1, 2. ¿Imaraykun Biblia Diospa ancha sumaq regalon?

¿IMAYNAN sientekunki amigoyki juj sumaq regalota qosuqtiyki? Anchatachá kusikunki, chayratochá kichaytapas munanki. Maytachá paytaqa agradecekunki.

² Bibliaqa Diospa sumaq regalonmi. Chaypi willakuykunata jinaqa manan maypipas tarisunmanchu. Ejemplopaq, Bibliapin willawanchis janaq pachata kay pachata Dios kamasqanmanta, ñaupaq warmi-qharita kamasqanmanta, kay allpata sumaq paraisoman imaynata tukuchinanmantapas. Chaypiqa kallantaqmi sumaq consejokuna problemanchiskunata allichanapaq.

3. ¿Imatan yachanki Bibliata estudiaspa?

³ Bibliata estudiaspan yachanki Diosqa paypa amigon kanaykita munasqanta, astawan reqsispaqa astawanmi Diosta munakunki.

4. ¿Iman astawan Bibliamanta admirachisunki?

⁴ Bibliataqa 3.200 más rimaykunamanmi t’ijrakushan, millón-millonninpitaqmi ruwakamuran. 10 runamanta 9 runakunan Bibliataqa rimasqanku simipi leeyta atinku, sapa semanataq millón más Bibliakunata rakikun. Rikusqayki jina, Biblia jinaqa manan ima libropas kanchu.

5. ¿Imaynapin Biblia Diospa yuyaychasqan karan?

⁵ Bibliaqa Diospa yuyaychasqanmi (leey 2 Timoteo 3:16). Yaqapaschá wakinqa chayta uyarispa  ninkuman: “Runakunataq Bibliata qelqaranku chayri, ¿imaynapin Diospa simin kanman?”, nispa. Biblian nin: “Profecía willaqkunaqa santo espirituq apasqan kaspa Diosmanta rimaranku”, nispa (2 Pedro 1:21). Imaynan juj jefeqa secretarionwan cartata qelqachin, chhaynatan Jehová Diospas piensasqanta runakunawan qelqachiran. Chaymi Bibliaqa Jehová Diospa siminpuni (1 Tesalonicenses 2:13; qhaway 2 willakuyta).

6, 7. Bibliaq llapa willasqanqa tupanmi, ¿imaynapin chayta yachanchis?

⁶ Bibliataqa 1.600 watakunapin qelqayta tukuranku.  Biblia qelqaqkunaqa manan kaq tiempopichu kausaranku, manataqmi llapankuchu kaq educacionniyoq karanku. Ejemplopaq, jujninmi karan médico, wakintaq karanku challwaqkuna, chajrapi llank’aqkuna, michiqkuna, profetakuna, juezkuna, reykuna ima. Chaywanpas Biblia qelqasqankuqa allintan tupan, manataqmi paykunapura contradecikunkuchu. *

⁷ Bibliaq qallariyninpin willashan kay allpapi problemakuna imayna qallarisqanta, tukuyninpitaq willashan imaynata Dios allichananta, kay allpata sumaq paraisoman tukuchinanmantawan. Willallantaqmi waranqa-waranqa watakunapi runakunawan imachus pasasqanta, Diospa munaynin junt’akunanmantapas.

8. ¿Imakunan rikuchin cienciaq yachachisqan Bibliaq yachachisqanwan tupasqanta?

⁸ Bibliaqa manan cienciamanta yachachinapaqchu qelqakuran nitaq escuelapi yachachinapaqchu, ichaqa cienciaq yachachisqanwanqa tupanmi. Ejemplopaq, Levítico libropin willashan Israel runakuna onqoykunawan mana contagiakunankupaq imachus ruwanankumanta. Chay tiempopi runakunaqa manaraqmi yacharankuchu onqoykuna imaynapi rijurisqanta. Bibliaqa willallarantaqmi kay allpa “ch’usaqpi” kashasqanta (Job 26:7). Chaymantapas ñaupaq tiempopi runakunan piensaranku kay allpa  plano kananpaq, Biblian ichaqa willaranña muyu kasqanta (Isaías 40:22).

9. ¿Imatan yachanchis Biblia qelqaqkuna sut’illanta qelqasqankumanta?

⁹ Bibliaqa imamantapas willaspaqa sut’intan willan, juj librokunata qelqaqkunan ichaqa mana llapantachu willanku. Mayninpiqa maqanakuypi atipachikusqankutapas manan willankuchu. Biblia qelqaqkunan ichaqa pantasqankuta llaqtankuq atipachikusqantapas willaranku. Ejemplopaq, Números libropin Moisesqa pantasqanmanta qelqaran, chayrayku Diospa castigasqan kasqanmantawan (Números 20:2-12). Sut’illanta qelqasqankun reparachiwanchis Bibliaqa Diosmantapuni jamusqanta, confianapaq jina kasqantapas.

10. ¿Imaraykun Bibliapi kaq consejokuna yanapawanchis?

¹⁰ Bibliaqa Diospa yuyaychasqanmi, chaymi “allinpuni yachachinapaq, anyanapaq, imatapas allinyachinapaq” (2 Timoteo 3:16). Bibliapi kaq consejokunaqa Diosmantan jamun, chaymi kay tiempopipas yanapawanchis. Diostaq kamawaranchis chayqa, allintan yachan imayna piensasqanchista imayna sientekusqanchistapas. Allin kananchistan munan, yachantaqmi imachus allinninchispaq kasqanta.

