1, 2. (a) Ama ba ama faring hiyeng e hana mani hiyeng na heimu he kepribadian bay ong kul-kul hiyeng? He falaka wobesar. (b) Yesus hei mu ama lateiur worumai?

RULI taha mia ama ba amakang faring hiyeng nahani hadoa. Hanaisena mia nuku ko hana e hiyeng. Haba hana ong hiyeng, heimu wal wofang ba ong kul-kul hiyeng mbei na. Heimu wal wofang ba hebirang hekiding-kiding ya hebirang hamo mu lateiwuda bay e kul hiyeng.

² Eyal he tung 2.000 mihapieti Yesus Kristus de buku taha mibirang hei, e ko wal mahiy diy. Haba ama faring dewal Yesus hamo hiyeng na. Mani ama wofang Yesus mu ama ba kulkang, wai afena dewofang Yesus mu nabi he nuku ba, ya wai afena ama worumai de Allah. Haba e wotanut mu lateiwuda?​—Hehalal Catatan Hewosik 12.

3. Nalawuhe Allah Yehuwa ya Yesus Kristus mu e kul hiyeng te?

³ Nal hiyeng rofi ba Yesus heimu kul penting ba e hiyeng te. Nalawuhe? Surah Rieling dewofang, ”Heiopi mu birang mihalor hei, heimu ama kul pengetahuan ba eiy de hiyeng, e onakala Allah hiyeng rofi ya, pribadi ba e habot seiy Yesus Kristus.” (Yohanes 17:3) Rofi, nal hiyeng rofi ba Yehuwa ya Yesus hei e hiyeng, birang mihalor ba firdaus buku taha mia e hiyeng kang. (Yohanes 14:6) Hare Yesus hei e hiyeng heimu de omong kang, dedi mu hedosama kang ba lateiur pi birang homi mia ya pi lateiur paneng ba mi ama afena mihadasama. (Yohanes 13:34, 35) Pasal 1 mia, nal hiyeng rofi ba Allah hei  pong wosakolah diy. Yala pi wai wosakolah, Yesus heimu nala he Surah Rieling dewopidasakolah.

4. Wofang ba ”Mesias” ya ”Kristus” mu he arti nala?

⁴ Tung-tung ba Yesus dar hamang na Yehuwa dong Surah Rieling mi wopakang diy ba Mesias ba Kristus mbeimu de siye. Wofang ba ”Mesias” mu loring Ibrani he mimiy, ya wofang ba ”Kristus” mu loring Yunani he mimiy. Gelar ayoki heimu he arti Allah de Mesias miahiy ya heyera ba kulkang he de mi hedi. Nala he Yehuwa dewopakang diy dotafuda Mesias de mipaneng. Yala bay Yesus de omong kang. Haba Yesus dar hamang na amakang faring de midatangar, ’Mahe ko Mesias ba?’

5. Yesus he murid wei worumai ba Yesus mu Mesias rena?

⁵ Yesus he murid wei deworumai nahani ba Yesus mu Mesias ba wopakang diy. (Yohanes 1:41) Hedosama, Simon Petrus de Yesus wohokafang, ”E edi he kul Kristus.” (Matius 16:16) Nalawuhe pi worumai ba Yesus mu kul Mesias?

6. Lateiur Yehuwa de ama homong ba ama Mesias hiyeng?

⁶ Lunga Yesus dar hamang na, Allah he nabi de nal faring wobileni ba de pomong pi Mesias hiyeng kang. Lateiur? Hedosama ama abot ya Terminal ba amakang faring mia ba ama ba e wal hiyeng na hareng lak. Ama hedi he falaka ama ngwo okafani diy hare ama hedi e hiyeng kang. Hedosama eyala wuda nala he Mesias de mipaneng ya de midalek hei, Yehuwa dong de nabi puna ba he falaka wopokafani diy. Hare ngwofani hediwei mihayei diy, ama ba homi damasing homong kang ba de hiyeng Yesus mu kul Mesias.

