1, 2. ¿Chucoch miʼ mejlel la cʌl chaʼan jiñi Biblia jumpʼejlʌch utsʼatax bʌ lac majtan?

¿BAJCHEʼ yubil maʼ wubin cheʼ juntiquil a wamigo miʼ yʌqʼueñet jumpʼejl a majtan? Tajol ti orajach a wom a jam. Wen tijicñayet cheʼ jiñi a wamigo tsiʼ cʼajtesayet, i maʼ suben wocolix i yʌlʌ.

² Jiñi Biblia jumpʼejlʌch utsʼatax bʌ lac majtan chʼoyol bʌ ti Dios. Maʼañic yambʌ baqui miʼ mejlel lac taj muʼ bʌ i yʌl. Miʼ subeñonla chaʼan Dios tsiʼ mele (pʌtʌ) jiñi panchan yicʼot Pañimil, cheʼ jaʼel tsiʼ mele jiñi ñaxam bʌ wiñic yicʼot xʼixic. Jiñi Biblia miʼ chʼʌm tilel ticʼojel tac muʼ bʌ i coltañonla cheʼ an lac wocol. Cheʼ jaʼel, miʼ yʌl chaʼan Dios yom i sujtesan ti utsʼatax bʌ ajñibʌl ili Pañimil yicʼot miʼ tsictesan bajcheʼ mi caj i mel.

3. ¿Chuqui mi caj a cʌn cheʼ maʼ wen pejcan jiñi Biblia?

³ Cheʼ maʼ wen pejcan jiñi Biblia, mi caj a cʌn chaʼan Dios yom maʼ sujtel tiʼ yamigo. Cheʼ bʌ maʼ ñumen cʌn majlel, ñumen lʌcʼʌl mi caj a wubin a bʌ tiʼ tojlel.

4. ¿Chuqui maʼ ñumen mulan ti jiñi muʼ bʌ i yʌjlel chaʼan jiñi Biblia?

⁴ Jiñi Biblia ñumeñix ti 3,200 tʼan tac i chaʼlentel ti traducir yicʼot tsaʼix wen chaʼlenti ti imprimir. Yonlel wiñicob xʼixicob (quixtañujob) tiʼ pejtelel pañimil miʼ mejlel i pejcañob tiʼ tʼan. Ti jujumpʼejl semana ñumen ti jumpʼejl millón miʼ pujquel. Tiʼ sujm, maʼañic yambʌ libro bajcheʼ jiñi Biblia.

5. ¿Chuqui yom i yʌl cheʼ «chʼoyol ti Dios» jiñi Biblia?

 ⁵ Jiñi Biblia «chʼoyol ti Dios» (pejcan 2 Timoteo 3:16). Pero tajol an majqui miʼ yʌl: «Mi wiñicob tiʼ tsʼijbuyob jiñi Biblia, ¿bajcheʼ an i sujmlel cheʼ chʼoyol ti Dios?». Jiñi Biblia miʼ yʌl: «Winicob ñijcʌbiloʼ bʌ i chaʼan Chʼujul bʌ Espíritu tsiʼ chaʼ subuyob chuqui tsiʼ yubiyob ti Dios» (2 Pedro 1:21). ¿Bajcheʼ an cheʼ ñijcʌbilob ti Dios? Miʼ mejlel lac ñaʼtan chaʼan lajal bajcheʼ juntiquil tatuchʌl muʼ bʌ i suben i buts (mam) chaʼan miʼ tsʼijbun jumpʼejl carta. ¿Majqui i chaʼan jiñi jun? I chaʼañʌch jiñi tatuchʌl. Cheʼʌch miʼ yujtel yicʼot jiñi Biblia, chʼoyolʌch ti Dios, mach yaʼic ti jiñi wiñicob tsaʼ bʌ i cʼʌñʌ chaʼan miʼ tsʼijbuñob. Miʼ mejlel la cʌl chaʼan jiñi Biblia jiñʌch i «tʼan Dios» (1 Tesalonicenses 2:13; qʼuele jiñi nota 2).

6, 7. ¿Chucoch miʼ mejlel la cʌl chaʼan jiñi Biblia maʼañic miʼ jatsʼ i bʌ tiʼ tʼan?

