1, 2. (a) Tika ada itwero wacci ingeyo ngat mo ma oywek ka ingeyo nyinge keken? Tit kong. (b) Ngo ma dano giye i kom Yecu?

TYE dano mapol ma guywek i wi lobo-ni. Romo bedo ni ingeyo nying ngat mo ma oywek. Ento kadi bed ingeyo nyinge, pe te lokke ni dong ingeye maber. Pe te lokke ni ingeyo lok ducu ma i kome ki kit dano ango ma en obedo.

² Romo bedo ni dong iwinyo pi Yecu Kricito, kadi bed en okwo i lobo mwaki makato 2,000 angec. Kadi bed kit meno, jo mapol pe gingeyo kit dano ango ma Yecu obedo. Jo mogo giwacci en obedo laco ma kite ber, jo mukene giwacci en obedo lanebi, dok jo mukene gitamo ni en obedo Lubanga. In kono itamo ningo?—Nen Lok me Giko Buk Man me 12.

3. Pingo pire tek pi in me ngeyo Lubanga Jehovah ki Yecu Kricito?

³ Pire tek pi in me ngeyo lok ada i kom Yecu. Pingo? Baibul wacciwa ni: ‘Man en kwo ma pe tum, ni ginge in Lubanga acel me ada, ki Yecu Kricito ma yam ioro.’ (Jon 17:3) Ada, ka ingeyo lok ada i kom Jehovah ki Yecu, itwero nongo kwo ma pe tum i paradic i lobo kany. (Jon 14:6) Medo i kom meno, ngeyo lok i kom Yecu bikonyi pien en aye lanen ma pud dong ber loyo i kom kit me kwo ki kit me tero jo mukene. (Jon 13:34, 35) I Dul me 1, wapwonyo lok ada i kom Lubanga. Kombeddi, kong dong wanenu gin ma Baibul pwonyo i kom Yecu.

4. Nying dog tic me “Meciya” ki “Kricito” tyen lokke ngo?

⁴ Con ma peya kinywalo Yecu, Jehovah onongo ocikke i Baibul ni ebicwalo Meciya, nyo Kricito. Nyig lok me “Meciya” oa ki i leb Ibru, ki “Kricito” oa ki i leb Grik. Nying dog tic magi ducu loko i kom ngat ma Lubanga onongo biwiro ci miye rwom ma pire tek. Meciya bimiyo cikke pa Lubanga ducu cobbe kakare. Yecu bene twero konyi i kare-ni. Ento ma peya kinywalo Yecu, jo mapol gubedo ka penye kekengi ni, ‘Meciya mono bibedo nga?’

5. Lupwonnye pa Yecu tika onongo giye ni en aye Meciya?

⁵ Lupwonnye pa Yecu onongo gipe ki akalakala mo ni en aye Meciya ma giciko pire-ni. (Jon 1:41) Me labolle, Cimon Petero owaco bot Yecu ni: “In i Kricito.” (Matayo 16:16) Watwero mokone nining ni Yecu aye Meciya?

6. I yo ango ma Jehovah okonyo kwede jo ma cwinygi tye atir me ngeyo anga ma Meciya obedo?

⁶ Con ma peya kinywalo Yecu, lunebi pa Lubanga gucoyo lok mapol ma onongo bikonyo dano me ngeyo Meciya. I yo ma nining? Go kong ni kiwacci ni iwot i bac pak ka gamo ngat mo ma peya irwatte kwede. Ka kitito boti maber kit ma ngat meno nen kwede, ci itwero nonge. I yo acel-lu, Jehovah otiyo ki lunebine me tittiwa gin ma Meciya bitimone ki gin ma bitimme i kom Meciya. Cobbe pa lok pa lunebi magi konyo jo ma cwinygi atir me ngeyo ni Yecu obedo Meciya.

