1, 2. ¿Jasche kqabʼij che ri Biblia are jun utzalaj sipanik?

¿JAS kanaʼo are chiʼ xaq kʼateʼ jun awachiʼl kuya jun sipanik chawe? Qastzij riʼ che chanim kawaj kawil ri kʼo chupam. Xuqujeʼ katkikotik rumal che xatnaʼtaj che ri awachiʼl xuqujeʼ kamaltyoxij riʼ.

² Ri Biblia are jun nimalaj sipanik che ri Dios uyaʼom chqe. Kuya ubʼixik jastaq che kqariq ta chi pa jun wuj. Kubʼij che ri Dios xubʼan ri kaj, ri uwach Ulew, ri nabʼe achi xuqujeʼ ri nabʼe ixoq. Ri Biblia kuya pixabʼ che kojutoʼ chrij ri kqabʼan chuwach ri kʼax. Xuqujeʼ, kubʼij che ri Dios kraj che ri uwach Ulew kux jun jeʼlalaj lugar xuqujeʼ kuya ubʼixik chrij ri kubʼan che usukʼumaxik.

3. ¿Jas kawetaʼmaj are chiʼ kanikʼoj ri Biblia?

³ Are chiʼ katijoj awibʼ che ri Biblia, kawetaʼmaj riʼ che ri Dios kraj katux rachiʼl. Xuqujeʼ chiʼ kawetaʼmaj más uwach, más naqaj riʼ katkʼojiʼ wi che.

4. ¿Jas más utz kawil che ri kbʼix chrij ri Biblia?

⁴ Ri Biblia qʼaxem pa más che 3.000 chʼabʼal, xuqujeʼ bʼanom imprimir miles de millones. Pa ronojel ri uwach Ulew, 9 chke 10 winaq kkisikʼij uwach ri Biblia pa kichʼabʼal. Xuqujeʼ ronojel semana kjach más che jun millón biblias. Wariʼ kukʼutu che ri Biblia junam ta rukʼ jun chi wuj.

5. ¿Jas kraj kubʼij che ri Biblia «petinaq rukʼ ri Dios»?

⁵ Ri Biblia «petinaq rukʼ ri Dios» (chasikʼij uwach 2 Timoteo 3:16). Are kʼu weneʼ jun winaq kuchomaj: «We achijabʼ xetzʼibʼan ri Biblia, ¿jasche kbʼixik che petinaq  rukʼ ri Dios?». Ri Biblia kuya ubʼixik ri respuesta are chiʼ kubʼij: «E winaq ri xkiya kibʼ pa uqʼabʼ ri Dios ri xetzijonik, xyaʼ kinoʼj rumal ri Ruxlabʼal ri Dios» (2 Pedro 1:21). Are ri Dios ri xkʼamow kibʼe. Kuya kqajunamaj rukʼ jun nim winaq che kutaq ri ukʼojol che utzʼibʼaxik jun wuj rech kutaq bʼi che jun chi winaq, ronojel ri e tzij xuqujeʼ ri chomanik kʼo chupam we wuj riʼ rech ri nim winaq rech ta ri ukʼojol. Junam rukʼ, ri Biblia petinaq rukʼ ri Dios, ri chomanik kʼo chupam kech ta ri e winaq che xetzʼibʼanik. Dios xuya kinoʼj che kkitzʼibʼaj ri uchomanik. Rumal laʼ kojkunik kqabʼij che ri Biblia qas are «utzij ri Dios» (1 Tesalonicenses 2:13). (Chawilaʼ ri nota 2, «Ri Biblia ‹petinaq rukʼ ri Dios›»).

6, 7. ¿Jasche kqabʼij che xaq junam ri kuya ubʼixik ri Biblia?

