ESURA YA 2
Ebiblia, chitabu chirhengerere emwa Mungu
1, 2. Bulagurhe Ebiblia luli luhembo lwinja bwenene lurhengerere emwa Mungu?
OBE NKA WAWAZA: gurhe wakachiyunva nka mwira wawe amakulerhera oluhembo? Wanasima bulala akuyibukire. Wanamubwira koko. Kandi, wanayunva enyorha y’okufungula ehy’akuhaga.
2 Ebiblia luli luhembo lurhengerere emwa Mungu. Omu Biblia, rhunayiga bintu binene rhurhakayiga ahandi hantu. Omufano, enarhuyigiriza oku Mungu alemere embingu, egulu, omulume n’omukazi b’oburhanzi. Enarhuha empanulo z’okurhurhabala amango rhuherhe ebibazo. Ebiblia enarhuyigiriza oku Mungu aherhe omuhigo g’okuhindamula egulu libe paradizo. Enaderhere gurhe nj’abikola. Ebiblia luli luhembo lwinja bwenene!
3. Bichi wamenya omu kuyiga Ebiblia?
3 Omu kuyiga Ebiblia, wamenya oku Mungu asimire obe mwira wage. Ok’oliwagenderera kumumenya, ku n’obwira bwawe haguma naye bwakomera.
4. Bichi obwene bisomezwe kuyerekera Ebiblia?
4 Ebiblia yatafusiribwe omu ndimi zirhalwise 2 800. Emiliyare ye Biblia zachapirwe. Hofi ngasi muntu (9 kwe 10) akayisoma omu lulimi lwage. Ngasi boso, bantu banene ku muliyoni muguma banapata Ebiblia! Okuderha okuli, nta chindi chitabu chili kuguma ne Biblia.
5. Bichi birhuyemezeze oku Ebiblia “yayerekezwaga na Mungu?”
5 Ebiblia “yayandikiswaga na Mungu.” (Osome 2 Timoteo 3:16.) (Olole amahugulo ma 2, bukurasa bwa 207). S’aliko bantu baguma banaderha ntya: ‘Ebiblia yayandikwaga n’abantu. Bulagurhe rhwakaja rhwaderha oku yarhengaga emwa Mungu?’ Ebiblia ederhere ntya: “Abantu baderhaga ahali ha Mungu, nk’oku bayerekezwaga n’eroho lichesibwa.” (2 Petro 1:21) Kunali nk’ok’omuzere akabwira omunjukulu amuyandikire amaruba. Amola maruba rhwakaderha okumande? M’oyola muzere, arhali m’omunjukulu. Konakuguma, Ebiblia yarhengaga emwa Mungu, arhali emw’abantu bayiyandikaga. Ayerekezaga abola bantu bayandike amawazo mage. Nantyo, Ebiblia “guli mwazi gwa Mungu.”—1 Watesalonike 2:13.
Biblia—Tafsiri ya Ulimwengu Mupya ebonekene mu ndimi zinene
EBIBLIA EBA Y’OKULI
6, 7. Bulagurhe rhwakaderha okwe Biblia erhachishubanganya?
6 Haligerere myaka erhalwise 1 600, eye Biblia eli yayandikwa. Abayiyandikaga barhalilamire bihe biguma. Baguma balisomere bwenene, abandi nanga. Muguma mubo aliri munganga. Abandi baliri bahinzi, bashana, bangeri, balebi, bazuzi n’abami. Chiro akaba Ebiblia yayandikwaga na bantu banene, erhachishubanganya; erhaderha mwazi muguma hanola, ahandi yanagulahira. *
7 Esura z’oburhanzi z’Ebiblia, ziderhere gurhe ebibazo byarhonderaga oku gulu. Ez’obuzinda nazo, ziyerekene gurhe Mungu amala ebibazo byoshi n’okuhindamula egulu libe paradizo. Kurhenga mira, ey’Ebiblia enabala engani z’abantu. Eyerekene oku Mungu anayeneza byoshi alonzeze kukola.
8. Ebiblia eba y’okuli amango eli yaderha oku biyerekere esiyanse si? Lerha emifano.
8 Ebiblia erhayandikwaga mpu y’eyigiriza eby’esiyanse. S’aliko eyi yaderha oku bilolere esiyanse, eba ey’eli y’okuli. Biyunvikene, bulala yarhengaga emwa Mungu. Omufano, omu chitabu ch’Abene Lawi rhubona mw’amarhegeko abaizraeli bakakulikire y’endwala zirhabayahukira. N’obola echola chitabu chayandikwaga mira embere rhuyunve okw’emikrobe n’evirisi, binalerha endwala. Kandi Ebiblia enaba y’okuli amango yamaderha okw’egulu lirhahanikirwe ku chintu. (Yobu 26:7) Haligerere myaka minene ey’abantu banawaza okw’egulu liba lilambukire. S’aliko Ebiblia yaliyaderhere okw’egulu liba muviringo.—Isaya 40:22.
