — Isaya 35:​6

• “A mahlo ya zikhumu ma ta vululiwa.” — Isaya 35:⁠5

• Lava va fileko va ta vuka. — Johani 5:​28, 29

• A vanhu va nga ta ha babya. — Isaya 33:⁠24

• A vanhu vontlhe va tava ni zakuga zo enela. — Tisimu 72:⁠16

Lezi u nga zi lera ka maphajina ma nga hunza, za olova ku alakanya lezaku a hi zilo za lisine. Kanilezi, Nungungulu i tsumbisile ku neha zilo lezo laha misaveni na ku nga hi kale, niku a Biblia ga tlhamusela lezi a to zi mahisa zona.

A Biblia kambe gi maha zo hunza lezo. Gi komba lezi hi faneleko ku maha loku hi lava ku kuma litsako ni ku hanya wutomi go tsakisa zezi. Nyimanyana u ehleketa hi zikarato za wena. A zikarato lezo, zi ngava ku vumala mali, zikarato za ngango, mababyi, kutani ku felwa hi xaka. A Biblia gi nga ku vuna ku lwisana ni zikarato lezo, niku gi nga ku nyika kurula hi ku hlamula ziwutiso zo fana ni lezi:

• Hikuyini hi xanisekako?

• Hi nga zi kotisa kuyini ku lwisana ni zikarato za wutomi?

• Hi yihi ndlela ya kuva ni ngango wo tsaka?

• Kasi loku a vanhu vafa vaya kwihi?

• A maxaka ya hina lawa ma fileko ha ha ta ma wona ke?

• Xini xi hi tiyisekisako lezaku Nungungulu i ta maha zontlhe lezi a zi tsumbisileko?

Lezi u lerako a bhuku legi zi komba lezaku u lava ku tiva lezi a Biblia gi zi gonzisako. A bhuku legi gi ta ku vuna. A tinzimana ta gona ti na ni ziwutiso zi to ku vuna ku gi zwisisa khwatsi a Biblia. A vanhu vo tala va tsaka nguvu hi ku gonza Biblia ni Timboni ta Jehova. Hi rinzela lezaku wenawu zi ta ku tsakisa. Hi xuva lezaku Nungungulu a ku katekisa laha u toya u tiva lezi a Biblia gi hi gonzisako!