OKATHI onisoma anyu ejornaale, onweha televisau, aahiiso onwiriyana raadio munniweha wala wiiwa ikrime, ikhotto ni terrorismu. Woonasa wene nyuwo munnixanka mwaha wa owereyasiwa aahiiso okhweliwa ole onimphenta anyu.

Tthiri munniikoha wira:

• Kiireke Muluku oniphavela wira kihaaweke vamosa ni emusi aka?

• Kinrowa ophwanya woowi nikhaliheryo wira kixintte mixankiho saka?

• Kiireke onookhala tthiri murettele valaponi?

Biibiliya onnaakhula makoho ala moohakalaliha.

• Atthu khanrowa owereiwaka, wuuluvala nnakhala okhwa.​—Wisupulula 21:4

• “Alipa-òtuthunya anotupha ntoko nahe”.​—Yesaya 35:6

• “Anotthukuwa maitho àlipa-òhona”.​—Yesaya 35:5

•  Alipa-ookhwa anoohihimuxiwa.​—Yohani 5:28, 29

• Khuuvo onrowa owereiwaka.​—Yesaya 33:24

• Atthu otheene valaponi anrowa okhalana yoolya yinceene.​—Esalimo 72:16

Woonasa wene nyuwo pooti wuupuwelaka wira ele esommya anyu ipaaxina soopacerya sa eliivuru ela, khahiyo ekeekhai. Masi mukupaliki wira moohipisa-va Muluku oolakela opaka marukunuxo awo valaponi, tthiri Biibiliya onnitthokiherya moota sinrowa aya wiiraneya.

Nave Biibiliya onnihimya itthu sikina. Onninleela ele enireerela ahu osuwela wira niphwanye ohakalala wekeekhai olelo-va. Nkahaya muupuwele itthu sinooxankihani. Pooti okhala othoiwa musurukhu aahiiso mixankiho sa emusi, owereyasiwa, wala okhweliwa ole onimphenta anyu. Biibiliya onoowerya wookhaliheryani oxintta mixankiho iyo, ni woomaalihani vaavo vanaakhula awe makoho ntoko ala:

• Xeeni vanihaawa ahu?

• Ninrowa oxintta sai mixankiho sahu?

• Niireke etthoko ahu enoowerya ohakalala?

• Exeeni enniiraneela nakhwa vale?

• Nnimwaaweha-tho ale anaaphenta ahu akhwiiye?

• Exeeni ennikupaliha wira Muluku onoopaka ele eleihenrya awe?

 Okhala wira munsoma eliivuru ela, eyo enooniherya wira munniphavela osuwela ele Biibiliya onniixuttiha awe. Tthiri eliivuru ela enimookhaliheryani. Nwehe wira iparagrafo sookhalana makoho anrowa wookhaliheryani omwiiwexexa saana Biibiliya. Atthu imilyau sinceene annisiveliwa othokorerya myaha sa Biibiliya ni Anamoona a Yehova. Ninnikupali wira nyuwo-tho munoosiveliwa. Nto Muluku onimooreelihani vaavo vanithokorerya anyu ele Biibiliya onwiixuttihaweni!