1, 2. Bibliaga imaraicuta balishca regalo an.

CAMBA amigo regalota cucpiga imasata sintiringui. Regalota apishaga cushimi sintiringui. Canda llaquisha cumbirashcamanda cushiyasha pagrachungui.

² Diosca runagunata llaquisha Bibliata cumbirashca. Cai libroga balishca yuyaigunatami charin. Bibliaga Diosmi cielota, Allpata, punda carita, punda huarmitahuas rashca nin. Llaquigunata charicpi Bibliaibi tiyac cunaiguna yanapai tucunchi. Chasnallata, Diosca cai Allpata imasa paraisota rangaraushcata rimai tucunchi.

3. Bibliata estudiashaga imatata yachangui.

³ Bibliata estudiaushaga, Dios camba amigo tucuna munashcata yachangui. Diosta mas ricsishaga paita mas llaquingui.

4. Bibliaga pigunaraicullata tiyan.

⁴ Bibliataga 3.200 yali shimigunaibi pasachisha, ashca huaranga yali cutin copiata surcushcauna. Mundu intiruibi ashca huaranga runaguna paiguna quiquin shimibi leina ushanaun. Caran semanaibi huaranga huaranga Bibliata surcusha cunaun. Caita yachashaga, Biblia shuc librogunamanda mas balic ashcata intindinchi.

5. Biblia, ‘Diosllata quillcachishca shimiʼ man nishcata imasata intindinchi.

⁵ Bibliaga ‘Diosllata quillcachishca shimiʼ man (2 Timoteo 3:16 leipai). Chasna ashahuas maicanga ningachari: “Runaguna quillcashca acpiga imasata Diosmanda  shamun” nisha. Bibliaga nin: “Runagunaga [...] Diospa samai yuyachishcatami rimanaura” nisha (2 Pedro 1:21). Diosca imasata paihua yuyaita quillcachira. Caita yuyari: shuc jefe imata rimana munashaga, paihua secretariota cartata quillcachisha cachan. Chi cartaga pihuac tan. Jefehua carta man. Chasnallatami, Bibliaga Dios quillcachishca man, mana quillcac runagunahuac chan. Diosca pai yuyaigunata quillcachira. Chiraicumi Bibliaga “Dios rimashca” shimi man ninchi (1 Tesalonicenses 2:13; nota 2​ta ricui).

6, 7. Bibliaga imaraicuta mana chicanda rimasha pandarin.

⁶ Bibliata quillcai callarishcamanda tucurinagamaga  1.600 huata yali pasara. Chimandahuas, Bibliata quillcaccunaga chican timpuibi causanaura. Maicangunaga estudiashca, mana estudiashcaguna manaura. Por ejemplo, shucca doctor mara. Shuccunaga chagraibi tarabaccuna, yacu aichata apiccuna, ovejata cuiraccuna, profetaguna, reyguna, juezguna manaura. Casna chican runaguna quillcashca acpihuas, Bibliaga pundamanda tucurinagama mana chicanda rimasha pandarinzhu. *

⁷ Punda capitulogunaga imasa llaquiguna callarishcata riman. Chimanda tucuric capitulogunaga Dios imasa llaquigunata tucuchisha cai Allpata paraisota rangaraushcata riman. Bibliaga runaguna causai huaranga huataguna huashama imasa ashcata cuintan. Chasnallata, Diosca Bibliaibi pai rimashcata pactachic man nin.

8. Cientificoguna yachachishcamanda rimashaga imaraicuta Bibliaga pasacta riman ninchi.

⁸ Bibliaga mana cientificoguna yachachishca libro shina chan. Chasna ashahuas, cientificoguna yachachishcamanda rimashaga pasacta intindichin. Caita yachashaga Biblia Dios partimanda shamushcata intindinchi. Por ejemplo, Levitico libroga Israel llactaibi ungüiguna mana tiyachun, imata ranata Dios mandashcata riman. Cientificoguna imaraicu runaguna ungushcata mana yachagllaita Bibliaga ñaupata rimara. Astahuanbas cai Allpa “yangai huarcuriauta” Bibliaga riman (Job 26:​7). Shuc timpuibiga ashca runaguna  Allpa imasa ashcata chican chican yuyaigunata charinaura. Chasna acpihuas, Bibliaga ñaupatami Allpa rirundu ashcata rimara (Isaias 40:22).

9. Bibliata quillcaccuna, mana llullasha sirtuta rimashcaga imatata ricuchin.

⁹ Bibliaga ñaupa ima tucushcata cuintasha pasacta riman. Chasna ashahuas runaguna quillcashca librogunaibiga mana tucuita quillcanaunzhu. Guerragunaibi ima tucushcata cuintashaga, paigunata binsishcata pacasha quillcanaura. Randi, Bibliata quillcaccunaga Israel llacta guerraibi pirdishcata mana pacasha quillcanaura. Chasnallata paiguna pandarishcatahuas quillcasha saquinaura. Por ejemplo, Numeros libroibi, Moisesga uchaibi urmasha Dios castigashcata paillata quillcara (Numeros 20:​2-12). Bibliata quillcaccuna mana llullasha sirtuta quillcashca acpi, Biblia Diospa shimi ashcata quirinchi.

