АМГЫ ҮЕДЕ багай медээлерни солун-сеткүүлден номчуп, радио-телевидениеден бо-ла дыңнап, көрүп турар бис. Кем-херек үүлгедиишкини, чаа-дайын болгаш терроризм делегейде дыка нептерээн! Оон аңгыда боттарывыстың хууда бергелеривис база бар. Бир-ле кижи аар аарыгдан аарып, а өскези чоок улузун чидиргенинден хилинчектенип чоруур.

Боданып көрүңер даан:

• Мээң азы мээң өг-бүлемниң хилинчектенирин Бурган күзеп турар бе?

• Бергелерни канчаар ажып эртер мен?

• Чер кырынга кажан-бир тайбың турар бе?

Библияда бо айтырыгларның харыызы бар.

• Улус моон соңгаар аарывас, кырывас база өлбес (Ажыдыышкын 21:4)

• «Аскак кижи иви ышкаш шурап эгелээр» (Исайя 35:6)

• «Согурларның караа көрүп эгелээр» (Исайя 35:5)

•  Чок апарган улус дирлип кээр (Иоанн 5:28, 29)

• Кым-даа аарывас (Исайя 33:24)

• Шупту улус тодуг-догаа чурттаар (Ырлар 71:16)

Үстүнде көргенивис чүүлдер боттанмас күзел-дир деп түңнел үндүреринче далашпаңар. Ол дээрге Бурганның аазаашкыннары болгай, оларны Ооң канчаар боттандырыптарын Библияда тайылбырлаан.

Оон артык, ам безин аас-кежиктиг бооп чурттаарынга Библия силерге дузалап болур. Акша-төгерик чедишпеске азы өг-бүлеге бергелер тургустунарга, кадыкшылыңар баксыраарга азы чоок кижиңерни чидиргеш, муңгарап чоруур чадавас силер. Ол бергелерни ажып эртеринге силерге Библия дузалаар. Оон аргалалды база тып ап болур, чүге дизе ол дыка хөй чугула айтырыгларга харыылап турар:

• Чүге бо делегейде дыка хөй каржы-бак болгаш хилинчек-човалаң барыл?

• Бергелерни канчаар ажып эртерил?

• Өг-бүлениң аас-кежиинге чүү херегил?

• Өлген улустуң байдалы кандыгыл?

• Чок апарган чоок улузувуска кажан-бир катап ужуражыр бис бе?

• Бурган шупту аазаашкыннарын күүседиптер деп чүге бүзүреп болур бис?

Бир эвес силер бо номну номчуп орар болзуңарза, Библияның чүү чүвеге өөредип турарын билип алыр күзелдиг-дир силер. Бо дузаламчы дептер силерге дузалаар.  Ында айтырыглар дузазы-биле өөредир арганы ажыглаан. Ооң ачызында библейжи өөредиглерни билип алыры силерге белен болур. Иегованың Херечилери-биле Библияны өөренип турган миллион-миллион кижилер ону дыка эки арга-дыр деп көрген. Ол арга силерниң сеткилиңерге кирер дээрзинге база идегээр-дир бис. Библияның чүү чүвеге өөредип турарын билип алыр дээш, үндүрүп турар күжениишкиннериңерни Бурган йөрээзин!