9. Abayandikaga Ebiblia baliri banihirwa si? Bichi ebyola biyerekene?
9 Byoshi Ebiblia enaderha oku bilolere engani, biba by’okuli. Bitabu binene by’engani bijira mazabyo manene, bulala ababiyandikaga barhaliderhere okuli koshi. Omufano, barhayandikaga okw’echihugo chabo chalihimirwe. Abantu bayandikaga Ebiblia bowe baliderhere okuli koshi. Amango abaizraeli baliri bahimwa, barhaliri babisha. Banaliderhere eju y’amagosa mabo. Omufano, omu chitabu cha Hesabu, Musa aderhere oku Mungu ali muhanire oku magosa mage. (Hesabu 20:2-12) Abantu bayandikaga Ebiblia baliri banihirwa, bye biyerekene oku chili chitabu chirhengerere emwa Mungu. K’okuderha oku rhukwanene okuyemera ebye Biblia ederhere.
CHITABU CH’EMPANULO ZINENE ZINJA
10. Bulagurhe empanulo ze Biblia zirhuherhere akamaro?
10 Empanulo ze Biblia zirhuherhere akamaro kanene. Ebiblia “yayerekezwaga na Mungu enaherhe akamaro k’okuyigiriza, okuhana, okuheba ebintu oku musitari.” (2 Timoteo 3:16) Yehova ab’amenyere gurhe rhulemerwe. Ayinji ebirhuwaza n’okuntu rhunachiyunva. Yehova ab’arhuyinji kulusha okurhwenyine rhuchiyinji. Anasimire rhugwarhe obusime. K’okuderha okw’abamenyere ebyakarhusimisa n’ebyakarhugayisa.
11, 12. a) Mpanulo zihe za Yesu rhunashimana omu Matayo sura ya 5 kugera oku ya 7? b) Makanuni mahe rhunashimana omu Biblia?
11 Omu Matayo sura ya 5 kugera oku ya 7, Yesu arhuhere empanulo zinja. Arhubwirire gurhe rhwakagwarha obusime, gurhe rhwakalama n’abandi, gurhe rhwakasalira na gurhe rhwakagwarha amawazo makwirire eju y’efuranga. Hamagera myaka 2 000 ahanire ezola mpanulo, s’aliko zinachiherhe akamaro kugera mu zinola siku.
12 Omu Biblia, Yehova ashubire kurhuha amakanuni; (olole amahugulo ma 3, bukurasa bwa 207). Amola makanuni makarhurhabala yi rhugwarha emilala eherhe obusime, gurhe rhwakakola emilimo na gurhe rhwakalama bwinja n’abandi. Marhuherhere enyungu chiro akaba okuntu rhwakaba rhuli, aharhulamire changwa ebibazo rhuherhe.—Osome Isaya 48:17.
WAKAYEMERA AMALEBI ME BIBLIA
Isaya, mulume muguma omu bayandikaga Ebiblia, alimenyeseze oku Ebabiloni yakahimirwe
13. Nk’oku Isaya anaderhaga, bichi byakahikire Ebabiloni?
13 Malebi manene Me Bbiblia mayenere; (olole amahugulo ma 4, bukurasa bwa 208). Omufano, Isaya alebaga okw’evile ye Babiloni nji yahimwa. (Isaya 13:19) Anaderha nka gurhe. Eyola vile yaliherhe emilango mizibuzibu, yanalizungulukirwe n’olwinji lunene. S’aliko, eyola milango yakayorhere echingwirwe n’olola lwinji lwakabere hofi kuyuma. Abasoda bakahikire omu vile buzira kulwa. Isaya anashuba kuderha ok’omulume oyirikirwe Koreshi ye wakahimire Ebabiloni.—Osome Isaya 44:27–45:2.
14, 15. Gurhe obulebi bwa Isaya bwaliyinjire kuyenera?
14 Enyuma ya myaka 200 obola bulebi buyandikirwe, abasoda bayinja kulwisa Ebabiloni. Inde waliri mukulu w’abola basoda? Koreshi mwami we Perse. K’okuderha ok’obulebi bwaliri bw’okuli. Abasoda ba Koreshi bakahikire omu Babiloni nk’ok’obulebi bwanaderhaga si?
