KAFAI e faitau koe ki te nusipepa, onoono ki te televise, io me fakalogologo ki te letio, e lavea kae lagona ne koe a tala ki amioga ma‵sei, taua, mo amioga takafiatoa. Kāti e logo‵mae nei koe ona ko se masaki io me ko te mate atu o se tino pele telā e alofa malosi koe ki ei.

Fesili ifo ki a koe:

• E mata, tenei te mea e manako te Atua ke tupu ki a au mo toku kāiga?

• Tefea te koga ka maua ne au i ei te fesoasoani ke fa‵ki i oku fakalavelave?

• E mata, e mafai eiloa o maua te filemu tonu?

E manino ‵lei a tali e tuku mai i te Tusi Tapu ki fesili konā.

• A tino ka se toe logo‵mae, olo aka o ma‵tua, io me ‵mate.—Fakaasiga 21:4

• “A tino ‵pili ka eva e pelā mo te tia.”—Isaia 35:6

• “A mata o tino ‵kivi ka ‵kite.”—Isaia 35:5

• A tino ‵mate ka toe fakaola mai.—Ioane 5:28, 29

• Ka se toe ai se tino e masaki.—Isaia 33:24

• Ka maua ne tino katoa i te lalolagi a meakai e uke mo ‵kai.—Salamo 72:16

Ka faigofie eiloa ke fakaiku aka i tou mafaufau me i mea kolā ne faitau koe ki ei i itulau kamata o te tusi tenei ne mea sē mautinoa. Kae ko oti ne tauto mai te Atua me ka fai ne ia a fakama‵fuliga konā i te lalolagi nei i se taimi pili mai, kae e fakamatala mai i te Tusi Tapu te auala ka fai ei ne ia te mea tenā.

E uke foki a nisi mea e fakaasi mai i te Tusi Tapu. E fakamatala mai i ei a mea e ‵tau o iloa ne tatou ko te mea ke maua ne tatou te fiafia tonu i te olaga nei. Ke mānava malie, kae mafaufau ki mea kolā e manavase koe ki ei. Kāti e aofia i ei a tupe io me ko tou kāiga, masaki, io me ko te mate o se tino pele. E mafai o fesoasoani atu te Tusi Tapu ke fakafesagai koe ki fakalavelave konei, kae ko tali e maua ne koe ki fesili konei ka fakamafanafana atu eiloa ki a koe:

• Kaia e logo‵mae ei tatou?

• E fa‵ki pefea tatou i ‵tou fakalavelave?

• E mata, e mafai eiloa o fia‵fia ‵tou kāiga?

• Ne a mea e ‵tupu ki a tatou māfai ko ‵mate?

• E mata, e mafai o toe fetaui tatou mo ‵tou tino pele kolā ko ‵mate?

• Kaia e mautinoa ei i a tatou me ka fakataunu eiloa ne te Atua a mea katoa ne tauto a ia ki ei?

 A tou faitau ki te tusi tenei e fakaasi mai ei me e manako koe ke iloa ne koe a mea kolā e akoako mai i te Tusi Tapu. Ka fesoasoani atu eiloa te tusi tenei ki a koe. E isi ne fesili i palakalafa kolā ka fesoasoani atu ke malamalama faka‵lei koe i te Tusi Tapu. Ne fia‵fia te fia miliona o tino ki sautalaga faka-te-Tusi Tapu ne fai ne latou mo Molimau a Ieova. E fakamoe‵moe matou ke fai foki koe penā. Ke fakamanuia eiloa koe ne te Atua i te taimi e iloilo ei ne koe a mea kolā e akoako mai ne te Tusi Tapu ki a koe!