7. Lok pa lunebi aryo mene ma ginyuto ni Yecu aye obedo Meciya?

⁷ Kong wanenu lok pa lunebi aryo ma lubbe ki  Meciya. Mukwongo, mwaki 700 ma peya kinywalo Yecu, lanebi Mika otito ni kibinywalo Meciya i boma matidi me Beterekem. (Mika 5:2) Dok kinywalo Yecu i boma meno kikome! (Matayo 2:1, 3-9) Me aryo, lanebi Daniel otito ni Meciya onongo bibino i mwaka 29 K.M. (Daniel 9:25) Magi obedo lok pa lunebi aryo keken i kin mapol ma ginyuto ka maleng ni Yecu aye Meciya ma kiciko pire-ni.—Nen Lok me Giko Buk Man me 13.

8, 9. Ngo ma otimme i kare ma Yecu onongo batija ma onyuto ka maleng ni en aye Meciya?

⁸ Jehovah onyuto ka maleng ni Yecu aye Meciya. Lubanga ocikke me miyo lanyut mo bot Jon Labatija wek en onge ngat ma Meciya obedo. I kare ma Yecu ocito bot Jon wek enong batija i Kulu Jordan i mwaka 29 K.M., Jon oneno lanyut meno. Baibul wacciwa gin mutimme: “I kare ma dong gityeko batija Yecu, ci en okatti woko ki i pii oyotoyot; cutcut polo oyabbe, ci oneno cwiny maleng pa Lubanga ma bino kun lyanne piny macalo akuri, ci opye i kome. Ci dwan ocako winnye ma a ki i polo ma wacci, ‘Man aye Woda ma amare, ma cwinya yom i kome.’” (Matayo 3:16, 17). I kare ma Jon oneno lanyut ki wange dok owinyo ki ite, en ongeyo ni Yecu aye Meciya. (Jon 1:32-34) I nino meno, ma Jehovah oonyo cwiny mere i kom Yecu, en  odoko Meciya. En ngat ma Lubanga ocimo me bedo Laloc ki Kabaka.—Icaya 55:4.

⁹ Lok pa lunebi me Baibul, lok ma oa ki i dog Jehovah, ki dong lanyut ma En omiyo i kare ma Yecu onongo batija moko ni Yecu aye Meciya. Ento Yecu mono oa ki kwene, dok en obedo dano ma nining? Kong wanenu gin ma Baibul waco.

10. Gin ango ma Baibul pwony i kom kwo pa Yecu ma peya obino i lobo?

¹⁰ Baibul pwonyo ni Yecu okwo i polo pi kare malac ma peya obino i lobo. Mika owaco ni Meciya oa wa “i kare macon mada.” (Mika 5:2) Yecu kikome owaco tyen mapol ni ebedo i polo ma peya kinywale macalo dano i lobo. (Kwan Jon 3:13; 6:38, 62; 17:4, 5.) Kadi bed ma Yecu peya obino i lobo, en onongo tye ki wat macok mada ki Jehovah.

11. Pingo Yecu pire tek mada bot Jehovah?

¹¹ Yecu pire tek mada bot Jehovah. Pingo? Pien Lubanga ocweyo en mukwongo ma peya ocweyo jami ki dano mukene-ni. Pi meno, kilwongo Yecu ni “latin kayo me ginaketa ducu.” * (Jo Kolocai 1:15) Jehovah bene maro Yecu mada pien en keken aye Jehovah ocweyo en kikome. Man aye gin mumiyo kilwonge ni “Wode acel keken.” (Jon 3:16) Yecu keken aye bene Jehovah otiyo kwede me cweyo jami mukene-ni ducu. (Jo Kolocai 1:16) Yecu keken aye bene kilwongo ni “Lok,” pien Jehovah otiyo kwede me tito lokke bot lumalaika ki dano.—Jon 1:14.

