1, 2. (a) Masasabi mo daw na talagang bistado mo na an sarong sikat na tawo kun pangaran sana niya an aram mo? Ipaliwanag. (b) Ano an paniniwala kan mga tawo manungod ki Jesus?

KADAKUL nin sikat na tawo sa kinaban. Tibaad may aram ka nganing pangaran nin sarong sikat na tawo. Pero dai buot sabihon na miling aram mo an pangaran niya bistado mo na talaga siya. Dai iyan nangangahulugan na aram mo na an gabos na detalye kan buhay niya saka an saiyang pagkatawo.

² Posibleng may mga nadangog ka na manungod ki Jesu-Cristo, maski ngani nabuhay siya digdi sa daga mga 2,000 na taon na an nakaagi. Pero dakul an dai nakakaaram kun siisay talaga si Jesus. May mga nagsasabi na saro siyang marahay na tawo, propeta siya sabi kan iba, asin may mga naniniwala man na siya an Diyos. Ano sa hiling mo?—Hilingon an Dagdag na Impormasyon 12.

3. Taano ta importanteng mamidbid mo an Diyos na Jehova asin si Jesu-Cristo?

³ Importanteng maaraman mo an katotoohan manungod ki Jesus. Taano? Sinasabi sa sato kan Bibliya: “Ini nangangahulugan nin buhay na daing katapusan, na mamidbid ninda ika, an iyo sanang tunay na Diyos, asin an saro na saimong isinugo, si Jesu-Cristo.” (Juan 17:3) Iyo, kun aram mo an katotoohan mapadapit ki Jehova asin ki Jesus, puwede kang mabuhay nin daing sagkod sa paraiso digdi sa daga. (Juan 14:6) Saro pa, makakatabang saimo pag namidbid mo si Jesus ta siya an pinakamarahay na halimbawa nin  tamang pamumuhay asin pagtrato sa iba. (Juan 13:34, 35) Sa Kapitulo 1, naaraman ta an katotoohan manungod sa Diyos. Aramon ta ngunyan an itinutukdo kan Bibliya mapadapit ki Jesus.

4. Sa ano nanunungod an “Mesiyas” asin “Cristo”?

⁴ Dakul na taon bago pa mamundag si Jesus, sinasabi sa Bibliya na nanuga si Jehova na isusugo niya an Mesiyas, o Cristo. An tataramon na “Mesiyas” hali sa Hebreong lengguwahe, asin an tataramon na “Cristo” hali sa Griego. Pareho ini nanunungod sa saro na pinili nin Diyos para sa sarong espesyal na posisyon. Maaaraman mo na uutubon kan Mesiyas an gabos na panuga nin Diyos. Manunudan mo man kun paano ka makikinabang ngunyan sa mga ginibo ni Jesus kan yaon siya sa daga. Pero bago mamundag si Jesus, dakul an naghahapot, ‘Siisay an magigin Mesiyas?’

5. Naniwala daw an mga disipulo ni Jesus na siya an Mesiyas?

⁵ Sigurado an mga disipulo ni Jesus na siya an ipinanugang Mesiyas. (Juan 1:41) Halimbawa, sinabi ni Simon Pedro ki Jesus: “Ika an Cristo.” (Mateo 16:16) Paano kita makakasigurado na si Jesus an Mesiyas?

6. Paano tinabangan ni Jehova an sinserong mga tawo na mamidbid kun siisay an Mesiyas?

⁶ Haloy pa bago mamundag si Jesus, nagsurat an mga propeta nin Diyos nin dakul na detalye na makakatabang sa mga tawo na mamidbid kun siisay an Mesiyas. Paano iyan nakatabang? Sabihon tang sinugo ka na sabaton sa matawong terminal an sarong tawo na dai mo pa lamang nahiling. Kun may magtao saimo nin detalyadong deskripsiyon kan tawong iyan, madali mo siyang mahahanap. Sa kaagid na paagi, ginamit ni Jehova an saiyang mga propeta para sabihon sa sato an mga gigibuhon kan Mesiyas asin kun ano an mga mangyayari sa saiya. An pagkautob kan gabos na  propesiyang idto makakatabang sa sinserong mga tawo na mamidbid si Jesus bilang an Mesiyas.