⁶ Más che 1.600 junabʼ xukʼam bʼi utzʼibʼaxik ronojel ri Biblia. Xuqujeʼ, ri xetzʼibʼanik xekʼasiʼ pa jalajoj taq junabʼ. Jujun chke xebʼe pa nimaʼq taq tijobʼal, e nikʼaj chik xebʼe taj. Jun kʼutbʼal, jun chke are kunanel. E nikʼaj chik e tikonel, e chapal kar, ajyuqʼabʼ, e qʼaxal utzij ri Dios xuqujeʼ e qʼatal tzij. Paneʼ jalajoj ri xetzʼibʼan ri Biblia xaq junam kukʼut pa ronojel. ¿Jasche kojkunik kqabʼij wariʼ? Rumal che ri kubʼij ri Biblia pa ri nabʼe uxaq kʼa kopan pa ri ukʼisbʼal uxaq junam ri kubʼij. *

⁷ Ri e nabʼe capítulos re ri Biblia kuya ubʼixik chiʼ xumaj lo ri kʼax cho ri uwach Ulew. Ri e kʼisbʼal capítulos kubʼij chqe ri kubʼan ri Dios che resaxik ri e kʼax xuqujeʼ kubʼan jeʼlik che ri uwach Ulew. Ri Biblia kuya ubʼixik ri kʼulmam are chiʼ xmajtaj lo ri kʼaslemal xuqujeʼ kukʼutu che ri Dios amaqʼel kubʼan ri kubʼij.

8. ¿Jasche kqabʼij che tzʼaqat ri kubʼij ri Biblia are chiʼ kchʼaw chrij ri ciencia?

⁸ Ri Biblia xtzʼibʼax taj rech kkoj che ukʼutik ciencia xuqujeʼ are ta jun wuj che kkoj pa ri tijobʼal. Are kʼu chiʼ kchʼaw chrij ri ciencia rukʼ tzʼaqatil kubʼano. Are waʼ ri kkʼutuwik che ri wuj petinaq rukʼ ri Dios. Jun kʼutbʼal, ri wuj re Levítico kukʼut ri xubʼij ri Dios chke ri israelitas, xubʼij chke ri rajawaxik kkibʼano rech kjabʼun ta ri e yabʼil. Wariʼ xtzʼibʼax kʼi taq junabʼ chiʼ majaʼ kketaʼmaj ri winaq chrij ri bacterias xuqujeʼ ri virus che kkiya yabʼil. Ri Biblia xuqujeʼ are tzʼaqat are chiʼ kubʼij che ri uwach Ulew kʼo «puwiʼ ri man kʼo taj» (Job 26:7). Are chiʼ ri e winaq  xkichomaj che ri uwach Ulew likʼilik uwach, ri Biblia ubʼim chik che ketekik o bʼolobʼik (Isaías 40:22).

9. ¿Jas kukʼutu che ri xetzʼibʼan ri Biblia xkibʼij ri qastzij xuqujeʼ kʼo ta xkikʼuʼ chrij ri xkʼulmatajik?

⁹ Are chiʼ ri Biblia kchʼaw chrij jastaq che xebʼantaj ojer, amaqʼel tzʼaqat. Are kʼu e kʼi wuj che kchʼaw chrij ri xebʼantaj ojer kubʼij ta ronojel ri qastzij rumal che ri xetzʼibʼanik xkibʼij ta ronojel ri xkʼulmatajik. Jun kʼutbʼal, are chiʼ ri kitinamit kkichʼak ta jun chʼoj kkitzʼibʼaj taj. Are kʼu, ri xetzʼibʼan ri Biblia xkibʼij ronojel paneʼ xkichʼak ta jun chʼoj. Xuqujeʼ xkitzʼibʼaj chrij ri jastaq che utz ta xkibʼano. Jun kʼutbʼal re, pa ri wuj re Salmo 51, ri qʼatal tzij David xubʼij che xubʼan nimaʼq taq makaj. Rumal che ri xetzʼibʼanik xkibʼij ri qastzij xuqujeʼ kʼo ta xkikʼuʼ, rumal laʼ kqabʼij che ri Biblia qas petinaq rukʼ ri Dios xuqujeʼ kuya kqakubʼsaj qakʼuʼx chrij.

10. ¿Jasche kkiya tobʼanik ri e pixabʼ re ri Biblia chqe kimik?

¹⁰ Ri Biblia «petinaq rukʼ ri Dios: utz che tijonik, che pixbʼenik, che jikʼonik, che naqʼatisanik che ri sukʼilal» (2 Timoteo 3:16). Ri pixabʼ che kʼo pa ri Biblia kuya tobʼanik chqe kimik rumal che petinaq rukʼ ri Jehová. Rumal che areʼ xojbʼanowik, kuchʼobʼ ri kqachomaj xuqujeʼ ri kqanaʼo. Retaʼm ri qabʼantajik che oj kqachʼobʼ taj xuqujeʼ kraj kojkikotik. Areʼ retaʼm ri kuya utzilal xuqujeʼ ri kubʼan kʼax chqe.

