1, 2. Ba’hang Lai Siangtho pen Pasian hong piak a lungluthuai letsong khat ahi hiam?

NA lawm in letsong khat hong piak ciang bangci ngaihsut na hiam? Na hon ding na ngaklah mahmah ding a, na lawm in nang hong phawk lam na theih ciang nuam ding hi teh. Tua letsong tungtawnin ama tungah lungdam ding hi teh.

² Lai Siangtho pen Pasian hong piak letsong khat ahi hi. Tua laibu in koi mahah i muhzawh loh thute hong theisak hi. Gentehna, Pasian in van le lei, a masa pen numei le pasal a bawlna thu hong gen hi. I nuntakna-ah haksatnate i tuak ciang hong huh thei ding lamlahnate zong hong pia hi. Pasian in leitung pen a hoihzaw-in bawl ding cih ama ngimna hong tangtun dan ding zong Lai Siangtho sungah i sin ding hi. Lai Siangtho pen tua banga a lungluthuai letsong ahi hi!

3. Lai Siangtho na sin leh bang thu thei ding na hiam?

³ Lai Siangtho na sin zui-in Pasian in a lawm dingin nang hong deih ahihlam mukhia ding hi teh. Pasian thu na sin toto leh na kilawmtakna uh hong khang semsem ding hi.

4. Lai Siangtho tawh kisai-in na lungsim hong la pen bang a hiam?

⁴ Lai Siangtho pen kampau nam 2,600 kiim tawh kiletkhia khin a, bu awn tul tampi kikhen khia khin hi. Leitung a, mi 100-ah 90 val in amau kampau ciat tawh Lai Siangtho sim theita uh hi. Tua banah mi awn tampi in kal simin Lai Siangtho ngahta uh hi. Hi mah hi, Lai Siangtho tawh a kibang laibu dang khat zong om lo hi.

5. Lai Siangtho pen “Pasian lamlahna tawh a hong kipia” hi cih ba’hang gen thei ihi hiam?

 ⁵ Lai Siangtho pen “Pasian lamlahna tawh a hong kipia hi.” (2 Timoti 3:16 Sim in.) Ahih hang mi pawlkhat in ‘Lai Siangtho pen mihingte’ at hi a, Pasian kiang pan koici hi thei ding?’ ci-in ngaihsun thei uh hi. Lai Siangtho in: “Kha Siangtho sawlna tawh Pasian kiang panin a hong pai thute a kigen ahi zaw hi” ci-in gen hi. (2 Peter 1:21) Tua pen mihau pa khatin ama nasem Secretary kiang thu genin lai a atsak tawh kibang hi. Tua lai ii thunei pen kua hi ding hiam? Mihau pa hi. A nasem Secretary hilo hi. Tua dan mahin Lai Siangtho Thunei pa pen Pasian hi, lai at dinga a sawl mite hilo hi. Pasian in ama ngaihsutnate a at dingin na lamlak hi. Lai Siangtho pen  “Pasian thu” taktak ahi hi.—1 Thesalonika 2:13; A Nunga Ciaptehna 2en in.

6, 7. Lai Siangtho sunga thute anung le amai kituak hi cih ba’hang gen thei ihi hiam?

⁶ Lai Siangtho a ki-at a kipan a kizawh dong kum 1,600 val sawt hi. Lai Siangtho atte a nuntak hun uh kibanglo hi. Pawlkhat in pilna nei a, pawlkhat in nei lo hi. Gentehna, mi khat pen siavuan hi. A dangte pen lo kho mi, nga bengte, tuu cingte, kamsangte, thukhente, kumpite ahi uh hi. Lai Siangtho atte mi a kibat loh uh hang Lai Siangtho sunga thute a vekin kituak hi. Mun khatah a gen thu khat pen a mun dangah a tuam khatin gen cih omlo hi. *

⁷ Lai Siangtho sunga laibu masa penah leitung haksatnate a kipatna thu hong gen a, a nunung pen laibu-ah Pasian in leitung pen paradais in hong bawlsak kikna tawh tua haksatnate beisak ding ci hi. Lai Siangtho in kum tampi sunga mihingte tangthu na huam a, Pasian ngimna a tawntungin a tangtung denna zong hong gen hi.

