1, 2. Ongwaye Ombeibela tji i ri otjiyandjewa otjinyaṋukise okuza ku Mukuru?

EPANGA roye esuverua tji re ku etere otjiyandjewa ngunda au hi ya undjira ko, u kara noumune uṋe? Mape ya oha wombo okutjipaturura, nove mape ya okara nonyuṋe tjinene kutja epanga roye re ripurire kove. Nove mo tja okuhepa ku ye.

² Ombeibela otjiyandjewa okuza ku Mukuru. Oyo i tu raera oviṋa mbi tu hina atja tu vi tjiwa momuano warwe. Okutara kotjihorera, oyo i tu raera kutja Mukuru ongwa uta eyuru nehi, omurumendu nomukazendu omutenga. Ombeibela i tu pa omirari mbi tu vatera okutjinda omauzeu wetu. Mu yo tu rihonga ohunga nomuano Mukuru mbu ma kayenenisa ondando ye yokueta ozongaro ozombwa kombanda yehi. Tjiri, Ombeibela otjiyandjewa otjinyaṋukise!

3. Ovikeṋa mbi mo katjiwa otja tji mo rihongo Ombeibela?

³ Otja tji mo rihongo Ombeibela, mo kamuna kutja Mukuru u vanga kutja u rire epanga re. Otja tji mo rihongo ovingi ohunga na ye, oupanga woye kuna ye opu mau kurire ko.

4. Otjikeṋa tji tji ku tjatera ohunga nOmbeibela?

⁴ Ombeibela ya torokwa momaraka ape 2 600 nu pa pirindwa Ozombeibela omangete omengi. Ovandu mbe ri kombanda yozoperesende 90 mouye ve yenena okulesa Ombeibela meraka rawo oveni. Ovandu vokombanda engete, ve muna Ombeibela motjivike atjihe! Tjiri, kape nembo rarwe ndi mari sasanekwa nOmbeibela.

5. Ongwaye tji matu yenene okutja Ombeibela ya “tjangwa nombatero yOmbepo yaNdjambi”?

 ⁵ Ombeibela “ya tjangwa nombatero yOmbepo yaNdjambi.” (Lesa 2 Timoteus 3:16.) Posi yokutja ovandu tjiva mape ya ave ripura kutja, ‘Ombeibela hapo ya za vi ku Mukuru ngunda aya tjangwa i ovandu tjimuna eṱe?’ Ombeibela mai tja: “Ovandu iyave hingwa i Ombepo Ondjapuke, tjiyave hungire ombuze ndja zire ku Ndjambi.” (2 Petrus 1:21) Ihi tja sana notjiuru tjoskole tji tja tjangisa orutuu komutjangerepo woskole. Ouṋe ngwa tjanga orutuu ndwo? Otjiuru tjoskole, nungwari kamutjangerepo. Momuano otjingewo, Ombeibela embo nda za ku Mukuru nungwari kai zire ku imba mba ungurisiwa okuitjanga. Mukuru we ve hinga kutja ve tjange ouripura we. Ombeibela tjiri “embo raNdjambi.”—1 Ovatesalonika 2:13; Tara kOmambo wokehi 2.

6, 7. Ongwaye tji matu yenene okutja omatjangwa wOmbeibela ye hitasana?

⁶ Ombeibela ya tjangwa moure wozombura zokombanda 1 600. Ovatjange vOmbeibela kave hupire moruveze rumwe. Tjiva va ri ovahongwandu nu varwe kava ri ovandu mba hongwa. Okutara kotjihorera, omutjange umwe wari onganga. Varwe vari ovaṱuta, ovapate vomahundju, ovarise, ovaprofete, ovapangure nozombara. Nandarire kutja Ombeibela ya tjangwa i ovandu pekepeke, oviṋa mbi va tjanga vi hitasana. Oyo kai hungire oviṋa mbi vetasana otjiuru. *

⁷ Omakondwa omatenga wOmbeibela ye kahurura kutja omauzeu wovandu ya uta vi, nu inga omasenina ye raisa kutja Mukuru me yekuzengurura vi omauzeu ngo mokutjita kutja ehi arihe ri rire oparadisa. Oure wozombura omayovi omengi Ombeibela i hungira ohunga nomakuruhungi wovandu nu i rasia kutja Mukuru aruhe u yenenisa ondando ye.