7. Ano an duwang propesiyang nagpapatunay na si Jesus an Mesiyas?

⁷ Uni an duwa sa mga propesiya. Inot, 700 na taon bago mamundag si Jesus, sinabi ni Miqueas na an Mesiyas mamumundag sa sadit na banwa nin Betlehem. (Miqueas 5:2) Diyan man nanggad namundag si Jesus! (Mateo 2:1, 3-9) Ikaduwa, sinabi ni Daniel na matunga an Mesiyas sa taon 29 C.E. (Daniel 9:25) Duwa sana iyan sa dakul na propesiyang malinaw na nagpapatunay na si Jesus an ipinanugang Mesiyas.—Hilingon an Dagdag na Impormasyon 13.

8, 9. Ano an nangyari kan bawtismuhan si Jesus na nagpapatunay na siya an Mesiyas?

⁸ Nagtao pa si Jehova nin malinawon na patunay na si Jesus an Mesiyas. Nanuga an Diyos na tatawan niya si Juan na Parabawtismo nin sarong tanda para maaraman kaini kun siisay an Mesiyas. Nahiling ni Juan an tanda na iyan kan magduman sa saiya si Jesus para magpabawtismo sa Salog nin Jordan kan taon 29 C.E. Iinistorya kan Bibliya an nangyari: “Pagkatapos mabawtismuhan, naghawas tulos si Jesus sa tubig; asin uya! nabuksan an kalangitan, asin nahiling niya an espiritu nin Diyos na nagbababa na arog nin salampati asin pasiring sa saiya. Siring man, sarong boses hali sa kalangitan an nagsabi: ‘Ini an sakuyang Aki, an namumutan, na sakong inuuyunan.’” (Mateo 3:16, 17) Kan mahiling asin madangog ni Juan an tandang ini, nasigurado  niyang si Jesus an Mesiyas. (Juan 1:32-34) Kan aldaw na iyan nagin Mesiyas si Jesus, kan ibinubo sa saiya ni Jehova an Saiyang espiritu. Siya an pinili nin Diyos na magin Lider asin Hadi.—Isaias 55:4.

⁹ An mga propesiya sa Bibliya, an sinabi mismo ni Jehova, asin an tanda na itinao Niya kan bawtismuhan si Jesus nagpapatunay na si Jesus an Mesiyas. Pero sain hali si Jesus, asin ano an mga karakteristiko niya? Hilingon ta kun ano an sinasabi kan Bibliya.

10. Ano an itinutukdo kan Bibliya mapadapit sa buhay ni Jesus bago magdigdi sa daga?

¹⁰ Itinutukdo kan Bibliya na haloy nang nabubuhay si Jesus sa langit bago pa siya magdigdi sa daga. Sinabi ni Miqueas na “kaidto pang suanoy na mga panahon” an pinaghalian kan Mesiyas. (Miqueas 5:2, NW) Dakul na beses man na sinabi mismo ni Jesus na nabuhay na siya sa langit bago pa siya mamundag bilang tawo. (Basahon an Juan 3:13; 6:38, 62; 17:4, 5.) Bago pa man magdigdi si Jesus sa daga, espesyal na an pag-ibanan ninda ni Jehova.

11. Taano ta namumutan na marhay ni Jehova si Jesus?

¹¹ Namumutan na marhay ni Jehova si Jesus. Taano? Huling siya an pinakainot sa ano man o sa siisay man na linalang nin Diyos. Kaya inaapod si Jesus na “an panganay sa gabos na linalang.” * (Colosas 1:15) Namumutan man na marhay ni Jehova si Jesus ta siya sana an direktang linalang ni Jehova. Iyan an dahilan kaya inaapod siyang an “bugtong na Aki.” (Juan 3:16) Saka si Jesus sana an ginamit ni Jehova sa paglalang kan iba pang mga bagay. (Colosas 1:16) Asin si Jesus sana an inaapod na “an Tataramon,” huling ginamit siya ni Jehova tanganing magpaabot nin mga mensahe asin instruksiyon sa mga anghel asin tawo.—Juan 1:14.

12. Paano niyato naaraman na si Jesus saka an Diyos bakong saro?

¹² May mga naniniwala na si Jesus saka an Diyos saro sana. Pero bako iyan an itinutukdo kan Bibliya. Sinasabi kan Bibliya na linalang si Jesus, kaya buot sabihon may kapinunan siya. Pero si Jehova, na naglalang kan gabos na bagay, daing kapinunan. (Salmo 90:2) Bilang Aki nin Diyos, dai lamang inisip ni Jesus na magin Diyos siya. Malinaw na  itinutukdo kan Bibliya na an Ama mas urog kisa sa Aki. (Basahon an Juan 14:28; 1 Corinto 11:3) Si Jehova sana an ‘Diyos na Makakamhan sa Gabos.’ (Genesis 17:1) Siya an pinakahalangkaw asin pinakamakapangyarihan na persona sa bilog na uniberso.—Hilingon an Dagdag na Impormasyon 14.

