1, 2. Bibliaca ¿imamandata Dios carashca juyailla regalo can?

ALI rijsishca amigo shuj regalota carajpica ¿imashinata sintiringui? ¿Nachu cushijushpa uchalla pascanguiman? ¿Nachu carashcamandaca agradicinguiman?

² Bibliaca Dios carashca juyailla regalomi can. Bibliapi tiashca yuyaicunataca maijan libropipash na yachajuita ushanchichu. Bibliapica ninmi cielota, cai Alpata, punda jarita, punda huarmitapash Diosmi rurarca nishpa. Shinallata, problemacuna ricurijpi ali consejocunahuanmi ayudan. Ashtahuanbash cai Alpapi tucuicuna ali causachun Dios imata ruranatapashmi Bibliapica yachachin. Chaimandami Bibliaca shuj juyailla regalo can.

3. Bibliapica ¿imatashi yachajungui?

³ Bibliata yachajushpaca, Diospa amigo tucui ushashcatami yachajungui. Shina yachajushpaca Taita Diosmanmi ashtahuan quimiringui.

4. Bibliaca ¿mashna shimicunapita tian? ¿Picunallata Bibliataca charin?

⁴ Bibliataca casi 2 mil 800 shuj shuj shimicunaman traducishpami, ashtaca millón Bibliacunata llujchishca. Casi tucui gentecunami mundo enteropi paicunapa propio shimipi Bibliataca charin. Shinallata, cada semanami millón yali gentecuna shuj Bibliata chasquin. Bibliahuan igual shuj libroca na tianllu.

5. Bibliataca ¿imamandata Diospa Shimimi can ninchi?

⁵ Bibliaca Dios “paillata yarichishpa escribishcami” can (2 Timoteo 3:16, liipangui). Shinapash huaquin gentecunaca ninmi, “Bibliataca gentecunami escribishca. ¿Imashinata Diospa Shimi caita ushan?” nishpa. Bibliapica ninmi: ‘Taita Diospalla causanajuj runacuna cashpami, Diospa jucha illaj  espíritu yarichijpi villanajushca’ nishpa (2 Pedro 1:21). Shuj chimbapuraita ricushun: Shuj abogado paipa secretariata shuj cartata escribichun mañajpica, ¿pipa yuyaitata escribin? Secretariaca abogadopa yuyaitami escribin. Shinallatami Bibliapipash, Bibliata escribij runacunapa yuyaica na canllu. Taita Diospa yuyaita escribichunmi Diosllata ayudashca. Chaimandami Bibliaca ‘Diospa Shimi’ can (1 Tesalonicenses 2:13. Página 207​pi nota 2​ta ricupangui).

6, 7. ¿Imamandata Bibliaca shuj yuyaitallami charin ninchi?

⁶ Bibliaca mil 600 yali huatacunapimi escribirirca. Bibliata  escribijcunaca shuj shuj tiempopimi causarca. Huaquingunaca ali yachajushcacuna, alpata trabajajcuna, pescadorcuna, michijcuna, shujcarin doctormi carca. Cutin shujcunaca Taita Dios imata ruranata villajcuna, juezcuna, reycunami carca. Tauca gentecuna escribishca cajpipash Bibliaca shuj yuyaitallami charin. *

⁷ Bibliapa callari librocunaca cai pachapi llaquicuna imashina tiai callarishcatami parlan. Cutin Bibliapa tucuri librocunapica llaquicunata tucuchishpa, Taita Dios cai Alpata shuj juyailla paraisota ruranatami parlan. Shinallata Bibliapica ashtaca ashtaca huatacuna huashaman gentecuna imashina causashcata, Taita Diospa munai tucui pactarinatapashmi yachachin.

8. Biblia cabalta yachachishcataca ¿imashinata yachanchi?

⁸ Bibliaca ciencia nishcata yachachingapaj o escuelacunapi yachachingapaj libroca na canllu. Shinapash, cientificocunapa investigaciongunahuan chimbapurajpica Bibliaca cabaltami yachachin. Taita Diospa Shimi caimandami cabalta yachachin. Por ejemplo Levítico libropica, israelitacunapurapi ungüicuna ama mirachun Taita Dios imata mandashcatami ricuchijun. Ungüicuna imashina mirajta gentecuna nara yachajpillatami Bibliapica ña escribishca carca. Shinallata, cai Alpa imapipash na huarcushcachu nishpaca cabaltami nijun (Job 26:7). Ashtahuanbash, cai Alpa imashina cashcamanda gentecuna shuj shuj yuyaicunata charijpipash, Bibliapica cai Alpaca redondomi can nishpami ña yachachirca (Isaías 40:22).