15 Obudufu bw’entambala, abantu be Babiloni baliri omu lusiku lukulu. Baliyinji oku balangirwe bulala evile yabo yalizungulukirwe n’olupango lukomere bwenene n’olwinji lunene. Nantyo, Koreshi n’abasoda bage baliri bahabusa olwinji embuga y’evile. N’okola, abasoda bagera omu lwinji n’amagulu. Aliko si, gurhe bakagerere omu vile n’obola yalizungulukirwe n’olupango lukomere? Nkok’obulebi bwalibwaderhere, emilango y’evile erhalichingirwe. Abola basoda bayinja kuhima evile buzira kulwa.
16. a) Bichi Isaya aliderhere oku bilolere Ebabiloni? b) Obulebi bwa Isaya bwaliyenere si?
16 Kandi Isaya alimenyeseze oku nta lusiku omuntu n’omuguma akachilamire Ebabiloni. Aliyandikire ntya: “Harhakachi lamwa.” (Isaya 13:20) Ebyola byaliyenere si? Nechi. Evile ye Babiloni yayorhere biguka. Ebyola biguka biba omu Iraki, hofi bilometre 80 eshishi ye Bagidade. Na nta muntu oba alamireyo. Yehova ahyagire Ebabiloni “N’ebibizo [emihyagizo] by’okuharabisa.”—Isaya 14:22, 23. *
Ebiguka bye Babiloni
17. Bichi byakarhuma rhwayemera ebilagane bya Mungu?
17 Malebi manene me Biblia mayenere. Biyerekene oku rhukwanene kuyemera ebye Biblia ederhere eju y’esiku zayinja. Rhukwanene okuyemera oku Yehova nj’ayeneza echilagane chage ch’okuhindamula egulu libe paradizo. (Osome Hesabu 23:19.) Rhukwanene rhunihire okupata “akalamo k’esiku n’amango [kalamo karhaherhe buzinda], Mungu orhaderha bubeshi arhulaganyize.”—Tito 1:2. *
EBIBLIA YAKAHINDAMULA AKALAMO KAWE
18. Bichi Paulo aliderhere oku bilolere “omwazi gwa Mungu”?
18 Rhwayunvirhe oku nta chindi chitabu chili kuguma ne Biblia. Erha chishubanganya. Eyi yaderha oku bilolere esiyanse changwa engani, enaba ey’eli yaderha okuli. Enahana empanulo zikwirire. Eyunjulirene amalebi mayeneraga mira. Aliko Ebiblia eshubire somezwa omu yindi njira. Entumwa Paulo yaliyandikire ntya: “Omwazi gwa Mungu gulamire, gunaherhe emisi.” Bichi ebyola biderhere?—Osome Waebrania 4:12.
19, 20. a) Gurhe Ebiblia yakakurhabala ochimenye bwinja? b) Nka gurhe wakayerekana ok’osimisizwe n’Ebiblia?
19 Ebiblia yakahindamula akalamo kawe. Yakakurhabala omenye oli muntu muchi. Yakakurhabala omenye ebili omu bwenge bwawe n’ebili omu murhima gwawe. Omufano, nkabaga rhunawaza oku rhusima Mungu. S’aliko, yi bibonekana oku rhumusima, rhukwanene okukolesa ebye Biblia ederhere.
20 Okuderha okuli, Ebiblia chiba chitabu chirhengerere emwa Mungu. Mungu arhuhemere rhuchisome, rhuchiyige rhunachisime. Oyerekane ok’osimisizwe n’olola luhembo, omu kugenderera kuyiyiga. Nantyo, nji wamenya omuhigo gwa Mungu oku bantu. Omu sura ekulikireho, nji rhwabiganirira oku bunene.
^ mus. 6 Bantu baguma banaderha okw’Ebiblia enachishubanganya, s’aliko burhali bukweri. Olole esura ya 7 y’echitabu Biblia—Neno la Mungu au la Binadamu? chayandikwaga na Bahamirizi ba Yehova.
^ mus. 16 Akaba osimire omenye binene oku bilolere amalebi me Biblia, osome obukurasa bwa 252 kugera ku 253 bw’echitabu Étude perspicace des Écritures, volume 1, chayandikwaga na Bahamirizi ba Yehova.
^ mus. 17 Obulebi bulolere okuharabiswa kwe Babiloni, buli buguma omu malebi me Biblia mayenere. Amahugulo ma 5, bukurasa bwa 208, maderhere oku malebi malolere Yesu Kristu.