13. Taano ta sinasabi kan Bibliya na si Jesus “an ladawan kan Diyos na dai nahihiling”?

¹³ Bago pa lalangon an langit asin an daga, si Jehova asin an saiyang Aki na si Jesus bilyon-bilyon na taon nang magkaibanan sa saindang mga gibuhon. Siguradong padangat nindang marhay an lambang saro! (Juan 3:35; 14:31) Naarog na marhay ni Jesus an mga karakteristiko kan saiyang ama kaya inaapod siya sa Bibliya na “an ladawan kan Diyos na dai nahihiling.”—Colosas 1:15.

14. Paano nagin posible na mamundag bilang tawo an namumutan na marhay na Aki ni Jehova?

¹⁴ An namumutan na marhay na Aki ni Jehova handang bayaan an langit tanganing mamundag sa daga bilang tawo. Paano iyan nagin posible? Paagi sa milagro, ibinalyo ni Jehova an buhay kan saiyang Aki hali sa langit pasiring sa matris nin sarong birhen na an pangaran Maria. Paagi kaini, dai kinaipuhan ni Jesus na magkaigwa nin tawong ama. Kaya nangaki si Maria nin sarong perpektong aki, asin pinangaranan niya ining Jesus.—Lucas 1:30-35.

15. Paano mo mas mamimidbid pa si Jehova?

¹⁵ Dakul kang manunudan manungod ki Jesus, sa nagin buhay niya, saka sa saiyang mga karakteristiko pag binasa mo an mga libro nin Mateo, Marcos, Lucas, asin Juan. An mga librong ini inaapod na mga Ebanghelyo. Huling si Jesus garo man sana an saiyang Ama, an mga nababasa mo makakatabang man sa saimo na mas mamidbid pa si  Jehova. Iyan an dahilan kaya nasabi ni Jesus: “An siisay man na nakahiling na sa sako nakahiling na man sa Ama.”—Juan 14:9.

16. Ano an itinukdo ni Jesus? Sain hali an mga itinukdo niya?

¹⁶ Dakul an nag-apod ki Jesus na “Paratukdo.” (Juan 1:38; 13:13) An saro sa pinakamahalagang itinukdo niya iyo an “maugmang bareta kan Kahadian.” Ano an Kahadian na ini? Iyan an gobyerno nin Diyos sa langit na mamamahala sa bilog na daga asin matao nin mga bendisyon sa mga tawong nagsusunod sa Diyos. (Mateo 4:23) Hali ki Jehova an gabos na itinukdo ni Jesus. Sinabi niya: “An itinutukdo ko bakong hali sa sako, kundi hali sa saiya na nagsugo sa sako.” (Juan 7:16) Aram ni Jesus na gusto ni Jehova na madangog kan mga tawo an maugmang bareta na an Kahadian nin Diyos mamamahala sa bilog na daga.

17. Sain nagtukdo si Jesus? Taano ta naghinguwa siyang marhay na tukduan an iba?

¹⁷ Sain nagtukdo si Jesus? Maski sain na may tawo. Nagtukdo si Jesus sa mga puwerang lugar, sa mga siyudad, baryo, saudan, mga lugar nin pagsamba, asin sa mga harong. Dai niya hinalat na dulukon siya kan mga tawo. Siya an parating nagdudulok sa sainda. (Marcos 6:56; Lucas 19:5, 6) Naghinguwang marhay si Jesus saka dakul na panahon asin kusog an ginamit niya para tukduan an mga tawo. Taano? Huling aram niyang iyan an gusto nin Diyos na gibuhon niya saka pirmi niya kayang sinusunod an saiyang Ama. (Juan 8:28, 29) Naghulit man si Jesus ta nahirak siya sa mga tawo. (Basahon an Mateo 9:35, 36.) Nahiling niyang dai itinutukdo kan mga lider nin relihiyon an katotoohan manungod sa Diyos asin sa Saiyang Kahadian. Kaya gusto niyang matabangan an mas dakul na tawo sagkod sa mapupuwede na makadangog kan maugmang bareta.

