TA PERIODIKOETIK, telebision, radio sok ta Internet, spisil-o ra ya kaʼiytik notisiaetik ta swenta guerraetik, terrorismo sok te bin kʼax chopol ya spas te ants winiketike. Ma jaʼuknax-abi, repenta yakat ta kʼaxel ta wokol ta skaj chamel o ta skaj te ay machʼa laj awuʼune.

Ayniwan jich ya ajojkʼoybey aba:

• ¿Jichnixbal ya skʼan-a te Dios te ay jwokoltike?

• ¿Banti ya xjuʼ ya jta koltayel ta sitintayel te wokolile?

• ¿Yabal sta yorail te ya x-ayin lamalkʼinal ta Balumilal?

Yame jtabeytik sujtib ta Biblia.

• Te ants winiketike maba ya xmeʼel mamalubikix, maʼyukix swokolik sok maba ya xlajikix (Apocalipsis 21:4).

• «Hich ya xwihl te coxoʼ te bin utʼil haʼmal chij» (Isaías 35:6).

• «Ya xjahm sit te tsʼoʼsitetic» (Isaías 35:5).

•  Ya xchaʼkuxajik te machʼatik lajemike (Juan 5:28, 29, TNM).

• Maʼyuk machʼa ya xtsakotix ta chamel (Isaías 33:24).

• Ya x-ayin bayal weʼelil (Salmo 72:16).

Yaniwan awal te wayichilnax te bin la akʼopon ta sjajchibal te libro ini. Pero yaloj ta jamal Dios te nopol jich ya xbajt spas liʼ ta Balumilal. Te Biblia ya yalbotik te bin-utʼil ya xbajt spase.

Te Biblia jaʼnix jich ya yalbotik te bin ya skʼan ya jpastik yuʼun tseʼel koʼtantik ya xkuxinotik ta ora ini. Nopa awaʼiy jtsʼinuk te bintik ya amel awoʼtan yuʼune. Ayniwan kʼop ta afamilia, maʼyuk atakʼin o ayat ta chamel. O ayatniwan ta mel-oʼtan ta skaj te ay machʼa laj awuʼun. Te Biblia ya xjuʼ ya skoltayat ta sitintayel te wokoliletik-abi. Jaʼnix jich ya xjuʼ ya yakʼbat smukʼul awoʼtan te Biblia, melel ya yakʼbey sujtib jojkʼoyeletik jich bitʼil ini:

• ¿Bin yuʼun te ay jwokoltike?

• ¿Bin-utʼil ya xjuʼ ya jsitintaytik te wokoliletike?

• ¿Bin ya xjuʼ ya jpastik yuʼun tseʼel yoʼtan te jfamiliatike?

• ¿Aybal banti ya xbootik te kʼalal ya xlajotike?

• ¿Yabal xjuʼ ya kiltik yan buelta te machʼatik lajemik kuʼuntike?

• ¿Bin yuʼun ya schʼuun koʼtantik te ya skʼotes ta pasel Dios spisil te bin yaloje?

 Chikan ta ilel te ya akʼan ya anaʼ te bin ya yakʼ ta nopel te Bibliae, melel yakat ta skʼoponel te libro ini te ya skoltayat ta bayale. Te libro ini yichʼoj jojkʼoyeletik ta parrafoetik te ya skoltayat ta snaʼel te bin ya yal te Bibliae. Bayal millón ta tul ants winiketik smulanojik yalbeyel skʼoplal te Biblia sok te testigoetik yuʼun Jehová. Ya jkʼantik te jichuk ya apas-euke. ¡Akʼame yakʼbat bendision te Dios ta snaʼel te bin ya yakʼ jnoptik te Bibliae!