8. Lai Siangtho pen Science pilna tawh a kituakna gentehna pia in.

⁸ Lai Siangtho pen Science pilna hilh nading ahih kei leh sang lai simbu banga a ki-at laibu hilo hi. Ahih hang Science pilna tawh kisai a gente na man tawntung hi. Pasian kiang pan hong pai laibu pen tua bang mah dingin lamen hilo ihi hiam. Gentehna, Israel mite’n a kilawh thei natna a kilawh loh nading a sep dan ding uh Pasian in a thuhilhna Siampi Laibu sungah na om hi. Tua pen mite’n Bacteria le Virus lungnote in natna hong ngahsak thei cih a theih ma pekin na kigelh khin hi. Leitung pen bangmah in len loin kikhai hi ci-in Lai Siangtho in mantakin hong hilh hi. (Job 26:7) Mi tampi in leitung pen peek hi ci  a, a up lai-un Lai Siangtho in beem hi na ci hi.—Isaiah 40:22, NW.

9. Migi a, a thuman Lai Siangtho atte in bang thu i tel nading hong huh uh a hiam?

⁹ Lai Siangtho in khang tangthu a gente a tawntungin na man hi. Ahih hang tangthu laibu a tamzaw pen na mankhin lo hi. Ba’hang hiam cih leh a at te’n a manin na gelh lo uh hi. Gentehna, galdona-ah amau minamte ii guallelhna thu gelh nuam lo uh hi. Amau tawh kibang loin Lai Siangtho atte in Israel mi te’n gal a lelh uh hang a manin na gelh veve uh hi. Lai Siangtho atte in amau khialhnate zong na at uh hi. Gentehna, Moses in khialhna lianpi khat bawlkha a, tua hangin Pasian in a taiina thu Gamlak Vakna laibu sungah hong theisak hi. (Gamlak Vakna 20:2-12) Hih migi te’n a at uh Lai Siangtho pen Pasian kiang pan ahihlam hong lak uh hi. Tua ahih manin Lai Siangtho pen i muang thei hi.

10. Lai Siangtho thuhilhnate in ba’hang tu hun i nuntakna hong huh thei a hiam?

¹⁰ Lai Siangtho pen “Pasian lamlahna tawh a hong kipia hi a, thuman thutak hilh nading, a khialte taii nading, a man lote a manin puah nading” ahi hi. (2 Timoti 3:16) Tua ahi a, Lai Siangtho thuhilhnate in tu hunin zong hong huh thei hi. Ei hong kibawl dan Jehovah in thei ahih manin i lungsim le i ngaihsutnate thei hi. Ei le ei i kitheih sangin ama’n hong theizaw a, zong hong lungnuamsak nuam hi. Ei ading bang hoih a, bang hoih lo cih ama’n thei hi.

11, 12. (a) Matthai a lian 5 pan a lian 7 ah Jesuh in a hoih mahmah bang thute hilh a hiam? (b) Lai Siangtho sung pan adang bang thute sin thei lai ihi hiam?

¹¹ Matthai a lian 5 pan a lian 7 sungah Jesuh in a gen; lungnopna koici ngah thei ding, mite tawh koici kilem  theih ding, thunget dan ding le sumlepai tung man takin i muh theih nading a hoih mahmah thuhilhnate i sim thei hi. Hih thuhilhnate tuma kum 2,000 lai-in a gen ahih hang tu hun dongin manpha-in hong huh thei hi.

¹² Lai Siangtho sungah innkuan nuntakna a hoih zawk nading, nasep a thanuam mi le mite tawh kilem taka om theih nading hong huh thei thuzungte zong Jehovah in hong hilh hi. Ei kua ihi a, koikoi-ah i om a, haksatna bangbang i nei zongin Lai Siangtho thuzungte in a tawntungin hong huh thei hi.—Isaiah 48:17 Sim in; A Nunga Ciaptehna 3 en in.

13. Isaiah in Babylon khuapi tunga thupiang dingte bang genkhol a hiam?

¹³ Lai Siangtho genkholh thu tampi tangtung khin takpi hi. Gentehna, Isaiah in Babylon a kisuksiat ding thu na genkhol hi. (Isaiah 13:19) Khuapi koi bangin kilazo ding hiam cih kician takin na gen hi. Khuapi pen kulhkongpite le gun in na dal hi. Ahih hang Isaiah in kongkhakte honsa-in na om dinga guntui kang ding hi ci-in genkhol hi. A sim dingte in galdo kul loin khuapi la zo ding hi. Isaiah in Babylon khuapi a la zo ding pa min pen Sairas hi ci-in zong na genkhol hi.—Isaiah 44:27–45:2 Sim in; A Nunga Ciaptehna 4 en in.

