WHEN you read newspaper, look television, or listen to radio, you go see and hear about people wey them de fight, thief and destroy things. E fit be say you de suffer because you de sick or person wey you love don die.

Ask yourself say:

• Na so God want make e happen for me and my family?

• Which place I fit get help for my problems?

• We go ever get peace?

The correct answer for all this question dey for inside Bible.

• People no go de feel pain, they no go old, or die.​—Revelation 21:4

• “Person wey e no fit waka go jump like deer.”​—Isaiah 35:6

• “Blind person go de see.”​—Isaiah 35:5

•  People wey they don die go wake up.​—John 5:28, 29

• People no go de sick again.​—Isaiah 33:24

• Everybody go get food and they go chop belleful.​—Psalm 72:16

You fit de think say the things wey you don read for page 4 and 5 na just story. But God don promise say small time, e go do all this things for the earth, and Bible talk how e go do-am.

Bible still talk other things. E tell us things wey go really make us dey happy and enjoy life now. Just think about the things wey you de worry about. E fit be problem for your family, money problem, you fit de sick, or maybe your person don die. Bible fit help you manage all this problem, and e fit cool your heart as you de see the answers for questions like:

• Why we de suffer?

• How we fit cope when we get problem?

• Our family fit dey happy?

• Wetin de happen for person wey e die?

• We fit ever see our people wey don die again?

• Why we fit dey sure say God go do all the things wey e don promise us?

 As you de read this book, e show say you really want know the things wey Bible de teach. This book go help you. The paragraphs get questions wey go help you understand Bible well. Plenty people de enjoy-am as them de study Bible with Jehovah Witness. We know say you go enjoy-am too. Make God bless you as you de learn the things wey Bible fit teach you!