10. Biblia cunashcaga imasata cunan yanapai tucunchi.

¹⁰ Bibliataga “Diosllata [...] quillcachira tucui paihua shimita. Chi shimi balinmi ali purinata yachachingahua [...] ñucanchi pandacpi Diospa shimi pasacta yachachin imasna ñucanchi alichinata” (2 Timoteo 3:16). Bibliaga Diospa shimi ashcamandami cunanbas yanapai tucunchi. Jehovaga ñucanchi imata pinsashcata, imasa sintishcata intindi tucunchimi. Paiga ñucanchita alita ricsishcamandami, ñucanchi cushi causanata munan. Ñucanchiraicu ima ali ashcata pai alita yachan.

11, 12. Bibliaibiga ima ali cunaigunata tiyan.

¹¹ Mateo 5 a 7 ali cunaiguna tiyan. Cai capitulogunaibiga Jesusca imasa cushi causanata, tucuigunahuan  ali apanacunata yachachira. Chimandahuas imasa Diosta mañanata, cullquita imaibi gastanatas yachachira. Jesus cunashcaguna 2.000 huata pasashca acpihuas, yanapai tucunchimi.

¹² Bibliaga, ailluibi cushi causangahua cunaigunata charin. Chasnallata ali tarabac angahua, shuccunahuan cungailla causangahua yanapai tucunchi. Bibliamanda cunaigunaga ima tunu runa acpihuas, ima llaquigunata charicpihuas yanapai tucunchimi (Apocalipsis 1:3 leipai; nota 3​ta ricui).

13. Isaiasga Babilonia llactamanda imatata nira.

¹³ Bibliamanda ashca profeciaguna ña pactarishcami. Por ejemplo, Dios rimashcata pasachic Isaiasga Babilonia llacta imasa chingarinata rimara (Isaias 13:19). Babilonia llactaga yacu liyú muyurishca mara, chasnallata cai llactama yaicungahua atun punguta charira. Chasna acpihuas Isaiasga cai yacu chaquirinata, pungu pascashca anatas nira. Chimandahuas soldadoguna Babilonia llactaibi causac runagunahuan mana macanacushallata binsinata quillcara. Isaiasga Babilonia llactata Ciro nishca runa chingachinatahuas cuintarami (Isaias 44:​27-45:​2; nota 4​ta ricui).

14, 15. Isaias rimashcaga imasata pactarira.

¹⁴ Isaias quillcashca huasha 200 huata pasashcaibi shuc soldadoguna Babilonia llactata tucuchingahua pactanaura. Cai soldadogunata pita pushaura. Isaias rimashca shina, Persia llactamanda rey Ciro nishca runa pushaura. Isaias rimashca pactarinalla pishira.

¹⁵ Babiloniata tucuchina tutaga, chi llactaibi causac runagunaga istaunaurami. Cai llactata yacu liyú  muyushca acpi, liyú quinzhashca acpimi paigunaga mana binsibac shina sintirinaura. Ciroga Babilonia chimbamanda paiba soldadogunahuan, allpata allasha yacuta chaquichinaura. Cai yacu chaquiricpi Babilonia llactama purisha chimbanaura. Isaias nishca shina punguta pascasha saquishca anaura. Chasnami soldadogunaga  Babilonia llactata yaicusha mana macanacusha tucuchinaura.

16. a) Babilonia llacta ima tucunatata Isaiasca ñaupata rimara. b) Imaraicuta Isaias rimashca pactarishcami ninchi.

¹⁶ Isaiasca Babilonia llactaibi “mana pihuas causangachu” nirami (Isaias 13:20). Isaias nishca pactarirami. Babilonia llactaga Irak nishca llacta mayanbi maun. Cunanga cai llactaibiga mana pihuas causanzhu. Biblia nishca shina Jehovaga Babilonia llactata chingachirami (Isaias 14:​22, 23). *

17. Imaraicuta Dios rimashcata quirinalla an.

¹⁷ Bibliaibi quillcashcagunaga ña pactarishcaunami. Chiraicumi shamungarauc causaimanda Biblia rimashcata quirinchi. Jehova Allpata paraisota rasha nishcata pactachingami (Tito 1:​2 leipai). Diosca “mana llullac”  chan, chimandami huiñai causaita cui tucushun (Numeros 23:19). *

18. Diospa shimi Bibliaga imatata nin.

¹⁸ Caigamaga Biblia yapa ali libro ashcata yachashcangui. Mana shucta shucta rimasha pandarinzhu, cientificoguna yachachishcamanda rimashaga pasacta intindichin. Chasnallata Bibliaga ali cunaigunata charin, ñaupata rimashcaguna ña pactarishcaunami. Chimandahuas Bibliaga ninmi: “Diospa shimiga ñucanchi shungüibi yaicusha imatas ñucanchi munasha yuyariuctas ricuchin” nisha (Hebreos 4:12 leipai).

19, 20. a) Bibliaga can imasa ashcata ricsingahua imasata yanapan. b) Jehova, Bibliata cumbirashcata yachashaga imasata pagrachushun.

¹⁹ Bibliaga canba causaita cambiana ushanmi. Can imasa ashcata ricsingahua yanapai tucungui. Bibliaga can imasa pinsashcata, imata yuyashcata alita intindingahua yanapai tucungui. Por ejemplo, Diosta llaquinimi ninchi chari. Chasna ashahuas llaquishcata ricuchingahua, Biblia nishcata casuna manchi.

²⁰ Bibliaga Diospa shimi man. Jehovaga Bibliata leisha, estudiasha can paita casuchun munan. Dios Bibliata cumbirashcamanda pagrachuna manchi. Bibliata estudiasha catishami pagrachushcata ricuchingui. Chasna rashami Jehova ñucanchiraicu imata munashcata intindingui. Shuc capituloibi, caimanda mas yachashun.