12. Wangeyo nining ni Yecu ki Lubanga pe girom?

¹² Jo mukene giwacci Yecu ki Lubanga girom aroma. Ento meno pe obedo gin ma Baibul pwonyo. Baibul wacci kicweyo Yecu acweya, ma te lokke ni Yecu gire obedo ki acakkine. Ento Jehovah, ma ocweyo jami ducu-ni, acakkine pe. (Jabuli 90:2) Macalo  Wod pa Lubanga, Yecu pe otemme me bedo Lubanga. Baibul otito atir ka maleng ni Won dit kato Wod. (Kwan Jon 14:28; 1 Jo Korint 11:3.) Jehovah keken aye obedo “Lubanga Won Twer Ducu.” (Acakki 17:1) En aye ngat ma pud dong dit dok tek loyo i polo ki lobo.—Nen Lok me Giko Buk Man me 14.

13. Pingo Baibul waco ni Yecu obedo “cal pa Lubanga ma pe nen-ni”?

¹³ Jehovah ki Wode Yecu gutiyo kacel pi mwaki bilion mapol ma polo ki lobo onongo peya kicweyogi. Myero obed ni onongo gimarre mada! (Jon 3:35; 14:31) Yecu obedo ka nyuto kit wonne kikome, mumiyo Baibul lwonge ni “cal pa Lubanga ma pe nen-ni.”—Jo Kolocai 1:15.

14. I yo ango ma kinywalo kwede Wod pa Jehovah ma pire tek-ki macalo dano?

¹⁴ Wod pa Jehovah man ma pire tek tutwal-li oweko polo labongo dic mo wek kinywale i lobo macalo dano. Man otwere nining? Jehovah otimo tango i kare ma onako kwo pa latinne ki i polo ci oketo i i Maliam ma onongo peya ongeyo laco. I yo man, onongo pe mitte ni Yecu obed ki wonne ma dano. Pi man Maliam onywalo wode ma pe ki roc, ci kicako nyinge ni Yecu.—Luka 1:30-35.

15. Waromo ngeyo Jehovah nining?

¹⁵ Itwero pwonyo jami mapol i kom Yecu, kwone, ki kite, ka ibedo ka kwano bukke pa Matayo, Marako, Luka, ki Jon. Bukke magi kilwongogi ni Jiri. Kit macalo Yecu olubo kit wonne macok-ki, gin ma ibikwano i kom Yecu bikonyi me ngeyo Jehovah bene  maber. Man aye gin mumiyo Yecu owaco ni: “Ngat ma oneno an dong oneno Won.”—Jon 14:9.

16. Gin ango ma Yecu opwonyo? Pwony pa Yecu oa ki kwene?

¹⁶ Dano mapol onongo gilwongo Yecu ni “Lapwony.” (Jon 1:38; 13:13) Gin ma pire tek ma en opwonyo aye “lok me kwena maber me Ker pa Lubanga.” Ker meno obedo gin ango? Obedo gamente pa Lubanga ma biloyo lobo ki i polo dok bikelo mot bot dano ducu ma gin luwiny bot Lubanga. (Matayo 4:23) Jami ducu ma Yecu opwonyo oa ki bot Jehovah. Yecu owaco ni: “Pwony ma apwonyo pe mera kikoma, ento pa ngat ma ceng oora.” (Jon 7:16) Yecu onongo ngeyo ni Jehovah mito ni jo ducu gunge lok me kwena maber man ni Ker pa Lubanga aye biloyo lobo.

17. Yecu opwonyo ki ka kwene? Pingo en otiyo matek me pwonyo dano?

¹⁷ Yecu opwonyo ki ka kwene? Ka mo keken ma en onongo iye dano. En opwonyo i kin paci, boma, caro, cuk, i kacokke, ki i gangi pa dano. En pe obedo ki tam ni dano aye myero gubin bote. Pol kare, en aye onongo woto botgi. (Marako 6:56; Luka 19:5, 6) Yecu otiyo matek ki kerone dok ocwalo cawa malac i pwonyo dano. Pingo? Pien en onongo ngeyo ni Lubanga mito ni etim tic meno dok bene en onongo woro dog Wonne kare ducu. (Jon 8:28, 29) Yecu bene otito kwena pien en onongo paro pi dano mada. (Kwan Matayo 9:35, 36.) En oneno ni lupwonye dini onongo pe gipwonyo lok ada i kom Lubanga ki Ker-re. Dong en onongo mito konyo jo mapol kit ma en twero me winyo kwena maber-ri.