9. Bibliamandaca ¿imatata yachajunchi?

⁹ Bibliapica punda tiempopi ima pasashcata parlashpapash siempremi cabalta nin. Cutin gentecuna  escribishca librocunapica na cabalta escribinllu. Por ejemplo, guerracuna tiajpi paicunapa llacta mashna viaje llaquichi tucushcataca na villanllu. Pero Bibliata escribijcunaca tucuitami cabalta escribishca. Chaimandami, israelitacuna macanajuicunapi mishai tucushcataca na pacashpa escribishca. Bibliata escribijcunaca paicuna imapi pandarishcatapashmi escribishca. Números libropica, Moisesca pai pandarishcamanda Taita Dios paita llaquichishcatami escribirca (Números 20:2-12). Bibliata escribijcuna cabalta escribishcamandami Bibliaca Diospa Shimi cajta yachajunchi. Chaimandami tucui shunguhuan Bibliapi crinchi.

10. ¿Imamandata Bibliapi consejocunaca cunanbipash ali can?

¹⁰ Bibliaca Diosllata “yarichishpa escribishcami. Chai Shimicunaca yachachingapaj, nalicuna ali purichun rimangapaj, shinallata imatapash cashcatapacha rurashpa causanatapash yachachingapajmi ali” can (2 Timoteo 3:16). Bibliapa consejocunaca cunanbipashmi ñucanchita ayudan. Ñucanchita Jehová rurashcamandami ali ali rijsin. Ñucanchi imata yuyajta, imashina sintirijtapash ali yachan, cushilla causachunbash munan. Diosllami ñucanchipa ima ali cajta, ima nali cajtapash yachan.

11, 12. a) ¿Ima consejocunatata Jesusca Mateo capítulo 5–7​pica curca? b) ¿Imatata Bibliamanda ashtahuan yachajunchi?

¹¹ Mateo libropa capítulo 5–7​camanga, cushilla causanamanda, shujcunahuan ali llevarinamanda, culquita imashina utilizanamanda, Taita Diosta imashina mañanamandami Jesusca ali consejocunata curca. Cai consejocunata 2 mil huatacuna huashaman Jesús cushca cajpipash, cunangamanmi sirvin.

¹² Shinallata, Jehová Diosca ñucanchi familia ucupi ali causachun, ali trabajadorcuna cachun, shujcunahuan  tranquilo causachunmi Bibliapica ali consejocunata cun. Shinami maipi causajpi, ima llaquicunata charijpipash tucuicunata Bibliaca ayudan (Isaías 48:17, liipangui. Página 207​pi nota 3​ta ricupangui).

13. Babilonia llactahuan ¿ima tucunatata profeta Isaiasca villarca?

¹³ Bibliapa ashtaca profeciacunaca ñami pactarishca. Shuj profeciata ricushun. Profeta Isaiasca nircami, Babilonia llactaca tucuchi tucushcami canga nishpa (Isaías 13:19). Paica chai llacta imashina tucuchi tucuna cashcatami villarca. Babilonia llactaman contracuna ama yaicuchunga shuj huaicu, shuj jatun pungupashmi tiarca. Shinapash Isaiasca nircami, huaicuca chaquichishcami canga, pungupash pascariami quedanga nishpa. Babilonia llactata mishangapaca contracunaca macanajuitallapash na macanajunachu carca. Shinallata Isaiasca nircapashmi, Babilonia llactataca Ciro shuti runami mishanga nishpa (Isaías 44:27–45:2, liipangui. Página 208​pi nota 4​ta ricupangui).

14, 15. ¿Imashinata profeta Isaías villashca profeciaca pactarirca?