7. Nala he nabi ayoki de wofani dewotiyeng diy ba Yesus mu Mesias?

 ⁷ Hedosama ayoki ngwofani opi hehalal. Nuku, tung 700 ba Yesus dara hamang na, Nabi Mikha dong wofani ba Mesias mu kota kiding ba Betlehem mihamang. (Mikha 5:2) Ya, Yesus kul hei mihamani diy! (Matius 2:1, 3-9) He ayoki, Daniel dong wofani ba tung 29 M Mesias dekul siye. (Daniel 9:25) Heimu dar hedosama ayoki ba ngwofani faring, dekul wotiyeng diy ba Yesus mu Mesias ba wopakang diy.​—Hehalal Catatan Hewosik 13.

8, 9. Yesus hei baptis mia nala he midaleki diy ya de wotiyeng diy ba Yesus mu Mesias?

⁸ Yehuwa de he falaka paneng ba Yesus mu kul Mesias. Allah de Yohanes Pembaptis hadapakang ba de tanda her ba de Mesias hiyeng kang. Yesus de Yohanes hopaya ba de Uli Yordan  mia hei baptis diy tung 29 M ba tanda hei Yohanes de hiyeni diy. Nala he midalek, nala he daleki Surah Rieling dewobesar, ”Yesus hei baptis wosiki de dar iya mia, ya, halal! Adiy taber ya de halal Allah he simoi mesei hedosama merpati nuku wuda. Halal! Wai, hamau nuku mar adiy mi besar dewofang, ’Opi he ne Wil Neng, ba ne mihiyena ya dedi he nomi hoyai.’” (Matius 3:16, 17) Hedimia Yohanes dong tanda hedi hiyeng ya mahiy hare de hiyeng Yesus mu Mesias. (Yohanes 1:32-34) Heimia Yehuwa de Simoi de miy Yesus dotausai  ya leng hedimia bay dong Mesias. Dedi he Allah de miahiy ba Pipong puna ya Lei.​—Yesaya 55:4.

⁹ Ngwofani ba Surah Rieling homi mia, Yehuwa donakala besar, ya tanda ba Yesus hei baptis mia de wotiyeng diy ba, Yesus mu kul Mesias. Haba de ya teihe misiyei ya hamo mu lateiwuda? Mie pi hehalal nala he Surah Rieling dewofang.

10. Yesus he birang ba de dara buku tauseina nala he Surah Rieling dewopidasakolah?

¹⁰ Surah Rieling dewopidasakolah ba Yesus mu de dar buku opi tausei na de lunga he surga mibirang. Mikha dewofang Mesias mu ”asing mia he dong hadoa”. (Mikha 5:2) Yesus donakala dawa he yera nuku mibesar ba, dewofang de dara buku tausei na de lunga he mara surga mibirang. (Mihalal Yohanes 3:13; 6:38, 62; 17:4, 5.) Yesus de dara buku tausei na Yehuwa dilia danaisena mu kulkang.

11. Nalawuhe Yesus mu nal hebeli daliela wuda ba Yehuwa mihadasama?

¹¹ Yesus mu Yehuwa hapomareng mia nal hebeli daliela wuda. Nalawuhe? Heimu nal karikarnuku dar paneng na Allah dong hei paneni. Hare Yesus mu ”hatang pakang ahola”. * (Kolose 1:15) Yesus bay nal hebeli daliela ba Yehuwa mihadasama mbeimu he donakala Yehuwa de la hei paneni. Heiwuhe he alasan ba mihor mu ”Wil Neng nuku wala ba donakala”. (Yohanes 3:16) Hare Yesus he donakala Yehuwa de puna ba nal karikarnuku afena paneni. (Kolose 1:16) Ya, Yesus bay ”Firman”, heimu Yehuwa de hei puna ba pakang ya parentah miy malaikat ya amakang wei wohokafang.​—Yohanes 1:14.