18. Kit pa Yecu mene ma in imaro tutwal?

 ¹⁸ Yecu obedo laco ma maro dano dok paro pigi. En onongo lakica dok lok kwede yot. Kadi wa lutino onongo gimaro bedo bote. (Marako 10:13-16) Yecu pe opoko kin dano. En onongo dag camucana ki ngolo kop alenga. (Matayo 21:12, 13) En okwo i kare ma onongo kidiyo mon, pe kiworogi dok kiterogi marac. Kadi bed kit meno, Yecu onongo tero mon i yo maber dok ki woro. (Jon 4:9, 27) Yecu bene onongo obedo ngat mamwol. Me labolle, i otyeno mo acel en olwoko tyen lukwenane, kun meno onongo obedo tic ma opii aye timo.—Jon 13:2-5, 12-17.

19. Labol ango ma nyuto ni Yecu onongo ngeyo miti pa dano dok bene mito konyogi?

¹⁹ Yecu onongo ngeyo gin ma dano ducu mito, dok en onongo mito konyogi. Man onen ka maleng i kare ma en otiyo ki teko pa Lubanga me cango lutwo. (Matayo 14:14) Me labolle, dano mo ma ladobo obino bot Yecu ci owacce ni: “Ka imito, itwero lonyo koma.” Yecu owinyo malit pi arem ki canne pa laco-ni. Kica omake i kom laco-ni dok onongo mito konye. Pi meno, Yecu oryeyo bade ci ogudo kom laco-ni kun wacce ni: “Amito; komi olony.” Laco ma kome lit-ti otugi cang woko! (Marako 1:40-42) Tam kong kit ma laco ma tye ki dobo-ni owinyo kwede!

20, 21. Pingo waromo wacci Yecu aye pud dong lanen maber loyo me bedo lawiny bot Lubanga?

²⁰ Yecu obedo lanen maber loyo me bedo lawiny bot Lubanga. Kadi bed en owok ki peko mapol dok lumonene gutere marac, en omedde ki bedo lagen  bot Wonne. Me labolle, Yecu pe otimo bal i kare ma Catan otemo bite. (Matayo 4:1-11) Lupaco pa Yecu kikome pe guye ni Yecu obedo Meciya dok guwaco ni “en opo woko,” ento Yecu omedde ameda ki timo tic pa Lubanga. (Marako 3:21) I kare ma lumone pa Yecu gudoko ger i kome, en omedde ki bedo lagen bot Lubanga dok pe otemo keto awano i komgi.—1 Petero 2:21-23.

²¹ Kadi bed Yecu oto ki twon arem malit ma giketo i kome, en obedo lagen bot Jehovah. (Kwan Jo Pilipi 2:8.) Tam kong twon alany ma en owoto ki iye i nino me tone. Kimake, lucaden ma lugoba guwaco ni en oyeto Lubanga, lungolkop alenga gungolo to i wiye, lwak guyete, dok bene acikari gupwode magwar ka  dong gigure i kom yat. I kare ma en cok to, okok ki dwan malongo ni: “Dong otum.” (Jon 19:30) I nge nino adek ma Yecu dong oto woko, Jehovah ocere ka omiye kom me cwiny. (1 Petero 3:18) I nge cabit mogo manok, Yecu odok i polo ci “obedo piny i nget Lubanga tung acuc,” kun kuro kare ma Lubanga bikete macalo Kabaka.—Jo Ibru 10:12, 13.

22. Gen ango ma wan watye kwede kombeddi pien Yecu obedo lagen bot Wonne?

²² Kit ma Yecu obedo lagen bot Wonne-ni, wan dong watye ki gen me kwo pi naka i paradic i lobo kany, kit ma Jehovah ociko kwede. I dul ma lubo man, wabinyamo kit ma to pa Yecu omiyo twere piwa me bedo kwo pi naka.