¹⁴ Cai profecía escribishcamanda 200 huatacuna jipaca, Babilonia llactata tucuchingapami contra soldadocunaca chayarca. ¿Pita soldadocunataca ñaupaman pushajurca? Bibliaca ninmi, Persia llactamanda Ciro shuti reymi ñaupaman pushajurca nishpa. Shinami chai profeciaca pactari callarirca.

¹⁵ Babilonia llactata llaquichina tutaca, Babiloniamanda gentecunaca shuj jatun fiestatami charirca. Chai llactapi shuj jatun huaicu, jatun pircacuna tiashcamandami paicunaca pipash llaquichinataca na manllan carca. Shina cajpipash, Babilonia llactaman yaicungapami rey Ciroca paipa soldadocunandi shuj jatun larcata allashpa  huaicuta chaquichirca. Shinami, soldadocunaca huaicuta catishpa jatun pircacunaman chayarca. Shinapash ¿imashinata Babilonia llactamanga yaicurca? Profeciapi nishca shinaca, Babiloniamanda gentecunaca punguta vichanatami cungashcarca. Shinami, contra soldadocunaca macanajuitapash na macanajushpa Babilonia llactata tucuchirca.

16. a) Babilonia llactamandaca ¿imatata Isaiasca nirca? b) Isaías escribishca profecía pactarishcataca ¿imashinata yachanchi?

 ¹⁶ Profeta Isaiasca Babilonia llactamandaca nircami: “Chaipica, pipash na ashtahuan causangachu” nishpa (Isaías 13:20). ¿Chaica pactarishcachu? Cunanbica Irak llactapi Bagdadmanda 80 kilómetrocunata rishpami punda tiempopi Babilonia llacta tiashca pushtu can. Chaipica pipash ñana causanllu, yanga shitashca tunirishca pircacunallami tian. Jehová Diosca Babilonia llactataca ‘tucuillata tucuchij fichanahuan fichanshnami tucuchirca’ (Isaías 14:22, 23). *

17. ¿Imamandata Diospa tucui nishcacunapi crina capanchi?

¹⁷ Bibliapa ashtaca profeciacuna pactarishcamandami, shamuj punllacunapipash ashtahuan pactarinata crinchi. Chaimandami, Jehová cai Alpata shuj juyailla paraisota ruranata tucui shunguhuan crinchi (Números 23:19, liipangui). Bibliapica ninmi: ‘Causaita causanata shuyashpa causachunmi  villajuni. Na llullaj Taita Diosmi, cai pachata nara rurashpallata, causaita causanataca carasha’ nishca (Tito 1:2). *

18. Bibliamanda parlashpaca ¿imatata apóstol Pabloca nirca?

¹⁸ Imashinami yachajushcanchi, Bibliashna shuj libroca na tianllu. Callarinamanda tucuricamanmi shuj yuyaitalla charin. Shinallata, cientificocunapa investigashcata o punda tiempopi ima tucushcata parlashpaca cabaltami yachachin. Bibliamanda ashtaca profeciacunaca ñami pactarishca. Bibliapi ali consejocuna tiaimandami tucuicunata ayudai ushan. Apóstol Pabloca nircami: “Taita Diospaj Shimica causaj cashpami, ninan ushaita charin” nishpa. ¿Imatata ningapaj munan? (Hebreos 4:12, liipangui.)

19, 20. a) ¿Imashinata Bibliaca quiquinda ayudan? b) Bibliata charishcamandaca ¿imatata rurana capangui?

¹⁹ Bibliaca quiquinba causaita cambiai ushanmi. Quiquin imashina cajta ali yachachunmi Bibliaca ayudan. Quiquin imata yuyashcata, shungu ucupi imata charishcata yachachunmi ayudan. Por ejemplo ñucanchica Diosta juyanchimi ninchipashchari. Shinapash, Taita Diosta juyashcata ricuchingapaca Bibliapi mandashcata pactachinami canchi.

²⁰ Bibliaca Diospa Shimimi can. Chaimandami Taita Diosca Bibliata liichun, yachajuchun, Bibliapi mandashcata cazuchun munan. Bibliata charishcamanda agradicishpaca yachajushpami catina cangui. Shinami, gentecuna imashina causachun Taita Dios munashcata intindingui. Chaitaca shamuj capitulopimi ashtahuan yachajushun.