11, 12. a) ¿Jas utz taq upixabʼ ri Jesús kqariq pa Mateo 5 kopan 7? b) ¿Jas más kqariq pa ri Biblia?

¹¹ Pa Mateo 5 kopan 7 kqariq e utz taq pixabʼ. Pa ri capítulos riʼ Jesús kukʼut chqawach ri kqabʼano rech kojkikotik, rech oj utz kukʼ ri e winaq, ri kqabʼan che ubʼanik qachʼawem rukʼ ri Dios xuqujeʼ ri ukojik ri pwaq. Paneʼ qʼaxinaq chi 2.000 junabʼ che ri Jesús xeʼuya ri e pixabʼ riʼ,  ri e utzij kʼo kichuqʼabʼ xuqujeʼ kkiya na tobʼanik chqe kimik.

¹² Pa ri Biblia, xuqujeʼ kqariq pixabʼ che kojutoʼ che usukʼumaxik ri qakʼaslemal rukʼ ri qafamilia, kojux utz taq ajchakibʼ xuqujeʼ kojkʼojiʼ pa jamaril kukʼ ri e nikʼaj chi winaq. Apastaneʼ ri qabʼantajik, ri kojel wi xuqujeʼ ri e kʼax qariqom, amaqʼel kojutoʼ ri pixabʼ re ri Biblia (chasikʼij uwach Isaías 48:17). (Chawilaʼ ri nota 3, «Pixabʼ»).

13. ¿Jas xuya ubʼixik Isaías chrij ri tinamit Babilonia?

¹³ E kʼi chke ri bʼim kan pa ri Biblia kʼulmatajinaq chik. Jun kʼutbʼal, ri qʼaxal tzij Isaías xubʼij che ksachisax na uwach ri tinamit Babilonia xuqujeʼ xuya ubʼixik ri kbʼan che uchʼakik (Isaías 13:19). Ri e tapya che kojom chrij ri tinamit Babilonia tzʼapim rukʼ nimaʼq taq uchiʼja xuqujeʼ sutim rij rukʼ jun nimaʼ. Isaías xuya ubʼixik che ri nimaʼ ktzaj na xuqujeʼ ri uchiʼja ktzʼapix ta kanoq. Xuqujeʼ xubʼij che ri ajchʼojabʼ kʼo ta chʼoj kkibʼano are chiʼ keʼok bʼi pa ri tinamit. Isaías xuqujeʼ xubʼij che ri ubʼiʼ ri qʼatal tzij kchʼakow ri tinamit are Ciro (chasikʼij uwach Isaías 44:27–45:2). (Chawilaʼ ri nota 4, «Profecías»).

14, 15. ¿Jas xbʼan che ubʼanik ri xubʼij kan Isaías?

¹⁴ Qʼaxinaq chi 200 junabʼ che Isaías ubʼim kan wariʼ, jun jupuq ajchʼojabʼ xeʼopan che uchʼakik ri Babilonia. ¿Jachin kʼamowinaq bʼi kibʼe ri ajchʼojabʼ? Ri qʼatal tzij re Persia. ¿Jas ubʼiʼ? Ciro, junam rukʼ ri xubʼij kan ri profecía. Jehová xubʼano che qas xtzʼaqat ronojel ri bʼim kanoq.

¹⁵ Are chiʼ xeʼopan ri ajchʼojabʼ, ri babilonios tajin kkibʼan jun nimaqʼij. Kkichomaj che kʼo ta kkikʼulmaj rumal che kʼo ri nimaʼ chrij ri tinamit xuqujeʼ ri nimaʼq taq  tapya, che kuchajij ri tinamit. Chrij ri tinamit, Ciro xuqujeʼ ri ajchʼojabʼ xkibʼan chi bʼi jun ubʼe ri nimaʼ rech ktzajik. Are chiʼ nim tzajinaq chi ri nimaʼ, ri ajchʼojabʼ Persas xekunik xeqʼax bʼi chupam. Are kʼu ¿jas xkibʼano xeqʼax bʼik? Junam che xubʼij ri bʼim kanoq, ri uchiʼja tzʼapim ta kanoq. Rumal laʼ rajawaxik taj xechʼojin ri ajchʼojabʼ chiʼ xeʼok bʼi pa ri tinamit.