8. Yandja ovihorera mbi mavi raisa kutja Ombeibela i nouatjiri tji twe ya koviṋa vyounongonone.

⁸ Ombeibela kai tjangerwe kutja i tu honge ohunga nounongonone, posi yokutja tji twe ya koviṋa mbi mavi tjama ohunga nounongonone, Ombeibela i nouatjiri. Ihi ootjiṋa tji matu sokuundjira kembo nda za ku Mukuru. Okutara kotjihorera, embo raLevitikus ri nomirari vyaMukuru kOvaisrael ohunga nomiano vyokutjaera omitjise omihwange. Oviṋa mbi vya tjangerwe rukuru ngunda ovandu ave  hiya tjiwa kutja omitjise vi etwa iye. Ombeibela wina i honga oukahu kutja ehi ra rekarekisiwa kombanda yopoṋa pu pe ri tjo.—Job 26:7.

9. Ouatjiri wovatjange vOmbeibela mau tu hongo tjike?

⁹ Indu Ombeibela tji mai hungire ohunga nomakuruhungi, oyo aruhe i hungira ouatjiri. Nungwari omambo omengi womakuruhungi kaye nouatjiri, orondu ovatjange kave nouatjiri. Okutara kotjihorera, owo popengi kaave tjanga ohunga novikando otjiwaṋa tjawo tji tja haverwa movita. Posi yokutja, ovatjange vOmbeibela va ri nouatjiri nandarire indu Israel tji tja havererwe movita. Owo wina va tjanga ohunga nozondataiziro zawo oveni. Okutara kotjihorera, membo rOmbeibela raNumeri, omutjange wembo ndo, Moses, wa tjanga ohunga nondataiziro ye omuini Mukuru ndje mu verera. (Numeri 20:2-12) Omuano ovatjange vOmbeibela mu vari nouatjiri u raisa kutja oyo ya za ku Mukuru. Ihi matji hee kutja matu yenene okukara nongamburiro mOmbeibela.

10. Ongwaye omirari vyOmbeibela tji mavi yenene okutuvatera ndino?

¹⁰ Ombeibela ya tjangwa nombatero yombepo yaMukuru, oyo i “nonḓengu onene yokuhonga ouatjiri . . . nokuvyura ozondataiziro, nokukuna ongarero osemba.” (2 Timoteus 3:16) Omirari vyOmbeibela mavi yenene okutuvatera ndino. Jehova u tjiwa kutja twa ungurwa pu tjike, okutja eye u tjiwa omuano mbu tu ripura noumune mbu tu na wo. Eye u tu tjiwa okukapita eṱe oveni, nu u vanga kutja tu rire ovaṋingandu. Eye u tjiwa kutja ovikeṋa mbi ri oviwa ku eṱe nokutja ovikeṋa mbi ri ovivi ku eṱe.

11, 12. (a) Omirari viṋe omiwa Jesus mbya hungirira ko mu Mateus ekondwa 5 nga ko 7? (b) Ovikwaye vyarwe mbi matu yenene okurihonga mOmbeibela?

¹¹ Mu Mateus ekondwa 5 nga ko 7, mu nomirari omiwa Jesus mbya yandja ohunga nokukara nouṋingandu,  omuano wokukara nomaunguriro omawa wakumwe na varwe, omuano wokukumba noumune mbu matu sokukara na wo ohunga novimariva. Nandarire kutja Jesus wa yandja omirari mbi ozombura 2 000 nḓa kapita, ovyo ngamba ominanḓengu nu matu yenene okuviungurisa.

¹² Jehova u tu pa omirari mOmbeibela mbi tu vatera okukara nomuinyo weṱunḓu omuwa, okurira ovaungure ovasemba nokukara nohange kuna varwe. Omirari vyOmbeibela mavi yenene okutuvatera atuhe kape notjiungura kutja oweṱe oouṋe, tu kara pi poo kutja tu nomauzeu waye.—Lesa Jesaja 48:17; tara kOmambo wokehi 3.

13. Jesaja wa tja maku tjitwa tjike kotjihuro tjaBabilon?

¹³ Omaprofetero omengi wOmbeibela ya yenenisiwa rukuru. Okutara kotjihorera, Jesaja wa hunganeka kutja otjihuro Babilon matji kayandekwa. (Jesaja 13:19) Eye wa kahurura oukahu kutja otjihuro hi matji haverwa vi. Otjo tja ri nomivero ominene nu tja kovererwe i onḓonḓu. Posi yokutja Jesaja wa hunganeka kutja onḓonḓu yatjo mai pwirisiwa nu omivero vyatjo mavi isiwa kamwaha. Ovanavita na wo mave havere otjihuro hi nokuhina otjirwa. Jesaja wina wa hunganeka kutja omurumendu wena Kirus ongu ma kahavera Babilon.—Lesa Jesaja 44:27–45:2; tara kOmambo wokehi 4.

