MUSI ni tshi vhala gurannḓa, u ṱalela thelevishini kana u thetshelesa radio, ni vhona na u pfa nga ha vhuvemu, nndwa na vhutherorisi. Khamusi ni khou pfa vhuṱungu nga nṱhani ha vhulwadze kana nga u felwa.

Ḓivhudziseni uri:

• Naa Mudzimu u ṱoḓa nṋe na muṱa wanga ri tshi tshila nga yeneyi nḓila?

• Ndi nga wana ngafhi thuso ya u sedzana na thaidzo dzanga?

• Naa hu ḓo vhuya ha vha na mulalo?

Bivhili i fhindula dzenedzo mbudziso.

• Vhathu a vha tsha ḓo pfa vhuṱungu, u vha vhalala kana u fa.—Nzumbululo 21:4

• “Muholefhali u ḓo fhufha sa ntsa.” —Yesaya 35:6

• “Vha sa vhoni vha ḓo vhona.”—Yesaya 35:5

•  Vhafu vha ḓo vuswa.—Yohane 5:28, 29

• Vhathu a vha tsha ḓo lwala. —Yesaya 33:24

• Vhathu a vha tsha ḓo ṱahelelwa nga zwiḽiwa.—Phisalema 72:16

Zwo leluwa uri ri ri vhone u nga zwe ra zwi vhala kha masiaṱari a u thoma zwi sokou vha muḽoro. Fhedzi Mudzimu o fhulufhedzisa uri u ḓo ita zwenezwo zwithu hu si kale nahone Bivhili i ṱalutshedza nḓila ine a ḓo zwi ita ngayo.

Bivhili i dovha ya ri vhudza uri ri nga wana hani dakalo ḽa vhukuma na u ḓiphina nga vhutshilo zwino. Humbulani nga ha zwine zwa ni vhilaedzisa. Ni nga vha ni tshi vhilaedziswa nga u sa vha na tshelede kana thaidzo dza muṱa, u sa vha na mutakalo wavhuḓi kana u felwa. Bivhili i nga ni thusa u sedzana na dzenedzo thaidzo nahone i nga ni khuthadza nga u fhindula mbudziso dzi tevhelaho:

• Ndi ngani ri tshi shengela?

• Ri nga sedzana hani na thaidzo?

• Ri nga vha hani na muṱa wo takalaho?

• Hu itea mini kha riṋe musi ri tshi fa?

• Ri ḓo dovha ra vhona vhafunwa vhashu vho faho?

• Ndi ngani ri tshi nga tenda uri Mudzimu u ḓo ita zwe a fhulufhedzisa?

 U vhala haṋu heyi bugu zwi sumbedza uri ni khou ṱoḓa u ḓivha zwine Bivhili ya zwi funza. Heyi bugu i ḓo ni thusa. Phara iṅwe na iṅwe i na mbudziso dzine dza ḓo ni thusa u pfesesa Bivhili. Vhathu vha dzimiḽioni vha takalela u guda Bivhili na Ṱhanzi dza Yehova. Ri fhulufhela uri na inwi ni ḓo zwi takalela. Ngavhe Mudzimu a tshi ni fhaṱutshedza musi ni tshi khou guda zwine Bivhili ya zwi funza.