1, 2. (a) Boi do ihatahon nasiam mananda sasada halak anggo pitah mambotoh goranni? Patorang ma. (b) Aha do na ihaporsayai halak pasal Jesus?

BUEI do halak na tarsar i sab tanoh on. Ra do ibotoh nasiam goran ni sada halak na tarsar. Tapi, pitah mambotoh goranni sedo mararti nasiam mananda ia, atap pe mambotoh ganup pasal hagoluhanni pakon sonaha do ia sasintongni.

² Ra do nasiam ongga manangar pasal Jesus Kristus, age pe ia manggoluh 2.000 tahun na salpu i tanoh on. Tapi, buei halak lang mananda ise do sasintongni Jesus. Adong na mangkatahon halak na bujur do ia, nabi, atap Naibata. Sonaha pandapot nasiam?​—Idah Ambah ni Hatorangan 12.

3. Mase porlu mananda Naibata Jahowa pakon Jesus Kristus?

³ Porlu do nasiam mambotoh hasintongan pasal Jesus? Bibel patugahkon, “Ia hagoluhan sisadokah ni dokahni, in ma, anggo itanda sidea Ham, Naibata sisada-sada in, na sintong in, ampa Jesus Kristus, na sinuruh-Mu.” (Johannes 17:3) Tongon, anggo itanda nasiam Jesus pakon Jahowa, nasiam boi tongtong manggoluh i paradeiso. (Johannes 14:6) Janah mangusihi Jesus boi mangurupi nasiam marparlahou na dear bani na legan. (Johannes 13:34, 35) Bani  Pasal 1, domma iparlajari ise do Naibata ai. Sonari hita mamparlajari na iajarhon Bibel pasal Jesus.

4. Aha do artini titel “Mesias” ampa “Kristus”?

⁴ Marratus tahun paima lape tubuh Jesus, Jahowa marjanji suruhon-Ni do roh Mesias atap Kristus. Titel “Mesias” ai sahap Heber, janah “Kristus” ai sahap Junani. Haduasi titel ai patuduhkon Naibata laho mamilih Mesias na ijanjihon janah mambere horja na mulia aima laho pasaudkon ganup janji-Ni. Sonari pe nasiam boi mandapot guna anggo mamparlajari aha na ihorjahon Jesus sanggah ia i tanoh on. Tapi, sanggah lape tubuh Jesus, bahat do na manungkun, ‘Ise do na laho gabe Mesias ai?’

5. Porsaya do susian ni Jesus anggo ia do Mesias na ijanjihon?

⁵ Susian ni Jesus porsaya Jesus do Mesias na ijanjihon. (Johannes 1:41) Sontohni, nini si Simon Petrus bani Jesus, “Ham do Kristus.” (Mateus 16:16) Sonaha hita boi porsaya Jesus ai do Mesias?

6. Sonaha Jahowa mangurupi halak na bujur laho mananda Mesias?

⁶ Sanggah lape roh Jesus, domma isuratkon nabi-nabi tanda na boi mangurupi halak mananda Mesias. Mase marguna tanda ai? Sontohni, nasiam isuruh hu terminal mangalop sasada halak na lape itanda. Anggo tangkas ipatugah sonaha halakni, pasti nasiam boi mananda ia. Sonai ma marhitei nabi-nabi, Jahowa domma patugahkon aha na laho bahenon ni Mesias ampa na laho saud bani.  Parsaudni ganup panjahaion ai, mangurupi halak na bujur mambotoh Jesus do Mesias.

7. Dua panjahaion aha na patuduhkon Jesus do Mesias?

⁷ On ma dua panjahaion ai. Na parlobei, 700 tahun paima tubuh Jesus, domma isuratkon si Mika, i Betlehem do Mesias tubuh. (Mika 5:1) Anjaha tongon do ijai Jesus tubuh! (Mateus 2:1, 3-9) Na paduahon, isuratkon si Daniel do Mesias roh bani tahun 29 M. (Daniel 9:25) On pitah dua panjahaion humbani bahatni panjahaion na patuduhkon Jesus do Mesias na ijanjihon.​—Idah Ambah ni Hatorangan 13.

8, 9. Aha do na masa sanggah Jesus ididi, na patuduhkon ia Mesias?

⁸ Takkas do ibahen Jahowa anggo Jesus do Mesias. Naibata marjanji bereon-Ni do tanda bani si Johannes Pandidi ase mambotoh ise do Mesias ai. Sanggah Jesus laho hu bah Jordan ase ididi si Johannes bani tahun 29 M, ididah si Johannes ma tanda ai. Bibel patugahkon aha na masa, “Dob tardidi Jesus, mintor naik ma Ia humbagas bah ai. Anjaha tonggor ma, mungkab ma langit, anjaha taridah ma susur hun langit Tonduy ni Naibata songon asas, lanjar sogop hu Bani. Lanjar nini sada sora ma hun nagori atas, ‘On do Anak, haholongan ni uhur-Hu, marosuh do uhur-Hu mangidah-Si!’” (Mateus 3:16, 17) Sanggah si Johanes mangidah tanda ai, porsaya ma ia, Jesus do  Mesias. (Johannes 1:32-34) Bani ari ai, sanggah ibere Jahowa tonduy-Ni, gabe Mesias ma Jesus. Ia do na ipilih Jahowa gabe Panggomgom pakon Raja.​—Jesaya 55:4.

