KON nagbabasa ka hin dyaryo, nagkikita hin TV, o namamati ha radyo, nakakakita ngan nakakabati ka hin damu nga balita mahitungod hin krimen, girra, ngan terorismo. Bangin ikaw mismo nag-aantos tungod hin sakit o kamatayi hin hinigugma.

Pakianhi an imo kalugaringon:

• Ini ba an karuyag han Dios para ha akon ngan ha akon pamilya?

• Diin ako makakaagi hin bulig basi makaya ko an akon mga problema?

• Magkakaada pa ba tinuod nga kamurayawan?

An Biblia may makakombinse nga baton hito nga mga pakiana.

• An mga tawo diri na makakaeksperyensya hin kasakit, diri na malalagas, o mamamatay.​—Pahayag 21:4

• “An piay malukso pariho han bugsok.”​—Isaias 35:6

• “Mapupukrat an mga mata han mga buta.”​—Isaias 35:5

•  Mabubuhi utro an mga patay.​—Juan 5:28, 29

• Waray na magkakasakit.​—Isaias 33:24

• An ngatanan ha tuna magkakaada damu nga pagkaon.​—Salmo 72:16

Masayon la hunahunaon nga an imo nabasa ha siyahan nga pipira nga pahina hini nga libro usa la nga inop. Pero nagsasaad an Dios nga diri na mag-iiha papahinaboon niya ito nga mga pagbag-o ha tuna, ngan iginsasaysay han Biblia kon paonan-o niya ito bubuhaton.

Diri la ito an iginsusumat han Biblia. Nagsusumat liwat ito ha aton kon ano an kinahanglan naton mahibaroan basi magin tinuod nga malipayon ngan kontento yana. Hunahunaa kadali an imo mga ginkakabarak-an. Bangin upod hini an mga butang nga may kalabotan ha kwarta o pamilya, diri maopay nga kahimsog, o kamatayi hin hinigugma. An Biblia makakabulig ha imo nga makaya ini nga mga problema, ngan makakaliaw ito ha imo pinaagi ha pagbaton han mga pakiana nga sugad hini:

• Kay ano nga nag-aantos kita?

• Paonan-o naton makakaya an aton mga problema?

• Puydi ba magin malipayon an aton pamilya?

• Ano an mahitatabo ha aton kon mamatay kita?

• Makikita pa ba naton utro an aton namatay na nga mga hinigugma?

• Kay ano nga makakasarig kita nga tutumanon han Dios an ngatanan nga iya iginsaad?

 An imo pagbasa hini nga libro nagpapakita nga karuyag mo mahibaroan an igintututdo han Biblia. Mabubuligan ka hini nga libro. May mga pakiana para ha mga parapo, nga mabulig ha imo nga mas masabtan an Biblia. Minilyon nga tawo an nalilipay nga pag-istoryahan an mahitungod ha Biblia kaupod an mga Saksi ni Jehova. Naglalaom kami nga malilipay ka liwat. Hinaot bendisyonan ka han Dios samtang nahibabaroan mo kon ano an igintututdo ha imo han Biblia!