11, 12. a) ¿Ima consejokunan kashan Mateo 5-7 capitulokunapi? b) ¿Ima yachachikuykunan Bibliapi tarikullantaq?

¹¹ Mateo 5-7 capitulokunapin kashan Jesuspa willasqan consejokuna, chaypin willaran imaynata kusisqa kausanamanta, jujkunawan sumaqta kausanamanta, mañakuymanta, qhapaq kayta imaynata qhawarinamantapas.  2.000 watakuna ñaupaqtaña rimaran chaypas yanapawanchismi kay tiempopi.

¹² Bibliapiqa kallantaqmi allin yachachikuykuna familianchiswan kusisqa kausanapaq, allin llank’aq kanapaq, jujkunawan sumaqta kausanapaqpas. Llapanchistan yanapawanchis maypiña tiyaqtinchispas ima problemayoqña kaqtinchispas (leey Isaías 48:17; qhaway 3 willakuyta).

13. ¿Babilonia llaqtawan ima pasanantan profeta Isaías willaranña?

¹³ Bibliapi kaq profeciakunaqa askhañan junt’akuran. Ejemplopaq, profeta Isaiasmi willaranña Babilonia llaqta thunisqa kananta, willallarantaqmi imayna atipasqa kanantapas (Isaías 13:19). Babilonia llaqtaqa jatunkaray punkukunayoqmi karan, juj mayutaq llaqtata muyuriran. Profeta Isaiasmi willaran chay mayu ch’akichisqa kananta, llaqtaq punkunkuna kichasqa kashananta, soldadokunapas mana maqanakuspalla jaykunankuta. Willallarantaqmi chay llaqtata atipaqqa Ciro kananta (leey Isaías 44:27-45:2; qhaway 4 willakuyta).

14, 15. ¿Imaynatan Isaiaspa willasqan profecía junt’akuran?

¹⁴ Profeta Isaiaspa willasqanmanta 200 watakuna qhepamanmi juj ejército Babilonia llaqtaman chayaran. ¿Pin chay ejercitota umalliran? Persia nacionpi rey Ciro. Tukuypas profeciaq junt’akunanpaq jinan kasharan.

¹⁵ Babilonia llaqtapiqa fiestatan chay tuta ruwasharanku. Llaqtankutaqa jatun perqa juj mayu iman  muyuriran, chaymi seguro sientekuranku. Ciron ichaqa soldadonkunawan mayuq ununta pisiyachispa chimparanku. Ichaqa, ¿imaynatan jatunkaray perqayoq llaqtaman jaykuranku? Qonqarusqakun llaqtaq punkunkuna wisq’ayta, chaymi Ciroq ejercitonqa mana maqanakuspalla llaqtata jap’ikapuran.

16. a) ¿Babilonia llaqtawan ima pasananmantan profeta Isaías willaran? b) ¿Imaynapin yachanchis junt’akusqanta?

 ¹⁶ Chaymantapas profeta Isaiasmi willaran manaña pipas Babilonia llaqtapi tiyananta, niranmi: “Chaypiqa manan pipas jayk’aqpas tiyanqañachu”, nispa (Isaías 13:20). ¿Junt’akuranchu chay nisqan? Junt’akuranmi. Babilonia llaqtaqa Irak nacionpi Bagdad llaqtaq cercanpin tarikun, kunanqa manan pipas chaypiqa tiyanchu, thunisqa perqakunallañan kashan. Bibliaq nisqan jina, Diosmi Babilonia llaqtata ‘pichasqata jina ch’usaqyachipuran’ (Isaías 14:22, 23). *

17. ¿Imaraykun seguro kashanchis llapa promesankunata Dios junt’ananmanta?

¹⁷ Bibliapi kaq profeciakunaqa askhañan junt’akuran, chaymi seguro kashanchis jamuq tiempopaq  willasqan profeciakunapas junt’akunanmanta. Diosqa kay allpatan paraisoman tukuchinqa (leey Números 23:19). Jehová Diosqa manan llullakunchu, paymi prometewanchis wiñaypaq kausayta (Tito 1:2). *

18. ¿Ima niranmi apóstol Pablo Diospa siminmanta?

¹⁸ Bibliaqa lliupin tupan, cheqaqtan cienciamanta ñaupaqpi pasasqanmantapas willan, sumaq consejokunatan qon, wakin willasqan profeciakunapas junt’akuranñan. Apóstol Pablon ichaqa Bibliamanta nillarantaq: “Diospa siminqa kausashaqmi, atiyniyoqtaqmi kanpas”, nispa (leey Hebreos 4:12). ¿Imatan chaywan nisharan?

19, 20. a) ¿Imaynatan Biblia yanapasunkiman? b) ¿Imaynatan rikuchiwaq Bibliamanta agradecekusqaykita?

¹⁹ Bibliaqa vidaykitan cambiasunkiman. Reparachisunkin imayna runa kasqaykita imayna sientekusqaykita ima piensasqaykitapas. Yaqapaschá nisunman: “Diostaqa munakunin”, nispa. Dios munakusqanchista rikuchinapaqmi ichaqa Bibliaq nisqanta kasukunanchis.

²⁰ Bibliapiqa Diospa piensasqanmi tarikun, chaymi Diosqa munan leenaykita, estudianaykita, munakunaykitapas. Chay regalomanta agradecekusqaykita rikuchinaykipaq estudiashallay Bibliata. Chayta ruwaspan entiendenki imatachus noqanchispaq munasqanta. Qatimuq capitulopin chaymanta astawan yachasun.