⁹ Panjahaion ni Bibel, sora ni Jahowa, ampa tanda na ibere-Ni sanggah Jesus ididi, patuduhkon Jesus do Mesias ai. Tapi, hunja do harorohan ni Jesus, janah sonaha biakni? Parlajari hita ma aha na ihatahon Bibel.

10. Aha na iajarhon Bibel pasal hagoluhan ni Jesus paima roh hu tanoh on?

¹⁰ Bibel mangajarhon, domma dokah Jesus marianan i surga paima roh hu tanoh on. Nini si Mika, Mesias domma dong “humbani nahinan”. (Mika 5:1) Jesus pe patugahkon, domma dokah ia i surga paima tubuh gabe manisia. (Basa Johannes 3:13; 6:38, 62; 17:4, 5.) Jadi, orot do parhasomanan ni Jesus pakon Jahowa sanggah i surga ia.

11. Mase Jahowa holong tumang bani Jesus?

¹¹ Mase holong tumang Jahowa bani Jesus? Halani Jesus itompa sanggah lape itompa haganup. Halani ai Jesus ihatahon “na parlobei tubuh humbani sagala na tinompa”. * (Kolosse 1:15) Jahowa mangkaholongi Jesus halani Ia sandiri na manompa Jesus. Halani ai ma Jesus ihatahon “Anak-Ni na sasada in”. (Johannes 3:16) Marhitei Jesus dassa Jahowa manompa haganupan. (Kolosse 1:16) Janah pitah Jesus do na igoran “Hata”, halani marhitei Jesus do Jahowa mambere tonah pakon parentah-Ni bani malekat ampa manisia.​—Johannes 1:14.

12. Hunja do ibotoh hita Jesus ai lang Naibata?

¹² Buei halak porsaya Jesus do Naibata. Ai lang ajaran ni Bibel. Bibel patugahkon itompa do Jesus, artini dong do mulani. Tapi, Jahowa sitompa haganup lang dong mulani. (Psalmen 90:2) Jesus sandiri  lang ongga marpingkir ase sarupa pakon Naibata. Takkas do ipatugah Bibel banggalan do Bapa ase Anak. (Basa Johannes 14:28; 1 Korint 11:3.) Pitah Jahowa do “pargogoh na so tarimbang”. (1 Musa 17:1) Ia do sibanggalan janah sigogohan humbani haganupan.​—Idah Ambah ni Hatorangan 14.

13. Mase Bibel mangkatahon Jesus “usihan ni Naibata na so taridah in”?

¹³ Domma marmiliar tahun Jahowa rap pakon Jesus i surga, paima langit pakon tanoh on itompa. Ai mambahen toguh holong ni sidea! (Johannes 3:35; 14:31) Halani dear tumang Jesus mangusihi biak ni Jahowa, Bibel mangkatahon Jesus “usihan ni Naibata na so taridah in”.​—Kolosse 1:15.

14. Sonaha Anak hinaholongan ni Jahowa itubuhkon gabe manisia?

¹⁴ Anak na hinaholongan ni Jahowa on, ra manadingkon surga janah tubuh gabe manisia i tanoh on. Sonaha boi? Marhitei halongangan, ipapindah Jahowa hagoluhan ni Anak-Ni hun surga hubagas kandungan ni si Maria. Halani ai ma lang marbapahon manisia Jesus. Jadi, sempurna do itubuhkon si Maria ia, janah ibahen ma goranni Jesus.​—Lukas 1:30-35.

15. Sonaha nasiam boi lambin dear mananda Jahowa?

¹⁵ Nasiam boi lambin mananda Jesus, sonaha hagoluhanni, ampa biakni marhitei mambasa buku Mateus, Markus, Lukas, ampa Johannes. Ompat buku on igoran Injil. Halani Jesus usih songon Bapani, aha na iparlajari nasiam pasal Jesus, boi  mangurupi nasiam lambin mananda Jahowa. Halani ai ma ase nini Jesus, “Na mangidah Ahu, na mangidah Bapa in do.”​—Johannes 14:9.

16. Aha do na iajarhon Jesus? Hunja do pangajarion ni Jesus ai?

¹⁶ Bahat halak mandilo “Guru” bani Jesus. (Johannes 1:38; 13:13) Siporlunan na iajarhon Jesus ai ma “Ambilan Na Madear pasal harajaon”. Aha do Harajaon ai? Ai ma pamarentahan ni Naibata i surga na laho manrajai tanoh on, janah mamasu-masu na ra manangihon Naibata. (Mateus 4:23) Ganup na iajarhon Jesus, ai humbani Jahowa do. Nini Jesus, “Ia podah-Ku seng na hun Bangku ai, tapi humbani na marsuruh Ahu do.” (Johannes 7:16) Jesus mambotoh, sihol do Jahowa ase halak manangar ambilan na madear pasal Harajaon ni Naibata na laho mamarentah hu sab tanoh on.