12. Nalawuhete pi worumai ba Yehuwa ya Yesus mu pribadi ba waldosama na?

¹² Amakang faring deworumai ba Yesus ya Allah mu Pribadi ba ladosama. Haba wal hedi he Surah Rieling dewopidasakolah  na. Surah Rieling dewofang ba Yesus mu la hei paneni, hare Yesus mu he ahola hadoa. Haba Yehuwa ba nal karikarnuku paneni he ahola mu walna. (Mazmur 90:2) Yesus de Allah hewil haba dewal wotanut ba de Allah wuda na. Surah Rieling de he falaka wofang ba Hema tukai daliela miy Wil mihapieti. (Mihalal Yohanes 14:28; 1 Korintus 11:3.) Yehuwa he ”Allah ba Kuasa Midaliela”. (Kejadian 17:1) Mara adiy ya seiy buku taha mia he dedi donakala ama heluk ya herumai hebaharing mu kul lea ba miy afena mihapieti.​—Hehalal Catatan Hewosik 14.

13. Nalawuhe Surah Rieling dewofang ba Yesus mu ”Allah hamo ba wal woreya na”?

¹³ Tung miliaran ba adiy ya buku opi dar paneng na Yehuwa ya Hewil Neng, Yesus, dilia midiyena ba la sama awang. Heiwuhe dilia kul midiyena! (Yohanes 3:35; 14:31) Yesus dekul Dema he sifat haluol, heiwuhe Surah Rieling dewofang ba ”dedi mu Allah hamo ba wal woreya na”.​—Kolose 1:15.

14. Lateiur te Yehuwa Hewil Neng mu amakang mihamani diy?

¹⁴ Yehuwa hewil opi domaha surga doiti ba buku taha mi siyei ba amakang mihamani diy. Lateiur midalek? Yehuwa de mukjizat puna hewil hebirang ba mar surga mia miy mol perawan nuku hana he Maria hefah mihatani. Hare herofi mu Yesus hema amakang walna. Hare wil ba kulrofi he Maria de hamani ba de hana hadou diy ba Yesus.​—Lukas 1:30-35.

15. E lateiur Yehuwa hiyeng woheikang?

¹⁵ Yesus hei e faring wosakolah kang, he birang hei ya he sifat-sifat hei e Surah Rieling mihalal Matius, Markus,  Lukas ya Yohanes. Buku hedi ama hiyeng hana he Injil. Mbeimu Yesus de Dema wuda, hare nala he e mihalal de omong kang ba e Yehuwa hei faring hiyeng woheikang. Heiwuhe Yesus dewofang, ”Mahe nehalal dong hadou Nema hehalal.”​—Yohanes 14:9.

16. Nala he Yesus dewopidasakolah diy? Ya Yesus dewopidasakolah mu heiyeri ya teihe mia?

¹⁶ Amakang faring de Yesus hor mu ”Guru”. (Yohanes 1:38; 13:13) Nal nuku ba tukai penting he dewopidasakolah, heimu ”maring kang ba Kerajaan Allah hei”. Kerajaan hedi mu nala? Heimu Allah he Parentah ba ruli dolea de wokuasa mara surga mia sei buku taha ref, ya ama ba Allah heluk de oweni miy her nahani. (Matius 4:23) Nala he Yesus dewotadasakolah Yehuwa he heiyeri. Yesus dewofang, ”Nala he ne woridasakolah wal nei na, haba nima hei.” (Yohanes 7:16) Yesus de hiyeng ba Yehuwa domaha amakang wei de maring kang womahiya ba Allah he Kerajaan de ruli opi woparentah.

17. Yesus de ya teihe mi ama wohadasakolah? Nalawuhe de tukai awang ba ama afena wohadasakolah?

¹⁷ Yesus de ya teihe mitadasakolah? Ya tei-tei mia ba de ama hiyeng. Woya desa, kota, afeng, anu hiyeng, ibadat heyeng ya ama hetofa de ama wohadasakolah. Dewal ama hofaling ba ama he hopa siye na. Haba Yesus he ama hei tahai. (Markus 6:56; Lukas 19:5, 6) Yesus de tukai awang, he leng faring ya derumai debaharing de puna ama wohadasakolah. Nalawuhe? Heimu de hiyeng hedi Allah hedomaha ya de Dema heluk wuhe. (Yohanes 8:28, 29) Yesus homi ama afena hedatoka wuhe, de maring kang wobesar. (Mihalal Matius 9:35, 36.) De hehalal agama he pemimpin wei nal hiyeng rofi ba Allah ya he kerajaan hei dewal miy ama wohadasakolah  na. Hare domaha amakang faring homong ba maring kang womahia.