14, 15. Isaiah ii thu genkholhte koi bangin tangtung takpi hiam?

¹⁴ Tua genkholhna a ki-at zawh kum 200 hong tun ciang galkapte hong tungin Babylon a sim dingin kiging khinta uh hi. Galkapte a makai pa kua ahi hiam? A kigenkholh mah bangin Persia kumpi Sairas hi. Genkholhna a dangte zong hong tangtung takpi hi.

¹⁵ A kisim ni zanin Babylon mite in pawipi na bawl uh hi. Guntui le kulhpite in amau dal ahih manin  lungmuang takin om uh hi. Khuapi pualamah Sairas le a galkapte in guntui a kiam nading tuilam to-in heikhia uh hi. Persia galkapte kantan zawh ding ciang tui a kiam khit teh gun kantan suak uh hi. Ahih hang galkapte in Babylon kulhpi koici kan zawh ding? A kigenkholh mah bangin kulhpi kongkhak honsa-in na om a, tua ahih manin galkapte in galsim kul loin a khuapi la zo uh hi.

16. (a) Babylon khuapi ii mailam thu ding Isaiah in bang genkhol a hiam? (b) Isaiah ii genkholhnate hong tangtung takpi cih en’ koici theih ihi hiam?

 ¹⁶ Isaiah in Babylon khuapi-ah mi kuamah teng ngei nawn lo ding hi ci-in zong na genkhol hi. Ama’n: “Khang tawntungin tua lai-ah kuamah teng lo ding a, tua lai-ah kuamah om ngei nawn lo ding hi” ci hi. (Isaiah 13:20) Tua pen hong tangtung takpi maw? Tu huna Iraq gam Baghdad khuataw lam tai 50 kiimah a kisusia Babylon khua lui kimu thei hi. Tu hunin zong kuamah teng lo hi. Jehovah in Babylon khuapi “siatna [ahih kei leh suksiatna] munphiah tawh” phiatkhia siang hi.—Isaiah 14:22, 23. *

17. Pasian kamciam khempeuh ba’hang muang thei ihi hiam?

¹⁷ Lai Siangtho genkholh thu tampi hong tangtunna in mailam thu tawh kisai Lai Siangtho gennate i muang thei hi. Jehovah in leitung pen paradais in hong bawlsak ding a cih ama kamciam kipsak ding hi cih i muang thei hi.  (Gamlak Vakna 23:19 Sim in.) “Thuzuau a gen ngei lo Pasian in tangtawng pekin thu hong ciam . . . nuntak tawntungna” i lamen hi.—Titus 1:2. *

18. Paul in “Pasian thu” tawh kisai bang hong hilh hiam?

¹⁸ Lai Siangtho tawh a kibang laibu dang om lo hi cih i sin khin hi. Anung le amai kituakin Science pilna tawh kisai ahi zong, mihing tangthute a gen ciang kicianin a tawntungin man hi. Ei ading a hoihpen thuhilhnate zong hong pia-in a tangtung khinsa Lai Siangtho genkholhna tampi zong kihel hi. Lai Siangtho in tua sangin hong hilh beh lai hi. Sawltak Paul in: “Pasian thu nungta-in a gamtang hi,” ci hi. Tua a cihnopna in bang hiam?—Hebru 4:12 Sim in.

19, 20. (a) Nang le nang na kisittel theih nading Lai Siangtho in koi bangin hong huh thei a hiam? (b) Letsonga hong kipia Lai Siangtho tung na lungdamna koici lah ding na hiam?

¹⁹ Lai Siangtho in na nuntakna kikhelsak thei hi. Nang le nang na kisittel theih nading hong huh thei hi. Na ngaihsutnate le na lungsim tawnga omte na theih nading zong hong huh ding hi. Gentehna, Pasian a it mah kisa khathei hi hang. Ahih hang amah i it lam i lah nadingin Lai Siangtho gente i zuih ding kisam hi.

²⁰ Lai Siangtho pen Pasian hong piak takpi laibu hi. Pasian in tua laibu sim a, na kan ding le na it ding deih hi. Hih letsong tung lungdam inla na sin suak in. Tua hileh mihingte ading Pasian ngimna na theitel ding hi. A zom khenpi-ah tua Pasian ngimna tawh kisai a kicingin i sin ding hi.