14, 15. Omaprofetero waJesaja ya yenenisiwa vi?

¹⁴ Ozombura 200 omahunganekero ohunga na Babilon tji ya za nokutjangwa, otjimbumba tjovarwe tje ya moBabilon nu tja ri atje rirongerere okuhavera Babilon. Owaṋi ngwa ri omuhongore watjo? Eye wa ri ombara yaPersie wena Kirus tjimuna tji pa hunganekwa. Nu hapo otjimbumba tjaKirus tjovita tja hita moBabilon nokuhinotjirwa otja tji pa hunganekwa i omuprofete Jesaja poo indee?

¹⁵ Ovababilon va ri nomukandi mouṱuku mbu va  haverwa. Owo aave munu kutja ve ri mondjeverero, orondu otjihuro tja kovererwe i orumbo orunene nonḓonḓu. Pendje yotjihuro, Kirus novarwe ve va paha omuano wokuhendurura omeva wonḓonḓu. Omeva ya henduruka nawa ngandu ovarwe vaPersie tjaave yenene okukonda onḓonḓu. Nu hapo otjimbumba tjaKirus tja kapita vi porumbo rwaBabilon? Otja omahunganekero pu ya raisa, omivero  vyotjihuro vya isirwe kamwaha, okutja ovarwe vovita va wira otjihuro nokuhina otjirwa.

16. (a) Jesaja wa hunganeka tjike ohunga na Babilon? (b) Matu tjiwa vi kutja omahunganekero waJesaja ya yenenisiwa?

¹⁶ Jesaja wa hunganeka kutja kamaa mu katura omundu moBabilon rukwao. Eye wa tja: “Kamaamu tura omundu mu tjo rukwao.” (Jesaja 13:20) Otjiṋa ho tja yenenisiwa poo indee? Poruveze pu pa ri Babilon otjikuru,ozokilometa ape 80 keyuva kokumuho kwaBaghdad tjaIrak, pa rira etundu. Nandarire ndino kape novandu mbe kara ngo. Jehova wa ‘komba Babilon notjikombo tji tji kombozora oviṋa avihe.’—Jesaja 14:22, 23. *

17. Ongwaye tji matu yenene okukara nongamburiro momakwizikiro waMukuru aehe?

¹⁷ Mena rokutja omahunganekero omengi wOmbeibela ya yenenisiwa, okutja matu yenene okukara nongamburiro mu imbi Ombeibela mbi ya kwizika ohunga noruyaveze.  Wina matu yenene okukara nongamburiro kutja Jehova ma yenenisa omakwizikiro we wokutjita kutja ehi ri rire oparadisa. (Lesa Numeri 23:19.) Tjiri, tu nomaundjiro ‘womuinyo waaruhe ngu twa kwizikirwa rukuru i Ndjambi ngu ha wovisa.’—Titus 1:2. *

18. Paulus wa kahurura vi “embo raNdjambi”?

¹⁸ Twe rihongo kutja kape nembo rarwe enanḓengu tjimuna Ombeibela. Oyo i nombwaneno nu tji mai hungire ohunga nounongonone nomakuruhungi oyo aruhe i hungira ouatjiri. Oyo wina i yandja omirari omiwa nu i nomaprofetero omengi nga yenenisiwa rukuru. Posi yokutja, Ombeibela i tjita ovingi kombanda yanao. Omuapostele Paulus wa tjanga kutja, “Embo raNdjambi ri nomuinyo nu ri nomasa.” Omambo nga maye hee tjike?—Lesa Ovaheberi 4:12.

19, 20. (a) Ombeibela mai ku vatere vi okurikonḓonona omuini? (b) Ove mo raisa vi ondangi yoye kotjiyandjewa tjOmbeibela?

¹⁹ Ombeibela mai yenene okurundurura ehupo roye. Oyo mai ku vatere okuritjiwa omuini nawa. Oyo mai ku vatere okutjiwa omeripura woye omakoto noviṋa mbi ku ṱuna. Okutara kotjihorera, mape ya atu munu kutja twa suvera Mukuru. Nungwari, okuraisa kutja twe mu suvera tjiri, matu sokuṱakamisa oviṋa Ombeibela mbi i honga.

²⁰ Ombeibela tjiri embo nda za ku Mukuru. Eye u vanga kutja u i lese, u i konḓonone nu u i suvere. Raisa ondangi yoye kotjiyandjewa hi, nu kayende komurungu okuikonḓonona. Tji wa tjiti nao otji mo tjiwa nawa ondando yaMukuru kovandu. Mekondwa ndi mari kongorere ko, matu kerihonga ovingi ohunga nondando ndjo.