OBWOSOMA empapura z’amakuru, okarora ha ntimbe za TV, rundi okahuliriza rediyo, orora kandi ohurra ebintu bingi ebirukukwata ha bucwi bw’ebiragiro, obulemu, hamu n’ebikorwa ebirukutiinisa. Naiwe n’osobora kuba nobonabona habw’oburwaire rundi habw’okuferwa omugonzebwa waawe.

Wekaguze:

• Binu nibyo Ruhanga yantekaniriize, nyowe n’eka yange?

• Ninkaha nambere nsobora kutunga obukoonyezi kusobora kumaraho ebizibu byange?

• Ensi enu mali eritunga obusinge bwonyini?

Baibuli egarukamu kurungi ebikaguzo binu.

• Abantu tibaligarukamu kuhurra obusaasi, kukaikura, rundi kufa.—Okusuku’rwa 21:4

• “Omulema aliguruka nkensa.”—Isaya 35:6

• “Amaiso gabafu bamaiso galiiguka.”—Isaya 35:5

•  Abafu balihumbuurwa.—Yohana 5:28, 29

• Busaho muntu aligaruka kurwara.—Isaya 33:24

• Buli muntu weena omu nsi aliba n’eby’okulya ebirukumara.—Zabuli 72:16

N’osobora kuteekereza ngu eby’osomereho ha mpapura ezirukubanza ez’akatabu kanu biri biroto buroto. Baitu Ruhanga araganiize ngu obwire obutali bwahara, n’agenda kuleeta emigisa enu omu nsi kandi Baibuli n’esoborra omulingo arukugenda kukikoramu.

Baibuli etugambira bintu bingi. Etugambira ekitusemeriire kukora kusobora kuba n’okusemere’rwa hamu n’obwomeezi oburungi omu kasumi kanu. Banza oteekereze ha bizibu eby’okira kutunga. Ibura lya sente, ebizibu by’amaka, oburwaire, rundi kufeerwa omugonzebwa waawe. Baibuli n’esobora kukukonyera kugumisiriza ebizibu binu, kandi eby’okugarukamu eby’eheereza nibisobora kukuhuumuza. Egarukamu ebikaguzo nka:

• Habwaki tubonabona?

• Nitusobora tuta kugumisiriza ebizibu byaitu?

• Eka yaitu n’esobora kubamu okusemererwa?

• Kiki ekitubaho obutufa?

• Tuligaruka turole abagonzebwa baitu abafiire?

• Habwaki nitugumya ngu Ruhanga n’aija kuhikiriza buli kintu kyona ekiyaraganiize?

 Obw’okusoma akatabu kanu nikimanyisa ngu n’ogonza kumanya Baibuli eky’eyegesa. Nikaija kukukonyera. Buli kacweka kaine ebikaguzo ebirukwija kukukonyera kweyongera kwetegereza Baibuli. Enkumi n’enkumi z’abantu omu nsi yoona basoboire kugasirwa omu kusoma Baibuli n’Abakaiso ba Yahwe. Nitunihira ngu naiwe n’oija kugasirwa omu kusoma ekitabu kinu. Nitusaba ngu Yahwe akuhe omugisa omu by’oraaba n’oyega.