18. Yesus he sifat teihe kul omi hafik?

¹⁸ Yesus dekul ama mihiyena ya homi hedatoka. Dedi mu sadafalasing wuhe ama dohomamaha. Kano fila wei bay dohohopa. (Markus 10:13-16) Yesus hepak hepaneng mu dewal aroi mitahani na. Nal beka ya wal rofi hapuna na dohoaiy. (Matius 21:12, 13) Yesus he masa mia mu ama mol ama wal heluk na, ya nala ba hei bay ama wal her na. Haba Yesus mu de ama mol heluk, ya de kang paneng ba mihadasama. (Yohanes 4:9, 27) Yesus bay kul-kul homi damasing. Hedosama akuni nuku de demurid wei hetoki wolani heiopi ama ba hui he mipapaneng te.​—Yohanes 13:2-5, 12-17.

19. Hedosama nala he dewotiyeng diy ba nala he ama domaha Yesus de hiyeng ya deidomaha de homong nahani?

¹⁹ Nala he ama kul-kul domaha Yesus de hiyeng, hare de homong nahani. He bukti mu de Allah he kuasa puna mukjizat paneng ba ama hado kang. (Matius 14:14) Hedosama neng nuku ba koti rawang homadiy de Yesus hopa siye ba de wohokafang, ”Omaha mati e paneng ba no kang diy.” Ama hafiy hedi he harik Yesus de hehalal homi hedatoka ya domaha homong ba mi hakang. Hare Yesus de datang hehatol ba de wohokafang, ”Nomaha! Ne paneng ba e mikang diy.” Ya ama hafiy hedi kul mikang diy! (Markus 1:40-42) E wotanut ama neng hedi homi lateiwuda?

20, 21. Nalawuhe Allah hadakor mu Yesus de hedosama ba kulkang?

²⁰ Allah heluk mu Yesus hedosama ba kulkang. Nala he midaleki, ya nala he hetakel wei de paneng ba  mihadasama bay de Dema hadakor iti. Hedosama, Setan de homi hol haba Yesus dewal hasalah mipaneng na. (Matius 4:1-11) Yesus henang henaha kabei dewal worumai ba Yesus mu Mesias, ya dewofang nahani ba Yesus mu ”hetanut kang nawi”, haba Allah he awang mu Yesus dekul mipaneng iti. (Markus 3:21) Hetakel wei de bekatafiela mihadasama bay Yesus de Dema hadakor iti, ya dewal ama hohawai na.​—1 Petrus 2:21-23.

²¹ Yesus de bekatafiela, tahupang kadia ya mong hadatareu haba de Yehuwa hadakor iti. (Mihalal Filipi 2:8.) Wotanut leng ba domong peya nala he de hadatareu. Ama hapuni diy, saksi ba wal hiyeng rofi na de Yesus hado maniyeng, hakim ba beka de he hasalah wofang, ama faring hopayei, ya prajurit de bol balaki  ya ama hatel tilaki diy. Dong domong peya dewofang, ”Ngkani!” (Yohanes 19:30) Yesus moni ba leng mi sua Yehuwa deng habirang diy, yala de simoi wuda ba tiyeng puna hehal beka. (1 Petrus 3:18) Minggu kabei mitawi Yesus de dawai surga miyai de, ”Allah hatang kang harena mimiti”, ya de woharosa ba de Lei.​—Ibrani 10:12, 13.

22. Yesus de Dema hadakor iti yala nala he pi hiyeng kang?

²² Yesus de Dema hadakor iti wuhe pidi yala birang mihalor ba Firdaus mia pi hiyeng kang, heiopi mu Yehuwa he domaha. Pasal hewohaluol pi wai wosakolah lateiur te Yesus he moni de pomong ba pi birang mihalor kang.