WO DE se ọbe rọ ghwa iyẹnrẹn, ni itẹlivishiọni, yẹrẹ kerhọ rẹ iredio, wọ cha mrẹ, ji nyo ikuegbe rẹ ozighi, ofovwin, kugbe ohwekufia. Ọkiọvo, wọ rioja fikirẹ ọga yẹrẹ ughwu rẹ ohwo ru wo vwo ẹguọnọ kpahen.

Nọ oma wẹn:

• Ọna yen ọhọre rẹ Ọghẹnẹ vwọ kẹ vwẹ vẹ orua mẹ?

• Tivọ me da sa mrẹ ukẹcha vwo yerin ghene ebẹnbẹn mẹ?

• A je sa mrẹ uvi rẹ ufuoma vwẹ akpọ na ọfa?

Baibol na vwẹ ẹkpahọnphiyọ ri fiotọ vwọ kẹ enọ nana.

• Ọmiaovwẹ, ọghwo yẹrẹ ughwu ra cha dia ọfa-a.—Ẹvwọphia 21:4

• “Ukpono ko pho kerẹ uzo.”—Aizaya 35:6

• “Ẹro rẹ orhuẹro ko rhie.”—Aizaya 35:5

•  A cha rhọvwọn ihwo ri ghwuru nẹ ushi rhe.—Jọn 5:28, 29

• Ohwo vuọvo rha cha muọga ọfa-a.—Aizaya 33:24

• Emu cha vọn asan eje.—Une Rẹ Ejiro 72:16

Wo se roro nẹ obo wo se kpahen vwẹ aruẹbe re ton ọbe nana phiyọ evwerhẹn ghevweghe. Ẹkẹvuọvo Ọghẹnẹ veri nẹ ọ che ru ewene yena vwẹ akpọ na kẹrẹkpẹ, Baibol na ji dje obo ro che ruo wan.

Baibol na ji vuẹ avwanre erọnvwọn efa. Ọ vuẹ avwanre oborẹ avwanre ru rere oma sa vwọ vwerhen avwanre asaọkiephana. Di roro kpahen erọnvwọn re so ẹwan kẹ wẹ tavwen. E sa dia ebẹnbẹn rẹ igho, orua, ọga, yẹrẹ ughwu rẹ ohwo ru wo vwo ẹguọnọ kpahen. Baibol na sa chọn wẹ uko vwo yerin ghene ebẹnbẹn nana, wọ je sa mrẹ uchebro vwo nẹ ẹkpahanphiyọ rẹ enọ rehẹ obotọ na:

• Diesorọ avwanre vwọ rioja?

• Mavọ yen avwanre se vwo yerin ghene ebẹnbẹn rẹ avwanre?

• Orua rẹ avwanre se vwo omavwerhovwẹn?

• Die yen phia siẹrẹ avwanre de ghwu?

• Avwanre ji sa mrẹ ihwo rẹ avwanre vwo ẹguọnọ kpahen ri ghwuru?

• Diesorọ o vwo mu avwanre ẹro nẹ Ọghẹnẹ che ru ive rọyen eje gba?

 Kidie nẹ wo se ọbe nana, ọyen odjephia nẹ wọ guọnọ riẹn obo rẹ Baibol na yonori. Ọbe nana cha chọn wẹ uko. Ẹkoreta na vwo enọ re cha chọn wẹ uko vwo vwo ẹruọ rẹ Baibol na fiotọ. Oma vwerhen iduduru rẹ ihwo ri yono Baibol na vẹ Iseri rẹ Jihova. O mu avwanre ẹro nẹ oma je cha vwerhen owẹ. E jẹ Ọghẹnẹ bruba kẹ wẹ ru wọ vwọ hiẹ guọnọ obo rẹ Baibol na ghini yono!