PERIODIKUECHARHU, telebisionirhu, radiurhu ka Internetirhu, puru atajperakueri, uarhiperakueri ka no sési kámberakueri ambe uandasïndi. Jamberijtsï cha no sési pʼikuarherani jaka pʼamenchakua ambe jimbo o jimbokajtsï nemani uarhiranchaska.

Kurhamarhikuarhi je:

• ¿I ambesï uéjki Tata Diosï para ji ka juchiti familia?

• ¿Nani uá exentani jarhuajperata parani orhepani uérakuani uandanhiatechani?

• ¿Jaua ménisï enga pínandikua jauaka Echerirhu?

Bibliajtsïni jarhuatasïndi míteni ini ambe.

• Kʼuiripu nóteru no sési pʼikuarheraatia ni tʼarhepini ni uarhini (Jaŋaskuecha 21:4).

• “Ima enga no újka xanharani ísï tsanguaraati eska axuni ma” (Isaías 35:6).

• “Imecheri éskuecha engaksï no újka exeni, niáraatiksï éskani” (Isaías 35:5).

•  Uarhirichaksï tsíntaati (Juanu 5:28, 29).

• No nema pʼamenchaati (Isaías 33:24).

• Jauati tʼirekua para iáminduecha (Salmo 72:16).

Engajtsï arhintakia ambe enga uénani jámani jaka ini librurhu, jamberijtsï eratsejka eska solu tsánharhikua máeska, peru Tata Diosï aiatspesti eska no ióni jimbo uáka ini ambe ixú Echerirhu ka Biblia uandasïndi néna uá ini ambe.

Ístujtsïni Biblia arhisïndi ambe engachi uáka úni parachi tsípikua jingoni irekani iásï. Eratsi je imani ambe engaksïni uandanhiatajka. Jamberijtsï jatsiaka uandanhiatechani chári familia jingoni, tumina o pʼamenchakua ambe jimbo. Ojtsï jamberi kómu nitamakuarhini jaka jimbokajtsï uarhiranchaska nemani. Bibliaksïni jarhuataati orhepani uérakuani i járhati uandanhiatechani. Ka ístuksïni uáti sési pʼikuastantani, jimboka mókuantasïnga ari járhati kurhamarhikuechani:

• ¿Andichisï kómu nitamakuarhijki?

• ¿Nénachi uá orhepani uérakuani uandanhiatechani?

• ¿Ambechi uá úni para juchari familia sési irekani?

• ¿Ambechi úkuarhinchasïni engachi uarhijka?

• ¿Ménderuchi exeantaua imechani engachi uarhiranchaaka?

• ¿Andichisï uá seguru jarhani eska Tata Diosï uáka iámindu ambe enga aiatspika?

 Enga cha arhintani jaka ini libruni, arhikuekasïndi eskajtsï uékasïnga míteni ambe enga Biblia jorhentpijka. I libruksïni jarhuataati ísï úni. Para mándani párrafu, jarhastiksï kurhamarhikuecha engaksïni jarhuataaka sánderu sési kurhanguni Bibliani. Uánikua kʼuiripuechaksï tsitisïndi Bibliaeri ambe uandontskuarheni Jeobaeri testiguecha jingoni. Erokuarhisïngachi eskajtsï chájtu tsitiaka. ¡Eskaksïni Tata Diosï újchakuraaka engajtsï jánguarhintani jaka míteni ambe enga Biblia jorhentpijka!