⁶ Cheʼ bʌ tsaʼ tejchi ti tsʼijbuntel jiñi Biblia cʼʌlʌl tsaʼ ujti, tsaʼ jalʼa ñumen ti 1,600 jab. Cheʼ jaʼel, jiñi tsaʼ bʌ i tsʼijbuyob qʼuexel tac baqui ora tsaʼ chumleyob. An tsajñiyoʼ bʌ ti escuela yicʼot an maʼañic bʌ. Jumpʼejl ejemplo, an juntiquil doctor bʌ, an xcholejeloʼ bʌ, xchuc chʌyob, xcʌnta tiñʌmeʼob, xʼaltʼañob, juezob yicʼot reyob. Anquese cheʼ bajcheʼ jiñi, jiñi Biblia maʼañic miʼ jatsʼ i bʌ tiʼ tʼan, junsujm jach chuqui miʼ yʌl tiʼ tejchibal cʼʌlʌl tiʼ yujtibal. *

⁷ Jiñi ñaxan tac bʌ capítulo yaʼ ti Biblia miʼ tsictesan bajcheʼ tsaʼ tejchi wocol ila ti pañimil (mulawil). I yaʼ ti cojix tac bʌ capítulo miʼ subeñonla bajcheʼ mi caj i tojʼesan Dios jiñi wocol tac i mi caj i sujtesan ti paraíso ili Pañimil. Jiñi Biblia miʼ taj ti tʼan cabʌl mil jab bajcheʼ tsiʼ teche chumtʌl jiñi quixtañujob yicʼot miʼ pʌs chaʼan Dios tiʼ pejtelel ora miʼ tsʼʌctesan i tʼan.

8. ¿Chuqui ti ejemplo miʼ pʌs chaʼan tojʌch jiñi Biblia cheʼ miʼ taj ti tʼan i chaʼan bʌ ciencia?

⁸ Jiñi Biblia maʼañic tsaʼ tsʼijbunti chaʼan miʼ pʌs i chaʼan bʌ ciencia, mi chaʼañic miʼ cʼʌjñel ti escuela. Pero tojʌch cheʼ bʌ miʼ taj ti tʼan i chaʼan bʌ ciencia. Jiñʌch la com bʌ ti jumpʼejl libro tilem bʌ ti Dios. Jumpʼejl ejemplo, jiñi libro i chaʼan Levítico miʼ tsictesan chuqui tsiʼ yʌlʌ Dios chaʼan yom miʼ melob (chaʼleñob) jiñi israelob chaʼan maʼañic miʼ pam pujquel jiñi cʼamʌjel tac. Iliyi añix ora wʌn albil cheʼ bʌ tsaʼ caji ti ñaʼtʌntel baqui miʼ  tilel jiñi cʼamʌjel tac. Jiñi Biblia tojʌch jaʼel cheʼ miʼ yʌl chaʼan ili Lum maʼañic baqui chucul (Job 26:7).

9. ¿Chuqui miʼ pʌs cheʼ jiñi tsaʼ bʌ i tsʼijbuyob jiñi Biblia tsaʼʌch i luʼ alʌyob i sujmlel?

⁹ Cheʼ bʌ jiñi Biblia miʼ yʌl tsaʼ bʌ ujti ti wajali, tojʌch tiʼ pejtelel ora jaʼel. Pero cabʌl libro i chaʼan bʌ historia mach cheʼiqui come jiñi tsaʼ bʌ i tsʼijbuyob maʼañic tsiʼ luʼ alʌyob i sujmlel. Jumpʼejl ejemplo, maʼañic tsiʼ luʼ tsʼijbuyob cheʼ bʌ jiñi i tejclumob tiʼ sʌtʌyob jiñi guerra tac. Pero jiñi tsaʼ bʌ i tsʼijbuyob Biblia tsaʼʌch i luʼ alʌyob i sujmlel anquese jiñi tejclum Israel tiʼ sʌtʌyob jiñi guerra tac. Cheʼ jaʼel, tiʼ tsʼijbuyob jiñi i sajtemal. Jumpʼejl ejemplo, jiñi rey David tiʼ tsʼijbu yaʼ ti Salmo 51 chaʼan tsiʼ mele tsʌts bʌ mulil tac. Cheʼ bʌ jiñi xtsʼijbaya bibliajob tsaʼʌch i yʌlʌyob i sujmlel miʼ pʌs chaʼan chʼoyolʌch ti Dios yicʼot miʼ mejlel lac ñopben i tʼan.

10. ¿Chucoch muʼto i bej coltañonla jiñi ticʼojel tac am bʌ ti Biblia?

¹⁰ Jiñi Biblia chʼoyolʌch ti Dios yicʼot «an i cʼʌjñibal ti cʌntesa chaʼan lac ticʼol, yicʼot chaʼan lac tojʼesʌntel, chaʼan mi lac mel chuqui toj» (2 Timoteo 3:16). Jiñi i ticʼojel tac muʼto i wen coltañonla ili ora come tilem ti Jehová. Yujil pejtelel chuqui mi lac ñaʼtan yicʼot bajcheʼ yubil mi la cubin lac bʌ come jin tsiʼ meleyonla. Ñumen i cʌñʌyonla bajcheʼ joñonla i yom chaʼan tijicñayonla. Yujil chuqui wem bʌ chaʼañonla yicʼot mach bʌ cheʼiqui.