16. a) ¿Jas xuya ubʼixik Isaías chrij ri kukʼulmaj Babilonia? b) ¿Jasche qetaʼm che qas xkʼulmataj ri xubʼij kan Isaías?

 ¹⁶ Isaías xuya ubʼixik are chiʼ kqʼax ri junabʼ kʼo ta chi jun winaq kkʼasiʼ pa Babilonia. Areʼ xutzʼibʼaj: «Mawi jumul kekʼojiʼ chi winaq chupam» (Isaías 13:20). ¿La qas xkʼulmataj ri e tzij riʼ? Qas xkʼulmatajik. Ri tinamit re Babilonia kriqitaj 80 kilómetros (50 millas) chunaqaj ri tinamit re Bagdad (Irak). Are kʼu kimik pa wajun lugar riʼ xaq xiw kriqitaj uchʼaqapil ri ojer Babilonia. Nijun winaq kʼo chilaʼ. Junam rukʼ ri kubʼij ri Biblia, Jehová xumes ri Babilonia rukʼ «mesbʼal re sachbʼal wachaj» (Isaías 14:22, 23). *

17. ¿Jasche kojkunik kqakubʼsaj qakʼuʼx chrij ronojel ri utzujum ri Dios?

¹⁷ Kʼi chke ri profecías che kubʼij ri Biblia e bʼantajinaq chik. Rumal laʼ, kojkunik kqakubʼsaj qakʼuʼx chrij ri kubʼij  ri Biblia chrij ri petinaq. Qas qetaʼm che Jehová kubʼan ri utzujum che ri uwach Ulew kux jun kotzʼiʼjalaj lugar (chasikʼij uwach Números 23:19). Ri Dios kuya ri kʼaslemal che kʼo ta ukʼisik, areʼ man «bʼanal ta tzij» (Tito 1:2). *

18. ¿Jas xubʼij ri apóstol Pablo chrij ri «utzij ri Dios»?

¹⁸ Awilom chik che kʼo ta jun wuj xaq junam rukʼ ri Biblia. Xaq junam kuya ubʼixik pa ronojel ri kutzijoj xuqujeʼ tzʼaqat chiʼ kchʼaw chrij ciencia o ri xebʼantaj ojer. Kuya utz taq pixabʼ chqe xuqujeʼ chupam kʼo kʼi bʼim kan ojer che e tzʼaqatinaq chik. Are kʼu xaq xiw ta wariʼ. Ri apóstol Pablo xutzʼibʼaj: «Ri utzij ri Dios kʼaslik xuqujeʼ kʼo ukunem». ¿Jas kraj kubʼij wariʼ? (Chasikʼij uwach Hebreos 4:12).

19, 20. a) ¿Jas kubʼan ri Biblia che atoʼik rech kawetaʼmaj awach? b) ¿Jas kabʼano rech kamaltyoxij wajun sipanik riʼ?

¹⁹ Ri Biblia kkunik kukʼex ri akʼaslemal. Kkunik katutoʼ che retaʼmaxik awach. ¿Jas kubʼan che ubʼanik? Ri Biblia kkunik kojutoʼ che uchʼobʼik ri qas kqachomaj xuqujeʼ ri kqanaʼo. Jun kʼutbʼal, weneʼ kqachomaj che kqaloqʼoqʼej chi ri Dios. Are kʼu, are chiʼ kqetaʼmaj chrij ri Biblia, kqilo che rajawaxik kqakʼut ri qaloqʼoqʼebʼal rukʼ ri kqabʼano xuqujeʼ chiʼ kqanimaj ri kubʼij ri Biblia.

²⁰ Qastzij wi che ri Biblia petinaq rukʼ ri Dios. Areʼ kraj che at kasikʼij uwach, kawetaʼmaj chrij xuqujeʼ kaloqʼoqʼej. Chamaltyoxij wajun sipanik riʼ re ri Dios. Kaya ta kan retaʼmaxik chrij ri Biblia. Rech kachʼobʼ ri urayibʼal ri Dios xuqujeʼ ri kraj chke ri e winaq. Pa ri jun chi kʼutunem, kqetaʼmaj más chrij ri urayibʼal ri Dios.