18. Anong mga karakteristiko ni Jesus an pinakagusto mo?

¹⁸ Si Jesus mapagpadangat asin may pagmalasakit sa mga  tawo. Mabuot siya saka madaling dulukon. Gustong-gusto siyang kaiba dawa kan mga aki. (Marcos 10:13-16) Pirming patas an pagtrato niya sa mga tawo. Anggot siya sa pandadaya asin inhustisya. (Mateo 21:12, 13) Kan panahon niya, dikit sana an deretso kan mga babayi asin daing gayo irinerespeto. Pero pirmi sindang tinatrato ni Jesus na may respeto asin dignidad. (Juan 4:9, 27) Mapakumbaba man na marhay si Jesus. Halimbawa, sarong banggi, hinanawan niya an bitis kan saiyang mga apostol, na sa parati ginigibo nin sarong suruguon.—Juan 13:2-5, 12-17.

19. Anong mga halimbawa an nagpapahiling na aram ni Jesus kun ano talaga an kaipuhan kan mga tawo asin na gusto niyang magtabang?

¹⁹ Aram ni Jesus kun ano talaga an kaipuhan kan mga tawo, asin gusto niyang magtabang. Risang-risa ini pag ginagamit niya an kapangyarihan nin Diyos tanganing milagrosong parahayon an mga tawo. (Mateo 14:14) Halimbawa, sarong lalaking may leproso an nagdulok ki Jesus asin nagsabi: “Kun bubuuton mo sana, magigibo mong magin malinig ako.” Nahirak na marhay si Jesus sa lalaki sa nahiling niyang kulog asin pagsakit na namamatian kaini asin gusto niya ining tabangan. Kaya inunat niya an saiyang kamot, dinutan an lalaki, asin sinabi digdi: “Buot ko! Magin malinig ka.” Narahay an lalaki! (Marcos 1:40-42) Isipa na sana kun ano an namatian kan lalaking idto!

20, 21. Taano ta si Jesus an pinakamarahay na halimbawa sa pagigin masinunod sa Diyos?

²⁰ Si Jesus an pinakamarahay na halimbawa sa pagigin masinunod sa Diyos. Ano man an mangyari o ano man an gibuhon kan mga kaiwal niya, maimbod siya sa saiyang Ama. Halimbawa, dai nagkasala si Jesus kan tentaran siya ni Satanas. (Mateo 4:1-11) Maski ngani may mga kapamilya si  Jesus na dai naniwalang siya an Mesiyas asin nagsabing “nararaot na an isip niya,” nagpadagos lang si Jesus sa ipinapagibo saiya kan Diyos. (Marcos 3:21) Dawa ngani nagin maisog sa saiya an mga kaiwal niya, padagos siyang nagin maimbod sa Diyos asin nungka niyang pinurbaran na magbalos sa sainda.—1 Pedro 2:21-23.

²¹ Dawa kaidtong nag-agi si Jesus nin daing hirak asin makulugon na kagadanan, padagos siyang nagin maimbod ki Jehova. (Basahon an Filipos 2:8.) Isip-isipa an sakit na tinagalan niya kan aldaw na magadan siya. Inaresto siya, inakusaran nin paglanghad kan mga testigong putikon, sinentensiyahan kan koraptong mga hukom, pigngirisihan kan mga tawo, pinasakitan kan mga suldados, tapos ipinako sa harigi. Kan naghihingagdan na siya, sinabi niya:  “Nautob na!” (Juan 19:30) Tulong aldaw pagkagadan ni Jesus, binuhay siya ni Jehova asin tinawan nin hawak na espiritu. (1 Pedro 3:18) Pagkatapos nin pirang semana, nagbalik si Jesus sa langit, “tuminukaw sa tuo nin Diyos,” asin naghalat sagkod na gibuhon siyang Hadi.—Hebreo 10:12, 13.

22. Huli sa pagigin masinunod ni Jesus sa saiyang Ama, nagkaigwa kita ngunyan nin anong oportunidad?

²² Huling padagos na nagin maimbod si Jesus sa saiyang Ama, igwa kita ngunyan nin oportunidad na mabuhay nin daing sagkod sa sarong paraisong daga, arog kan talagang katuyuhan ni Jehova. Sa sunod na kapitulo, pag-uulayan ta kun paano nagin posible na mabuhay kita nin daing sagkod huli sa kagadanan ni Jesus.