11, 12. ¿Baqui bʌ ticʼojel tac mi lac taj yaʼ ti Biblia?

¹¹ Yaʼ ti Mateo capítulo 5 cʼʌlʌl ti 7 mi lac taj wem bʌ ticʼojel tac. Jesús miʼ subeñonla bajcheʼ miʼ mejlel lac taj lac tijicñʌyel, bajcheʼ mi lac mejlel ti ajñel ti wen la quicʼot yambʌlob, bajcheʼ yom mi lac mel oración yicʼot  bajcheʼ yilal yom mi laj qʼuel jiñi taqʼuin. Anquese añix cheʼ bʌ 2,000 jab i yʌlʌ Jesús jiñi, muʼto i wen coltañonla jiñi ticʼojel tac.

¹² Yaʼ ti Biblia mi lac taj jaʼel principio tac muʼ bʌ i coltañonla chaʼan ñumen wen mi la cajñel ti lac familia, chaʼan wen mi lac mel la queʼtel (troñel) yicʼot chaʼan ñʌchʼʌl mi la cajñel la quicʼot yambʌlob. Jiñi principio tac miʼ mejlel i coltañonla tiʼ pejtelel ora, mach yʌlʌyic majquiyonla, baqui chumulonla mi jiñicto chuqui ti wocol tac an lac chaʼan (pejcan Isaías 48:17; qʼuele jiñi nota 3).

13. ¿Chuqui tsiʼ wʌn alʌ Isaías chaʼan jiñi tejclum Babilonia?

¹³ An cabʌl profecía tac yaʼ ti Biblia tsaʼix bʌ tsʼʌctiyi. Jumpʼejl ejemplo, Jehová tsiʼ yʌlʌ tiʼ tojlel jiñi xʼaltʼan Isaías chaʼan jiñi tejclum Babilonia mi caj i chʼʌjmel yicʼot tsiʼ wʌn alʌ bajcheʼ mi caj i yujtel (Isaías 13:19). Jiñi tejclum wen mʌcʌl ti colem tac bʌ puerta yicʼot joyol ti colem jaʼ. Isaías tsiʼ wʌn alʌ chaʼan jiñi colem jaʼ mi caj i tiquin yicʼot chaʼan jamʌl mi caj i cʌytʌl jiñi puerta tac. Tsiʼ wʌn alʌ jaʼel chaʼan maʼañic mi caj i chaʼleñob guerra jiñi muʼ bʌ caj i chʼʌmob yicʼot chaʼan jiñi muʼ bʌ caj i chʼʌm jiñi tejclum jiñʌch Ciro (pejcan Isaías 44:27-45:2; qʼuele jiñi nota 4).

14, 15. ¿Bajcheʼ tsaʼ tsʼʌctiyi jiñi profecía i chaʼan Isaías?

¹⁴ Cheʼ ñumeñix 200 jab i tsʼijbu Isaías jiñi profecía, cabʌl soldadojob tsaʼ cʼotiyob yaʼ ti Babilonia chaʼan miʼ yochelob i chʼʌm. ¿Majqui i yumob? Jiñʌch jiñi rey i chaʼan Persia i cʼabaʼ Ciro, cheʼʌch bajcheʼ tsaʼ ajli yaʼ ti profecía. ¿Pero mucʼʌch ba caj i mejlel i chʼʌmob jiñi i soldadojob Ciro jiñi Babilonia cheʼ bajcheʼ tsaʼ wʌn ajli?

 ¹⁵ Cheʼ bʌ jiñi soldadojob tsaʼ ochiyob yaʼ ti tejclum, jiñi babiloniojob woli (yʌquel) i melob qʼuiñijel. Come jiñi tejclum joyol ti jaʼ yicʼot wen tsʼajquibil, maʼañobic i bʌqʼuen. Pero jiñi rey Ciro yicʼot i soldadojob tsiʼ jambeyob i bijlel jiñi jaʼ i cheʼ bʌ juʼbeñix, jiñi soldadojob tsaʼ mejliyob ti ñumel. ¿I bajcheʼ tsiʼ cʼaxtesayob  i tsʼajquil jiñi tejclum? Cheʼ bajcheʼ tsaʼ wʌn ajli, jamʌl tsaʼ cʌyle i tiʼ jiñi tejclum. Jin chaʼan, jiñi soldadojob mach cʼʌñʌlic tsiʼ chaʼleyob guerra chaʼan miʼ chʼʌmob tiʼ wenta.