17. Ija do Jesus mangajar? Mase ringgas tumang ia mangajar?

¹⁷ Ija do Jesus mangajar? Ija pe halak boi ijumpahi. Ia mangajar i dusun-dusun, i huta-huta, i kota, i tiga, i ianan panumbahan, ampa hu rumah-rumah. Ia seng mangarap ase halak na roh bani, tapi ia do na manjumpahi sidea. (Markus 6:56; Lukas 19:5, 6) Bahat panorang ampa gogoh na igunahon Jesus laho mangajar halak. Mase ia ra? Halani ibotohni ai do harosuh ni Naibata janah ia pe tongtong unduk bani Bapani. (Johannes 8:28, 29) Jesus ra mangajar halani idop ni uhurni mangidah halak na mabuei. (Basa Mateus 9:35, 36.) Janah ia pe mangidah pambobai ugama lang mangajarhon pasal Naibata ampa Harajaon-Ni. Ai ma mambahen sihol uhurni mangurupi buei halak ase manangar ambilan na madear.

18. Biak na ija do humbani Jesus na iharosuhkon nasiam?

 ¹⁸ Jesus mangkaholongi janah parduli bani halak na mabuei. Bujur homa ia, janah urah idohori. Dakdanak pe marosuh hu bani. (Markus 10:13-16) Tongtong do ia pintor. Ihagigihonni do hagedukon. (Mateus 21:12, 13) Bani masa ia manggoluh, iapasi halak do naboru-naboru. Tapi legan do Jesus, sangap do ibahenni naboru-naboru. (Johannes 4:9, 27) Martoruh uhur do Jesus. Sontohni, ongga do iburihi nahei ni apostel-apostelni, age pe horja ni jabolon do ai somalni.​—Johannes 13:2-5, 12-17.

19. Sontoh aha do na pataridahkon Jesus mambotoh haporluhan ni halak janah sihol mangurupi?

¹⁹ Ibotoh Jesus do aha na ihaporluhon halak, janah ia pe sihol mangurupi. On taridah sanggah ia pamalumhon halak marhitei kuasa ni Naibata. (Mateus 14:14) Sontohni, sada dalahi na gadamon roh bani Jesus mangkatahon, “Anggo ra Ham, tarpasusi Ham do ahu!” Gabe holong ma Jesus mangidah ia janah sihol mangurupisi. Jadi, isurdukkon Jesus ma tanganni, ijamah ma ia, lanjar nini ma hubani, “Ra do Ahu, susi ma ham!” Lanjar malum ma dalahi na gadamon ai! (Markus 1:40-42) Boi do iahapkon nasiam sonaha pangahap ni dalahi na gadamon ai?

20, 21. Jesus siusihan na sidearan laho manangihon Naibata. Mase?

²⁰ Jesus siusihan na sidearan laho manangihon Naibata. Lang soal aha na masa, atap aha na ibahen munsuhni, tongtong do ia martenger ni uhur bani Bapani. Sontohni, age pe ilajou Sibolis, totap  do ia martenger ni uhur. (Mateus 4:1-11) Piga-piga sindohorni lang porsaya ia do Mesias, janah mangkatahon “na podouan” do ia. Tapi, totap do ia mangkorjahon harosuh ni Naibata. (Markus 3:21) Sanggah iarsik-arsik munsuhni pe ia, totap do ia martenger ni uhur janah lang ongga mambalas.​—1 Petrus 2:21-23.

²¹ Age pe Jesus manaron hamarsikon ronsi hamateanni, tongtong do ia martenger ni uhur bani Jahowa. (Basa Pilippi 2:8.) Rimangi ma sonaha boratni sitarononni sanggah laho matei ia. Itangkap janah ipahiri saksi na ladung, irisai, itartawai janah igantungkon bani sada hayu. Sanggah na laho bois hosahni ihatahon ma, “Domma salosei!” (Johannes  19:30) Bani ari patoluhon dob matei Jesus, ipapuho Jahowa ma ia ibagas partonduyon. (1 Petrus 3:18) Piga-piga minggu dob ipapuho, naik ma Jesus hu surga, hundul hu siamun ni Naibata, janah paimahon itabalhon Naibata ia gabe Raja.​—Heber 10:12, 13.

22. Aha na boi idapot hita halani Jesus martenger ni uhur bani Bapani?

²² Halani Jesus martenger ni uhur bani Bapani, boi ma hita sonari marpangarapan laho manggoluh sadokah ni dokahni i paradeiso, domu bani janji ni Jahowa. Bani pasal na mangihut, hita mangulas mase hamatean ni Jesus boi mambahen hita tongtong manggoluh.