HO MO ageda waraga apangbanga ni, watadu ka bi terevizioni, na ho mo agia apangbanga ni rogo radio, mo na bi watadu mo nagia dungu gbegberẽ apangbanga wa gu nga pa kuondiko, avura, watadu pa gu vura nga ga abamoi. Si rengbe kadu nga mo narungo arungo be kaza watadu gu boro mo akpinyemuni ima kpi.

Mo sananga tiro nga:

• Ya mo gere nga gupai Mbori aidaha tipa re na gimi aborokporo?

• Wari rengbe mi ka gbia undo ni tipa ka diabe gimi kpakaraapai?

• Ya mo boro ndikidi zereda aduho?

Baibiri nafu wene akaragapai kuti agi asanahe re.

• He ho nika sa aboro i igirã, i gbinza watadu ka kpi berewe te.—Yugoti 21:4

• “Terengeterenge aboro agúka wa ngbiimo.”—Yesaya 35:6

• “Bangiri airavurari azá.”—Yesaya 35:5

•  Kpikpi aboro araka araka berewe.—Yoane 5:28, 29

• Boro ho nika woka berewe te.—Yesaya 33:24

• Aboro dunduko auru kpotosende nika du na riahe beyo kpaima tipa ka rihe.—Atambuahe 72:16

Si ima rengba kadu taata mo berẽ gupai nga agu apai mo nagedihe rogo agi akpewaraga re gbua nga kungbo pa musumo. Ono Mbori kidohe tipa ka manga agu aˈariapai re auru kpotosende ane barambeda, na Baibiri nayugo wai ko nika mangaha.

Baibiri nayugo kura apai susi gure. Si nagumba gupai furani si aida ani inihe tipa ka gbia ndikidi ngbarago na ka raka wene raka awere. Mo dinga bete regbo ka berãkurii agu apai ninaasa ro mo naabaka bangiro. Gere ima rengba ka kodapa marã watadu agu apai nabipa aborokporo, zanga du kpotose wenengai, watadu pa kpio gu boro mo akpinyemu ni. Baibiri ima rengba ka undoro mo dibe agu akpakarapai re, na si ima rengba ka fu wasa foro ho si akaragapai ni kuti agu asanahe du wa gere:

• Tipagine ani arungo ti ni?

• Wai du rengbe ani ka diabe gaani akpakarapai?

• Ya mo gaani aborokporo rengbe ka du na ngbarago?

• Ginipai ni naamanga rani ho ani akpi ni?

• Ya mo ani abi gu gaani aboro naima kpiko berewe?

• Tipagine rengbe ani ka du na gu kido ti ni nga Mbori nika manga agu apai amanga dunduko ko nakidohe tipaha re?

 Gu rengo nga mo nageda gi buku re nayugo gupai nga mo naida ka ino gupai Baibiri ayugoho. Gi buku re nika undoro aundo. Asanahe kina yo tipa agenewaraga, nga gu nika undoro tipa mo ini Baibiri wenengai. Amirioni aboro aima gbia ngbarago ti wisigo Baibiri na aDezire Yekova. Ani na gu kido nga mo nika gbia ngbarago agbia a. Mbori funga maku afu foro wa mo aˈasada ka ino gupai rengbe Baibiri ka yugoho foro!