16. a) ¿Chuqui mi caj i chaʼlen Babilonia tsiʼ wʌn alʌ Isaías? b) ¿Bajcheʼ la cujil chaʼan tsaʼʌch tsʼʌctiyi tsaʼ bʌ i wʌn alʌ?

¹⁶ Isaías tsiʼ wʌn alʌ chaʼan maʼañix majqui mi caj i chumtʌl ti Babilonia. Tiʼ tsʼijbu: «Maʼanix miʼ cajelob ti chʌn chumtʌlob winicob» (Isaías 13:20). ¿Tsaʼ baʼ tsʼʌctiyi? Tsaʼcu. Babilonia yaʼan ti Irak, tiʼ tʼejl jiñi tejclum Bagdad. Ili ora, xajlel jachix mi lac wen taj laj qʼuel, maʼañic majqui chumul. Cheʼ bajcheʼ miʼ yʌl jiñi Biblia, Jehová tsiʼ cʼʌñʌ ‹i misujib chaʼan miʼ jisan› Babilonia (Isaías 14:22, 23, TNM).

17. ¿Chucoch miʼ mejlel lac ñop pejtelel albil bʌ i chaʼan Dios?

¹⁷ An cabʌl profecía yaʼ ti Biblia tsaʼix bʌ tsʼʌctiyi. Jin chaʼan, mucʼʌch i mejlel lac ñop muʼ bʌ i yʌl chaʼan jiñi talto bʌ qʼuin. Jiñi albil bʌ i chaʼan Jehová chaʼan ili Pañimil mi caj i sujtel ti jumpʼejl paraíso miʼ mejlel lac  ñop chaʼan mi caj i tsʼʌctiyel (pejcan Números 23:19). Dios miʼ subeñonla chaʼan mi lac mejlel ti chumtʌl tiʼ pejtelel ora, i «mach [...] yujilic lot» (Tito 1:2). *

18. ¿Chuqui tsiʼ yʌlʌ jiñi apóstol Pablo chaʼan «i tʼan Dios»?

¹⁸ Tsaʼix a cʌñʌ chaʼan jiñi Biblia mach lajalic bajcheʼ yan tac bʌ libro. Maʼañic miʼ contrajin i bʌ tiʼ tʼan, i cheʼ miʼ yʌl i chaʼan bʌ ciencia yicʼot chuqui tac ujtem, toj pejtelel chuqui miʼ yʌl. Cheʼ jaʼel, miʼ yʌcʼ wen tac bʌ ticʼojel yicʼot miʼ yʌl profecía tac tsʼʌctiyemix bʌ. Pero mach cojach jiñi. Jiñi apóstol Pablo tiʼ tsʼijbu: «Cuxul i tʼan Dios. Wen pʼʌtʌl» (pejcan Hebreos 4:12).

19, 20. a) ¿Bajcheʼ miʼ mejlel i coltañet a cʌn a bʌ jiñi Biblia? b) ¿Bajcheʼ miʼ mejlel a pʌs chaʼan mucʼʌch a wʌqʼuen wocolix i yʌlʌ Dios chaʼan jiñi Biblia?

¹⁹ Jiñi Biblia miʼ mejlel i qʼuextan a cuxtʌlel. Miʼ mejlel i coltañet a cʌn a bʌ. ¿Bajcheʼ? Miʼ mejlel i coltañet a chʼʌmben i sujm chuqui maʼ ñaʼtan yicʼot bajcheʼ yubil maʼ wubin a bʌ. Jumpʼejl ejemplo, tajol mi lac ñaʼtan chaʼan mucʼʌch laj cʼuxbin Dios. Pero chaʼan mi lac pʌs chaʼan cheʼʌchi, yom mi lac jacʼ chuqui miʼ yʌl jiñi Biblia.

²⁰ Wen tsiquil chaʼan chʼoyolʌch ti Dios jiñi Biblia. I yom chaʼan jatet maʼ pejcan, maʼ wen tsajin yicʼot maʼ cʼuxbin. Pʌsʌ chaʼan maʼ wʌqʼuen wocolix i yʌlʌ Dios chaʼan ili majtañʌl. ¿Bajcheʼ? Pejcan ti bele ora jiñi Biblia. Cheʼ bajcheʼ jiñi mi caj a chʼʌmben i sujm chuqui yom Dios chaʼañonla. Yaʼ ti yambʌ capítulo mi caj lac ñumen cʌn chaʼan iliyi.